توافق برج الأسد مع باقي الأبراج

بقلمسارة جمال فيبرج الاسد visibility130107

واثق في نفسه, فخور, عنده عزه وكبرياء, يعشق الحياة.. شخصية مغناطيسية بيقدر ينال حب وأعجاب الناس بسهولة بالغة, جايبنلكم  معلومات هتحبوا تعرفوها عن مدى توافق برج الأسد مع الأبراج الثانية…

الأسد مع الأبراج التانية من أنجح علاقاته بتكون مع (القوس, الحمل, الميزان و الجوزاء) ومن أصعبهم واللي بتكون محتاجة شغل وصبر عشان تنجح (الثور والعقرب).

توافق برج الأسد
توافق برج الأسد

1- برج الأسد والحمل:

الأسد والحمل بيتشاركوا في انهم شخصيات مستقلة, مبدعين جدا وتلاقيهم دايما عندهم حماسة ناحية فكرة أو مشروع معين, فيه بينهم انسجام وتوافق قوي في ميولهم واهتمامتهم, الحمل ممكن يكون اقل اجتماعية شوية من الأسد ومش بيهتم قوي بشكله وإن ينال اعجاب الناس زي الاسد, عشان كده ممكن تلاقيه بيقول رأيه بصراحة أكتر حتي لو هيضايق الناس, على عكس الأسد المجامل دايما اللي بيحب التجمعات ويحب انه يلاطف ويجامل الناس اللي حواليه.

انتوا الاتنين عندكم فخر وكبرياء في شخصيتكم وبتبحوا تكونوا الشخص القائد في العلاقة, وده ممكن يسبب مابينكم بعض المشاكل… ولما بتحصل خناقة أو شد دايما الموضوع بيقلب معاكم دراما بزيادة..

نوع العلاقة: عندكم تناغم وتعاون وفيه بينكم حاجات كتيرة مشتركة, بتقدروا بعض ومن السهل جدا انكم تنجحوا مع بعض عاطفيا. 

اقروا مواصفات برج الحمل

2- برج الأسد والثور:

هما الاتنين عندهم قوة ارادة عالية وعند شديد و لما بيكرسوا حياتهم لشخص, مستحيل يسيبوه و ده بيقوى من علاقتهم مع شريكهم لانهم بيكونوا مخلصين جدا لبعض وحريصين على انهم يحافظوا على العلاقة دى بحلوها و مرها . ساعات اهتمامتهم بتكون مش زى بعض و ده بيسبب بعض المشاكل مثلا الأسد اجتماعى أكتر من الثور و بيحب أكتر الخروج والمخاطرة علي عكس الثور اللي بيفضل أكتر الهدوء والبيت. علاقتكم فيها ترابط قوى وعارفين كويس انكم تقدروا تعتمدوا على بعض, انتوا الاتنين مش بتحبوا التغيير لدرجة انه حتي لو بقيتوا مش مرتاحين مع بعض, انتوا صعب جدا عليكم انكم تقروا انكم تسيبوا بعض وتبدأوا من الأول مع أشخاص تانيين. 

نوع العلاقة: فى تناقضات كثير بين ميولكم و شخصياتكم و ده بيسبب مشاكل كثير و خلافات بسبب اختلاف طبيعتكم.

اقروا مواصفات برج الثور

3- برج الأسد والجوزاء:

هما الاتنين بيبحوا الحياه, المرح, الاستكشاف والمغامرة وده بيبقي باين قوي وهم مع بعض, بيحبوا الدراما ” الافوره يعني :) ” وبيحبوا الألوان. الجوزاء مفكر أكتر من الأسد, والأسد بيبقي عايز يكون اهم شيء في حياة الجوزاء بغض النظرعن كل علاقات ونشاطات الجوزاء, الأسد عنده ولاء قوي جدا وبمجرد إنه يلاقي حد بيحبه أو يرتاح ليه الأسد عمره مابيسيبه.. وده صفه على عكس الجوزاء شوية اللي بيحب التغير والتجديد, الأسد مش بيفهم ولا بيقدر الحته ده في شخصية الجوزاء.

