جلد الوزة واحتباس الشعر تحت الجلد اسبابه وعلاجه
المشكلة دي بتواجه بنات كتير وبيحتاروا في حلها عشان بتسبب الكتير من الاحراج والمشكلات النفسية، وهي ان الجلد بيكون مظهره خشن ومكان ظهور الشعر سواء على الذراعين او الساقين بيبقى فيه بثور ونقط حمرا او بني وبيبقى شكلها وملمسها مش جذاب المشكلة دي لها اسباب كتير ولها كمان طريقة حل بس بتحتاج لشوية وقت ومداومة والتزام ببرنامج العلاج، النهاردة بنات حوا حتحاول تساعدكم في ايجاد حل لمشكلة جلد الوزة واحتباس الشعر تحت الجلد عن طريق الوصفات الطبيعية المنزلية
اسباب وعلاج جلد الوزة واحتباس الشعر تحت الجلد
الاسباب
المشكلة دي غالبا بتنشأ بسبب تراكم طبقة كبيرة من البروتين على جدر الشعرة وده بيعيق طريقها للخروج بره الجلد، ولكن في اسباب كتيرة تانية لحدوث المشكلة دي ولازم تعرفي سبب المشكلة عشان تقدري تعالجيها بالشكل المناسب وباقي الاسباب هي:
- العوامل الوراثية
- ازالة الشعر الزائد بطريقة خاطئة
- الجفاف الشديد للجلد
- ضيق المسام الشديد
- التعرض للبرودة الشديدة
- نقص فيتامين A
- التوتر العصبي الشديد
طرق العلاج:
للعلاج بشكل عام ايا كان السبب في تلات خطوات لازم الاعتماد عليهم في حل المشكلة دي
- شرب الكثير من الماء عشان تتخلصي من السموم اللي بتتراكم تحت الجلد وتخلي المسام تتفتح بشكل عادي وطبيعي
- ترطيب الجسم بشكل مستمر وخليها من عاداتك اليومية
- دخلي فيتامين A بشكل اكبر في نظامك الغذائي عن طريق انك تكتري من المأكولات الغنية به زي الجزر مثلا ولو مش بتحبيه ممكن تاخدي حبوب او اقراص فيتامين A
اما بقى الروتين المعتاد اللي حنمشي عليه فترة لعلاج المشكلة فهو كالأتي
برنامج العلاج
- ممنوع ازالة الشعر لمدة شهر او 40 يوم لغاية ما يظهر الشعر بالكامل
- اغسلي شعرك في الحوض قبل الاستحمام وبلاش الشامبو والبلسم ينزلوا على الجسم عشان ما الجلد ما يمتصش من البروتين والكيراتين اللي في المستحضرات دي
- استخدمي المقشر مرة واحدة على الاقل في الاسبوع عشان تتخلص من كل طبقات الجلد الميت وتنضفي المسام اول بأول
- رطبي الجلد يوميا قبل النوم بكريم الجلسرين او زيت الزيتون الخام
- بعد انتهاء الشهر او الاربعين يوم بلاش حلاقة الشعر او استخدام السيلك ابيل انزعي الشعر باستخدام الحلاوة فقط ولو مش بتعرفي تستخدميها صح يستحسن تعتمدي على خبيرة او على حد من اقرايبك او صديقاتك عشان ماتقطميش الشعر ويبقى مظهر الجلد خشن
- يفضل مرتين على الاقل في الفترة دي تستخدمي الطمي المغربي على المنطقة المصابة سواء الذراعين او الساقين
- اختاري واحدة من الوصفات التالية واستخدميها اثناء الفترة دي بانتظام
1- وصفة الاسبرين
- 4 اقراص من الاسبرين العادي
- معلقة عسل نحل كبيرة
- معلقة كبيرة زيت الزيتون
طريقة الاستخدام
- في حمام ماية سخنة حطي العسل والزيت وقلبي شوية لغاية ما يبقى قوام العسل سايب وخفيف
- اطحني الاسبرين وضيفيه على العسل والزيت
- اتأكدي ان الخليط مش سخن اوي وبعدين افردي طبقة على المنطقة المصابة
- سيبيه يجف نص ساعة وبعدين اشطفيه بالماية الفاترة
- كرري العملية دي يوم بعد يوم بس مش في يوم استخدام المقشر
2- وصفة الزيوت الطبيعية
المكونات
- حوالي تلات نعالق كبيرة من زيت جوز الهند
- 10 قطرات من زيت اللافندر
- 15 قطرة من زيت شجرة الشاي
الخلطة دي بتساعد على تخليص الجلد من اي جراثيم او بكتريا لأن زيت جوز الهند وزيت شجرة الشاي فيهم مواد مضادة للبكتريا والفطريات، اما اللافندر فبيساعد على ارتخاء الجلد عشان لو كان السبب في المشكلة هو التوتر العصبي فده بيعالجها وغير كده هو زيت عطري ريحته جميلة جدا ومميزة
طريقة العمل والاستخدام
- دوبي زيت جوز الهند وفي حمام ماية سخنة لغاية ما يبقى قوامه سائل
- ضيفي علىه الزيوت التانية
- حطي طبقة منه على الجلد المصاب
- بعد ربع ساعة الزيت حيبدأ يتماسك شوية سيبيه اطول فترة ممكنة وممكن تلبسي عليه هدوم قطن ضيقة شوية عشان ما تضايقيش منه
- كرري العملية يوم بعد يوم وابعدي عن الايام اللي حتستخدمي فيها المقشر او الطمي المغربي عشان تدي فرصة للجلد انه يرتاح
بالنسة لتقشير الجلد فممكن نبعد برضه عن انواع المقشر الجاهزة ونعمل مقشر في البيت
- المقشر الاول: عبارة عن مقدار من زيت الزيتون ومقدار مساوي من السكر الابيض او البني (يعني لو اخدتي معلقة من ده يبقى تاخدي معلقة من ده) وكتري الكمية على حسب المساحة اللي حتستخدمي فيها المقشر، حطيه على الجلد وافركي بأطراف صوابعك وبعدين استخدمي اللوفة براحة وبلطف وفي الاخر اشطفي الجلد
- المقشر التاني: عبارة عن معلقتين كبار من حمص الشام اطحنيهم في الكبة طحن خشن شوية وضيفي عليه عصير نص ليمونة وبعدين اعجنيهم بشوية حليب لغاية ما يبقي معجون سميك شويةن افردي طبقة منه على الجلد وسيبيه لغاية ما ينشف خالص، بللي اطراف صوابعك وابدأي في دعك المقشر عن الجلد ولما كله يتبل استخدمي اللوفة المغربي او العادية في عمل حركات دائرية براحة وبلطف على المكان المصاب
بعد ما بتنتهي من التقشير بترطبي الجلد كويس بزيت الزيتون او كريم الجلسرين
استمري على الروتين ده طول فترة الشهر او الاربعين يوم ولما تلاقي الشعر كله ظهر استخدمي الحلاوة في ازالة الشعر زي ما اتفقنا قبل كده
ملجوظة: لازم تستمري على ترطيب البشرة يوميا والتقشير الاسبوعي عشان تعلاجي المشكلة من جذورها
