8 نصايح ذهبية إزاي تكسبي وزن

بقلمسارة جمال فيزيادة الوزن visibility23948

معظم الناس بتشتكي دايما إنها عايزة تفقد وزن وتلاقي كتير مقالات ونصايح عن الموضوع ده, واعتقد إن ده عشان احنا طبيعة شعبنا المصري بنحب جدا الأكل وعندنا ذوق عالي واكلات مصرية كتير شهية وملهاش مثيل في باقي البلاد.. بس برضه مع ذلك فيه ناس تانية كتير بتعاني من النحافة, وبيبقي نفسهم وزنهم يزيد ومش عارفين يحققوا الهدف ده إزاي, النهرده احنا هنتكلم عن ايه هي أسباب النحافة وطرق زيادة الوزن بشكل صحي وطبيعي.

زيادة الوزن
زيادة الوزن

تعالوا الاول نتعرف على ايه أسباب النحافة؟

1- جينات وراثية.

2- عدم الاكل بالكميات المناسبة للسن والمجهود.

3- بعض الأمراض زي الأنيميا أو أمراض الجهاز الهضمي اللي بتمنع امتصاص هضم الأطعمة أو انعدام الشهية.

4- العصبية الزيادة عند بعض الاشخاص.

5- قلة النوم أو الأرق.

6- الناس اللي قدرتها على حرق الدهون زيادة.

طبعا لازم الاول الشخص يتأكد هو ايه سبب نحافته من الاسباب اللي فوق, ولازم يعمل التحاليل اللازمة عشان يتأكد انه مش عنده مرض معين هو اللي مسببله مشكلة النحافة.

إزاي نتغلب على مشكلة النحافة ونحقق زيادة الوزن ؟!

1- تزويد كمية الاكل اليومية:

لازم الشخص النحيف ياكل 3 وجبات اساسيين كل يوم وبينهم 2 وجبة “سناك” اكله خفيفة, عشان تقدري تركزي مع نفسك في الموضوع ده ممكن تعملي منبه ليكي كل ساعتين عشان يفكرك بموضوع الاكل ده.

2- الشرب بين الوجبات:

احرصي إنك تشربي مياه غازية, ميلك شيك,عصايرأو لبن كامل الدسم بين الوجبات ومش أثناء الوجبات عشان الشرب أثناء الكل بيشبع لانه بيملي المعدة ومش بيسيب مكان للأكل.

3- زودي السعرات الحرارية في أكلك:

ممكن تعملي كده بأنك مثلا تحطي جبنة مبشورة في طبقك فوق الاكل أو مايونيزأو زبدة, كلي رز بالمكسرات والزبيب بدل الرز العادي, حطي زيت على السلطة, اعملي الشاي بلبن أو النسكافيه يبقي كله باللبن ومتحوطيش فيه ماية خالص, ديما دوري على إزاي تزودي السعرات الحرارية في كل وجباتك واعملي كده.

4- ركزي في الاكلات التقيلة:

ركزي اكلك في الاكلات اللي مش دسمة بس في نفس الوقت فيها بروتين وكربوهيدرات عالية, شوفي كده:

  • المشروبات – اشربي المشروبات اللي فيها بروتين أو العصاير أو الحليب كامل الدسم. تجنبي المشروبات الغازية الدايت
  • الخبز – ركزي في العيش الغامق اللي معمول من القمح الكامل أو الشوفان، وبلاش الخبز الأبيض. قطعي شرائح سميكة وحُطي عليها زبدة الفول السوداني أوالمربى أوالعسل أو الجبن.
  • الخضروات – خليكي في الخضروات النشوية ( البطاطس والبسلة، البطاطا، الذرة، الجزر، القرع ). تجنبي الخضروات اللي هي في معظمها ماية ( البروكلي، القرنبيط، الكوسا، والفاصوليا الخضراء والخيار ).
  • الفاكهة – اختاري الفاكهة اللي فيها ألياف ( الموز والكمثرى والتفاح ) والأناناس والفواكه المجففة أكثر من الفاكهة اللي كلها ماية  ( البرتقال، اليوسفي، الخوخ، التوت والبطيخ )
  • الشوربة – خليكي في الشربة اللي فيها كريمة أو لبن أحسن من الشربة اللي بالمرقة.
  • الزيوت – لما تيجي تطبخي زودي كمية الزيت في اكلك, اهم حاجة انه يكون من الزيوت غير المكررة (البكر) زي الزيتون وجوز الهند والنخيل، وطبعا الزبدة. فيه زيوت صحية بس أقل شوية زي عباد الشمس، والفول السوداني. أما بقي الزيوت غير الصحية التي تحتوي على الدهون غير المشبعة هي زيت فول الصويا.

5- املي التلاجة بالسناكس اللي بتحبيها:

حاولي تخلي الوجبات الزيادة اللي بين الوجبات بحاجة كلها بتحبيها وبيبقي نفسك فيها, وجيبي منها كمية كبيرة وخلي التلاجة ديما مليانة بيها.

6- الرياضة:

لعب الرياضة بيحفز الجسم ويجوعك ويخليكي عايزة تاكلي تاني , حاولي تلعبي رياضة مرة أو مرتين بس في الأسبوع. ولازم راحة ونوم بعد التمارين.

7- غيري اسلوب حياتك:

لازم عشان تكسبي وزن ده يحصل معاه تغيير في طبيعة واسلوب حياتك, بمعني مثلا إنك يكون عندك استعداد تاكلي في أي وقت حتي لو إنتي مش جعانة, تتقبلي إن الأكل الكتير ده ممكن يعملك غازات أو امساك من وقت للتاني, إنك تمشي على سيستم أو نظام ثابت (أكل, رياضة, راحة, نوم, شرب, أكل).

8- تابعي وزنك أول بأول:

لازم توزني نفسك كل يوم الصبح, وده انسب وقت لوزن الجسم, ويفضل إنك تكتبي في ورقة كل يوم إنتي اكلت ايه ووزنك ايه, لأن ده ممكن يديكي اشارة لو فيه اكلات معينة بتدي تأثير سريع معاكي, كمان حطي لنفسك أهداف ورقم معين تكوني عايزة توصليله, بس حطي رقم منطقي يعني مش رقم مبالغ فيه. ده ممكن يديكي دفع قوي إنك تكملي في النظام بتاعك كل يوم.

واهم حاجة بقي في كل النصايح ديه هي “الإستمرارية” وحطي 100 خط تحت الكلمة ديه, يعني مينفعش تمشي على نظام زيادة الوزن يومين ولا أسبوع وتزهقي وتبطلي وبعدين ترجعي تكملي بعدها بفترة, لانك وقتها هتضيعي كل مجهودك اللي فات وهتكوني بتبدأي من الأول.