نوع العلاقة: الأسد والجوزاء ينفعوا أصحاب أقويه جدا, فيه بينهم تناغم واتفاق ولو حبوا بعض يقدروا يكونوا عشاق متوافقين جدا.

اقروا مواصفات برج الجوزاء

4- برج الأسد والسرطان:

هما الأتنين بياخدوا الحياه بمحمل شخصي جدا, يمكن أكتر ما هما متخيلين, مشاعرهم وكبريائهم سهل قوي إنها تنجرح من نقد أو عدم تقديير من الناس اللي حواليهم.

فيه بينهم ارتباط وتفهم ودفء, على الرغم من إن انهم مختلفين إلى حد ما, الأسد فخور جدا بنفسه وبيحب يحس انه متقدر وشريكه بيحترمه ويحبه, والسرطان  بيحب يحس إن شريكه محتاجه وبيدعمه معنويا وعاطفيا.

الأسد عنده صعوبه انه يتقبل المشاعر السلبية, الحزن, الضعف أو الأحتياج والمشاعر ديه كتير بيحس بيها السرطان.

الأسد مهيمن أكتر من السرطان وبيحب يبقي هو المسيطر في العلاقة, وده متماشي قوي مع السرطان اللي مش بيفرق معاه ومش بيحب انه يكون هو الشخص المسيطر. 

نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, والموضوع محتاج شوية مجهود.

اقروا مواصفات برج السرطان 

5- برج الأسد والأسد:

فخورين… نابضين بالحياة… كلهم حيوية ودفء, بيحبوا يبقوا في مركز اهتمام اللي حواليهم, هما الاتنين بيحبوا يبقوا الشخص المسيطر في العلاقة, بس في علاقتهم مع بعض مفيش واحد فيهم هيسمح إن التاني يسيطر عليه, عشان كده عشان ينجحوا العلاقة هما لازم يتعاونوا ويتفاهموا مع بعض.. 

العلاقة ما بينهم يا إما بتبقي علاقة استثنائية وفي منتهي السعادة والحب يا إما بتبقي علاقة كارثية, مفيش وسط…هما الاتنين عندهم ولاء علي قوي, بس لازم يكون فيه احترام متبادل, لو حصل إن حد فيهم حس إن التاني مش امين أونزية أو دخل معاه في منافسة أو مكنش بيديله احساس التقدير اللي الأسد بيبقي دايما مستنية من شريكة, يبقي العلاقة وقتها بتدهور وبتتحول لكره شديد…

نوع العلاقة: قوية جدا! لأنكم بتبقوا فاهمين بعض كويس قوي كأنه كتاب مفتوح…والعلاقة محتاجه شوية تنازلات من الطرفين.

اقروا مواصفات برج الأسد

6- الأسد والعذراء:

علاقة مختلفة تماما! العذراء خجول, متواضع, مبيحبش الأضواء وانه يبقي مركز اهتمام الناس على عكس الأسد جدا اللي بيسعي لنوال اعجاب الناس, وتقديرهم وانه يبقي محور كلامهم واهتمامهم, العذراء مش بيعرف يبين مشاعرة وعاطفته زي الأسد وده بيخليه مش قادر يدي الأسد المشاعر اللي بيبقي الأسد مستنيها من شريكه.

العذراء دقيق وبيحب إن كل حاجة حواليه تبقي كاملة! عنده عين النقد الحادة, وده غالبا بتبقي كارثة لما بيجي يتعامل مع الأسد! لأن الأسد حساس للغاية من موضوع النقد, بياخد الموضوع شخصي وكأن العذراء قاصد يحطمه أو يضايقه…العذراء بيحب يحلل كل كلمة وكل حركة ودق حاجة بتجنن الأسد انه يحس انه بقي موضع اختبار وتحليل للعذراء.. مشكلة تانية ممكن تحصل إن الأسد اوقات ممكن يستغل الحس المتفاني اللي العذراء بيقدمه في مساعدة الاخرين.

