توافق برج الحمل مع الابراج التانية

بقلمأنجي سليمان فيبرج الحمل visibility68423

المتفائل، المحارب، الشغوف، صاحب النزعة الاستقلالية، عاشق المطاردات والتحدي مولود برج الحمل، اتعرفنا على صفات انثى برج الحمل وصفات رجل برج الحمل، والنهاردة حنتعرف على توافق مواليد الحمل مع مواليد الابراج التانية.

الحمل مع الأبراج التانية من أنجح علاقاته بتكون مع (الأسد, الجوزاء, القوس والدلو) ومن أصعبهم واللي بتكون محتاجة شغل وصبر عشان تنجح (السرطان والجدي).

توافق برج الحمل

توافق برج الحمل

1- برج الحمل والحمل:

برج الحمل يحب الاستقلال ويكره احساس ان حد بيحركه ويتحكم فيه عشان كده الاتنين بيقدروا يتفهموا اوي رغبة الاخر في تنفيذ قراراته وتوجيه حياته بالشكل اللي يحبه، والاتنين حيعرفوا يخلوا حياتهم قائمة على النزعة الاستقلالية دي بعيد عن الاعتماد على ان طرف واحد ياخد القرارت واحيانا ده بيخلي كل واحد مركز في نفسه اكتر من تركيزه في العلاقة المشتركة اللي بينهم، الطرفين عندهم عزة نفس واحساس بالذات وحساسين جدا للانتقاد، المشكلة انهم ممكن يتحدوا بعض في موضوع ما بسبب طبيعتهم اللي بتعشق التحدي وساعتها بيبقى صدام قوي بس غالبا بينتهي بأن طرف من الاتنين ينجرح وينسحب. العلاقة مابنهم مفيهاش وسط, يا عشق واحترام بعض بمنتهي القوة, يا إما شدة الكره.

نوع العلاقة: قوية جدا! لأنكم بتبقوا فاهمين بعض كويس قوي كأنه كتاب مفتوح ودرجة التفاهم والمشاعر قوية اوي.

2- برج الحمل والثور:

الحمل شغوف وحماسي جدا في حين ان الثور بيتعامل بتفكير عقلاني وعملي جدا، الصدام دايما بيحصل بينهم بسبب اندفاع الحمل ورا افكاره اللي مش متخطط لها كويس او اللي بتفشل وده بيدفع الثور للومه وتوبيخه وعشان الحمل حساس جدا للانتقاد فدايما بينصرف نفسيا من ناحية الثور، ولو تفهم الثور الطبيعة دي في الحمل وعرف ازاي يوجهه بطريقة لطيفة ويساعده على اتخاذ قراراته من غير تسرع فاسباب الصدام بين الاتنين ممكن تقل جدا، والحمل كمان ممكن يأثر على الثور ويعلمه شويه اندفاع وسرعة في اتخاذ القرارت.

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, بس بمجرد إن ده يحصل علاقتكم هتكون رائعة عشان هتكملوا بعض.

3- برج الحمل والجوزاء:

فيهم حاجات كتيرة مشتركة, الأتنين بيحبوا الحيوية والنشاط, بيحبوا انهم يعيشوا الحاضر ومبيفكروش كتير فالماضي. سريعين الملل وبيحبوا التغيير والتجديد عشان معندهمش صبر.وهم الاتنين عندهم حب للحرية ومعندهمش قابلية انهم يستحملوا الخنقة أو الضغط.

اما اللي ممكن يسبب مشاكل ما بين الطرفين فهو طبيعة الحمل اللي مش صبور وسريع الملل واللي بيخليه ساعات بيزهق ويفقد صبره اثناء النقاش مع الجوزاء طبعا عشان الجوزاء خياله خصب وعنده أفكار ونظريات كتيره يحب يعرضها ويناقشها مع الطرف الاخر، والحل بسيط بيبقى بس في اختيار التوقيت يعني لو الجوزاء ادرك امتى الحمل بيكون مش قادر يتناقش او معندهوش الصبر الكافي للمناقشة واجل كلامه شويه يبقى ممكن المشكلة يتم تجنبها من البداية.

نوع العلاقة: عندكم تناغم وتعاون وفيه بينكم حاجات كتيرة مشتركة, بتقدروا بعض ومن السهل جدا انكم تنجحوا مع بعض عاطفيا.

4-  برج الحمل والسرطان:

 الحمل غالبا بيشعر بالخنقة من احتياجات الأسرة والاصدقاء على عكس السرطان اللي عنده موضوع العاطفة ده زياده وبيكرس حياته لأصحابه وأسرته, الحمل ممكن مين غير مايشعر يستغل جزء العطاء عند السرطان, وده بيولد شعور عند السرطان إن الحمل برج استغلالي والسرطان ممكن يحس إن الحمل حساس زيادة عن اللزوم ومش بيبقي قادر يفهم أو يستوعب المشاعر ديه.

