10 وصفات طبيعية لعلاج و تنظيف الشعر الدهني

الشعر الدهني مش حالة مرضيه ولكنه نوع من انواع الشعر، سببه ان بيكون في نوع بسيط من الخلل في معدل افراز الدهون في فروة الرأس فبيكون اعلى من العادي وده بيسبب مظهر دهني ومطفي واحيانا متسخ للشعر، وحتى لما بنعمل سشوار مش بيعدي يومين غير ونلاقي ان الشعر شكله دهني ومش صحي زي ما كان في البداية، النهاردة بنات حوا جايبالكم وصفات لعلاج و تنظيف الشعر الدهني، وكلمة علاج هنا مش معناها ان طبيعة الشعر حتتغير لأ معناها ان احنا حنحد من المشكلة وحنطول شوية الفترة اللي الدهون فيها بتبدأ تظهر على الشعر وتعمل المظهر الدهني الي مش محبوب

وصفات تنظيف الشعر الدهني

1- خل التفاح

معروف ان خل التفاح من الاحماض القابضة للمسام واللي تقدر تقبض المسام الدهنية وتقلل من افراز الدهون في فروة الرأس بمعدل يومين الى تلاتة اكتر من المعدل الطبيعي

المكونات: كوب ماء + 3 معالق كبيرة من خل التفاح

الطريقة: بعد ما تغسلي شعرك كويس بالشامبو، حطي نقطة صغيرة من البلسم في حجم عمملة معدنية ودلكي بيها اطراف الشعر واببعدي تماما عن فروة الرأس، اشطفي شعرك وبعدين وزعي خليط الخل والماية على فروة رأسك وسيبيها عشر دقايق وبعدين اشطفي بماية باردة

2- عصير الليمون

الليمون كمان مادة قابضة للمسام وبيقدر يعادل من حمضية وقلوية الجلد، عشان كده بيبقى مفيد في التقليل من افراز الدهون في فروة الرأس

المكونات: عصير ليمونتين + كوبايتين ماء + 3 معالق صغيرة عسل النحل، قلبيهم مع بعض كويس جدا في زجاجة او وعاء واستعدي لاستخدامهم بعد غسيل شعرك

الطريقة:  بعد الغسيل المعتاد للشعر (ذكرناه في الخطوة الاولى)، حطي الخليط على فروة رأسك ودلكي كويس وكل ما يتشرب حطي تاني لغاية ما تنتهي من الكمية، سيبيه خمس دقايق وبعدين اشطفيه بمايه فاترة بس

3- اوراق النعناع الاخضر:

اوراق النعناع معروف ان لها قدرة كبيرة على التخلص من الزيوت والدهون وكمان بيدي احساس رائع بإنتعاش فروة الرأس، والوصفة دي مع الوقت بتقلل من معدلات افراز الدهون الزائدة في فروة الرأس

طريقة الاستخدام:

• خدي حوالي نص كوباية من اوراق النعناع الاخضر (طازج او جاف) + كوبايتين ماية
•  حطي النعناع مع الماية على النار وسيبيهم يغلوا على نار هادية وهما متغطين لمده ربع ساعة او تلت ساعة
• اخلطيهم من غير تصفية مع الشامبو العادي بتاعك
• استخدمي الشامبو عادي بالطريقة بتاعتك بس اثناء غسيل الشعر حاولي تدلكي فروة رأسك كويس وتسيبيه مده بسيطة دقيقتين مثلا عشان النعناع يعمل مفعوله كويس

• 4- الشاي:

الشاي الاسود العادي اللي بنشربه موجود فيه احماض معينة قادرة على قبض المسام وتصغيرها وبالتالي بيقلل من افراز الدهون في فروة الرأس

الطريقة

• هاتي معلقتين من الشاي العادي وكوبايتين ماية
• ارفعيهم على النار وسيبيهم يغلوا كويس اوي ربع ساعة بس لازم يتغطوا عشان تحتفظي بالزيوت الطيارة اللي موجودة في الشاي
• صفيه في كوباية وسيبيه يبرد في درجة حرارة الغرفة
• ما يبقى فاتر اغسلي شعرك بيه كويس وغرقي بيه فروة الرأس وسيبيه خمس الى عشر دقايق
• اغسلي شعرك بالشامبو وقليل من البلسم بعدها

• 5- جل الصبار:

من افيد النباتات او الوصفات اللي ممكن نستخدمها للشعر وده لأنه مش بس بيعدل من نسبة الزيوت اللي بتفرزها مسام فروة الرأس، لأ هو كمان بيرطب الشعر وبيقلل من التقصيف وبيتقل الشعر ويساعد على تطويله، لأنه غني بمجموعة كبيرة من المعادن والفيتامينات والانزيمات الفعالة جدا في العناية بالشعر