الحمل ممكن يتعلم من السرطان العاطفة والقدرة على العطاء, والسرطان ممكن يتعلم من الحمل الاستقلالية والاعتماد على النفس.

نوع العلاقة: علاقة صعبة جدا واختلاف كبير! لازم محاوله للتغيير والمرونه منكم انتو الاتنين عشان العلاقة تنجح لأن فيها تحد كبير جدا.

5- برج الحمل والاسد:

الأسد والحمل بيتشاركوا في انهم شخصيات مستقلة, مبدعين جدا وتلاقيهم دايما عندهم حماسة ناحية فكرة أو مشروع معين, فيه بينهم انسجام وتوافق قوي في ميولهم واهتمامتهم, الحمل ممكن يكون اقل اجتماعية شوية من الأسد ومش بيهتم قوي بشكله وإن ينال اعجاب الناس زي الاسد, عشان كده ممكن تلاقيه بيقول رأيه بصراحة أكتر حتي لو هيضايق الناس, على عكس الأسد المجامل دايما اللي بيحب التجمعات ويحب انه يلاطف ويجامل الناس اللي حواليه.

انتوا الاتنين عندكم فخر وكبرياء في شخصيتكم وبتبحوا تكونوا الشخص القائد في العلاقة, وده ممكن يسبب مابينكم بعض المشاكل… ولما بتحصل خناقة أو شد دايما الموضوع بيقلب معاكم دراما بزيادة..

نوع العلاقة: عندكم تناغم وتعاون وفيه بينكم حاجات كتيرة مشتركة, بتقدروا بعض ومن السهل جدا انكم تنجحوا مع بعض عاطفيا. 

6- برج الحمل والعذراء:

الامانة وحب الصراحة من غير مجاملة وتذويق للكلام صفة مشتركة بين الاتنين هما الاتنين بيدورا عليها وبيقدروا مع ان العذراء بيقبل الانتقاد والصراحة أكتر من الحمل ما بيقدر بيقبلها منه عشان الحمل حساس للنقد جدا، واللي ممكن يسبب مشاكل بينكم ان الحمل مندفع ويحب يتصرف على هواه وقراراته وقتيه بتعتمد على احساسه ورغبته اما العذراء فهو بيحب التفاصيل وبيخضع كل حاجة للدراسة والتحليل قبل ما يتصرف، وده ساعات بيدايق الحمل وبيحسسه بنفاذ الصبر لأنه يحب يتصرف باندفاع وبدون تخطيط كتير، اما التوافق فهو موجود في ان الحمل طبيعته قيادية ويحب يبقى هو قائد العلاقة والعذراء معندهوش مانع انه يكون ملازم له ويسمع لرأيه من غير تسلط او رفض،  والمميز في علاقتهم فهي انهم ممكن يتعلموا من بعض جدا وغالبا التناقض اللي بين شخصياتهم ده بيخلق نوع من الانجذاب.

نوع العلاقة: الشخصيات متناقضة بس بينكم قوة انجذاب قوية جدا، مع شوية تفاهم ومجهود بتكون علاقة ناجحة جدا.

7- برج الحمل والميزان:

طبيعة الشخصيتين فيها اختلاف كبير، يعني الميزان شخص يحب يدرس كل موضوع من كل الزوايا ويحب يناقش الافكار ووجهات النظر مع الاخرين وغالبا ما بيبقي متردد في اتخاذ القرارات، اما الحمل فهو على العكس فبياخد قررت بسرعة و بيكون وجهة نظر قوية واضحة وبيتمسك بيها واحيانا بيكون متعصب لها ورافض انه يسمع وجهات نظر الاخرين، غالبا انطبعاتهم عن بعض مش بتبقى كويسة يعني الحمل بيشوف الميزان ضعيف ومتردد والميزان بيشوف الحمل اناني ومغرور، العلاقة بينهم محتاجة تفاهم وتقدير واحترام كبير عشان تنجح، وغالبا الميزان بيبذل مجهود اكبر ويقدم تنازلات اكتر لانجاح العلاقة دي عن المجهود اللي بيبذله الحمل.

نوع العلاقة: مليانة مشاعر متناقضة كل واحد منكم بيشوف التاني جذاب ومثير للاهتمام ومحبط ومختلف في نفس الوقت، العلاقة محتاجة مجهود كبير وتفاهم وتنازلات منكم انتو الاتنين عشان تنجح.