طريقة استخدامه:

قبل الاستحمام حطي معلقتين كبار من الشامبو في علبة او بولة واخلطي معاهم معلقتين صغيرين من جل الصبار (متوفر عند العطار) ومعلقة كبيرة من عصير الليمون،

 اخلطيهم كويس اوي مع بعض واغسلي شعرك بيهم مرة او اتنين على حسب الكمية وطول شعرك وسيبيه على شعرك شوية قبل ما تشتطفيه حوالي 3 الى 4 دقايق

6- الكربوناتو:

معروف ان بيكربونات الصوديوم لها قدرة عالية على امتصاص الدهون، ولها طريقتين للاستخدام عشان تتخلص من الدهون الزيادة في شعرك

الطريقة الاولى: اخلطي معلقة كبيرة من الكربوناتو مع تلات معالق كبيرة من الماية

بلي شعرك كويس وبعدين ادهني فروة الرأس بالكامل بالمعجون ده وسيبيها خمس دقايق

اغسلي شعرك كويس بالشمامبو والبلسم والماية الدافية

الطريقة التانية، لو كنتي عاملة شعرك سشوار او مش عايزة تغسلية وفي نفس الوقت محتاجة يبقى شكله حلو ومش مزيت يبقى نفذي الخطوات دي

• حطي شوية من الكربوناتو في ايدك وبعدين ابدريها على شعرك كويس
• سيبيها على شعرك دقيقتين تلاتة لغاية ما تمتص الدهون
•  استخدمي فرشاة شعر نظيفة في تمشيط شعرك لغاية ما تتخلصي من البودرة خالص
• حتلاقي بودرة الكربوناتو اخدت الدهون ونزلت بيها وسابت مظهر شعرك افضل بكتير

7- الطمي المغربي:

الطمي المغربي كله مكونات طبيعية من فيتامينات ومعادن مفيدة للبشرة والشعر، وبيخلص الجلد من الجلد الزائد اللي بيسد المسام ويسبب قشرة الشعر وبيزيد من افراز الدهون

الطريقة

• خدي ربع كوباية من بودرة الطمي واخلطيها مع كمية من الماية وقطرات من ماء الورد
• اعمليهم عجينة سميكة نسبيا
• غرقي فروة الرأس وبعدين حطيها على الشعر نفسه وسيبيها حوالي نص ساعة
• اغسلي شعرك كويس بالماية الدافية لغاية ما تتخلصي من كل اثر الطمي
• وبعدين استخدمي الشامبو والبلسم كالمعتاد

8- الطماطم والطمي: 

الطماطم مليانة بالاحماض الطبيعية اللي بتعادل حمضية وقلوية الجلد وبتعدل من نسب افراز الدهون، بالإضافة لفوايد الطمي اللي ذكرناها من شوية

طريقة الاستخدام

• اعصري ثمرة طماطم كويس اوي وخدي العصير بتاعها
• اخلطي العصير مع معلقة من الطمي لغاية ما تبقى شبه المعجون
• وزعي الخليط كويس اوي على فروة رأسك وشعرك غطي شعرك ببونيه بلاستيك وسيبيه لمدة نص ساعة كاملة
• اغسلي شعرك كويس لغاية ما تتخلص من الخليط وبعدين حطي الشامبو والبلسم

9- ماسك بياض البيض

معروف عن بياض البيض انه مادة قابضة وبتساعد على التخلص من الدهون، وكما بيدي للشعر مظهر صحي جدا ولامع

• اخفقي بياض بيضة او اتنين على حسب طول شعرك كويس جدا
• وزعي البيض على فروة الرأس والشعر وسيبيه تلت ساعة الى نص ساعة
• اغسلي الشعر كويس لغاية ما تتخلصي من اثار البيض وبعدين اغسليه بالشامبو والبلسم
• لو محتاجة تغيري من رائحة الشعر دوبي معلقة من النسكافيه في كوبااية ماية فاترة واشطفي بيها شعرك كويس وسيبيها خمس دقايق وبعدين اشطفي بالماية بس

10- ماسك الموز والعسل

الماسك ده بيتعمل بعد كل الوصفات السابقة لأنه بيدي نفس مفعول البلسم وبيرطب الشعر وفي نفس الوقت مش بيضيف له اي دهون زي الكريمات والمرطبات العادية

الطريقة: اهرسي موزة كويس او ي في الكبة او الخلاط، ضيفي على كل اربع معالق من الموز المهروس معلقة كبيرة من عسل النحل، اخلطيهم كويس ووزعي الخليط على الشعر من الجذور الى الاطراف، سيبيه نص ساعة وبعدين اشطفيه كويس اوي بالماية الفاترة لغاية ما تتخلصي من اثر الخليط نهائيا من على شعرك