8- برج الحمل والعقرب:

الطرفين بيتصفوا بالعند والشغف وعندهم رغبة قوية في انهم يعيشوا حياتهم باستمتاع وهما الاتنين بيحبوا في بعض الطبيعة دي، والحياة بينهم مليان اثارة ومشاعر قوية، لكن احيانا بتحصل بينهم خناقات ومشاكل قوية غالبا بعد ما بتنتهي الحمل بينساها وكأنها محصلتش في حين ان العقرب بيفضل فاكرها جدا وبتفضل مأثرة فيه وبيفتكر اي غلطة بيعملها الحمل حتى لو من غير قصد بزعل واستياء لفترات طويلة. كمان العقرب بيحب يحس انه قريب من شريكة ويحس برابط قوي معاه وده بيبقي على عكس طبيعة الحمل المحب أكتر للاستقلال والحرية.

نوع العلاقة: الشخصيات متناقضة بس بينهم قوة انجذاب قوية جدا، مع شوية تفاهم ومجهود بتكون علاقة ناجحة جدا.

9- برج الحمل والقوس:

ﻋﻼﻗﺔ كلها حماس بتجمع ﺑﯿﻦ ﻣﻮاﻟﯿﺪ ﺑﺮﺟﯿﻦ ﻧﺎرﻳﯿﻦ و بتساعد على قدرتهم فى ﺗﺤﺪي مشكلات الحياة. عندهم احساس المغامرة, بيبقوا على طبيعتهم تماما مع بعض, الاتنين يحبوا الاندفاع والانطلاق والحماسة وبيحبوا الموضوع ده في بعض جدا لأنه مش بيدفعهم لتغير طبعهم والتقليل من سرعة تصرفاتهم زي ما بيحصل مع شخصيات تانية، الحمل بيحب شوية موضوع المنافسة والتحدي لكن القوس أكتر هدوء وصبور أكتر من الحمل.

نوع العلاقة: علاقة قوية جدا لأنكم بتتشاركوا طريقة المشاعر والتفكير، متشابهين اوي لدرجة التفاهم والانسجام وفي شوية اختلاف بيخلق شعور جميل بالاثارة.

10- برج الحمل والجدي:

الاتنين عندهم نشاط وطموحين، بس الحمل بيميل اكتر لأنه يكون معتمد على نفسه ومستقل ومبتكر، لكن الجدي بيفضل الخطط الموضوعة بعناية ، الاستقرار والطريق الواضح للنجاح، الحمل بيحس بانه مقيد جدا وومستغل من التقاليد الاجتماعية وبيئة الشغل والجداول والمواعيد بعكس الجدي اللي يحب يشتغل في بيئة منظمة وتقاليد اجتماعية ومواعيد مترتبة بعناية، الحمل ممكن يعلم الجدي شوية حماس وشجاعة وتفاؤل، والجدي ممكن يعلم الحمل ازاي ينظم وقته وطاقته الكبيرة.

نوع العلاقة: عرضة للخلافات المتكررة، صعب اوي تتفهموا طريقة بعض في التفكير والتعبير عن مشاعركم، الموضوع محتاج تحدي ومثابرة ومجهود كبير.

11- برج الحمل والدلو:

هما الاتنين شخصيات مستقلة جدا وعلاقتهم دايما مزدهرة لان فيهم ميزة جميلة انهم بيعرفوا يحلوا المشاكل بطريقة واقعية وفيها تفكير ونظام . هما الاتنين مش بيحبوا يتقيدوا بأى تقاليد و دايما بيدوروا على حريتهم و بيفصلوا تفكيرهم تماما وتصرفاتهم عن اى حاجة المجتمع بيفرضها عليهم . الحمل يعتبر شخصية مبدعة اكثر من الدلو والدلو شخصيته اجتماعية اكتر.

نوع العلاقة: فيه بينكم تناغم واتفاق قوي وتفاهم كافي. من السهل عليكم انكم تنجحوا مع بعض.

12- برج الحمل والحوت:

الحمل واثق من نفسه ومباشر وشخصيتة بسيطة مقارنة بالحوت, العلاقة ممكن تكون موزونة عشان احتياج الاتنين لبعض, الحمل بيعتمد على حساسية ورقة الحوت لما يكون محتاج ملاذ من وقت للتاني انه يرتاح من المنافسة اللي على طول بيبقي عايش فيها, والحوت بيعجب قوي بحماس الحمل وجرأته وصراحته.

الحوت عنده قدره العطاء وانكار النفس عالية على عكس الحمل اللي ممكن من غير قصد يلاقي نفسه بيستغل كرم الحوت, الحمل اوقات صراحته الزياده ممكن يقول حاجات تضايق الحمل وده بيبقي من غير قصده تماما. 

نوع العلاقة: التفاهم مابينكم صعب إلى حد ما, وفيه احتمال انه يحصل مابينكم اختلافات كبيره, العلاقة محتاجه مجهود جامد من الطرفين عشان تنجح وتكمل.

في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…

اقروا كمان المحاربة الشغوفة انثى الحمل

المتفائل عاشق التحدي: رجل برج الحمل