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, وفيه أحتمال كبير للمشاكل مابينكم.

اقروا مواصفات برج العذراء

7- برج الأسد والميزان:

علاقة كلها دفء وولاء.. هما الاتنين رومانسيين جدا وبيحبوا الحب واحساس انهم يكونوا في علاقة حب, بيحبوا قوي الحركات الرومانسية, عشا, هدايا, ورد.. كل الحاجات ديه, هما الاتنين بيهتموا بموضوع المظهر واللبس وبيحبوا يبانوا في ابهي حالتهم.

الأسد حاسم أكتر من الميزان, وعارف ومحدد هو بيحب إيه وبيكره ايه, الميزان مرن شوية في المسائل ديه وممكن يضحي بسماحة عشان يسعد الأسد وينفذله اللي نفسه فيه, من بين الاتنين الأسد ممكن يكون الشخصية الأقوى والكاسحة أكتر, بس بما إن الميزان عنده إحساس المساواه والعدل علي قوي فممكن في بعد الاوقات يعترض على طريقة الأسد المتكبرة لو زادت عن حدها.

نوع العلاقة: علاقة مثيره وناجحة , بينكم تفاهم قوي وكافي وبينكم اختلاف بيجذبكم لبعض ويخلي علاقتكم كلها اثارة. 

اقروا مواصفات برج الميزان 

8- برج الأسد والعقرب:

هما الاتنين عندهم كبرياء, عند وارادة قوية, ممكن ينجذبوا لشخصياتهم القوية, بس الموضوع ده ممكن يعمل مابينهم مشاكل كبيرة جدا في علاقتكم على المدي الطويل, عنادهم والصلابة اللي في شخصيتهم هتخليهم مش قادرين يوصلوا لقرار يرضي جميع الاطراف, مفيش حد فيهم بيبقي عايز يضحي أو يتنازل عشان التاني وبيفضلوا في الحرب ده كتير وبيعتمدوا سياسة النفس الطويل…

مشكلة كمان ممكن تظهر هي موضوع الغيرة, العقرب شخص عنده ولاء قوي ولما بيقع في الحب بيبقي مرتبط جدا بشريكة, وممكن ميقدرش يستحمل الجزء الإجتماعي الزيادة اللي عند الأسد مع إن الأسد برده عنده ولاء لكن العقرب وقتها مش بيقدر يفهم أو يستوعب ده وبيتغلب عليه بس شعور الغيره… 

نوع العلاقة: التفاهم مابينكم صعب إلى حد ما, وفيه احتمال انه يحصل مابينكم اختلافات كبيره, العلاقة محتاجه مجهود جامد من الطرفين عشان تنجح وتكمل.

اقروا مواصفات برج العقرب 

9- برج الأسد والقوس:

ﻋﻼﻗﺔ دافئة  كلها حماس وحيوية ومرح بين البرجين دول, كلها سعادة لما بيبقوا مع بعض, فيه بينهم جاذبية قوية, القوس بيعرف يظهر الجانب المشرق المرح اللي عند الأسد  وبيديله الأفكار والتجارب الجديدة وده شيء بيسعد الأسد جدا ويحمسه في الحياة. علاقتهم بيقضوا فيها اوقات حلوة, مرحة وكلها نشاط مع بعض.
 اﻟﺘﻮﺗﺮ ﻓﻲ اﻟﻌﻼﻗﺔ  دى ﺳﺒﺒﻪ اﻻﺳﺎﺳﻲ إن برج القوس مش بيهتم قوي بمشاعر اللي حواليه وصراحته الزيادة ده ممكن تخليه يقول تعليقات حادة للأسد اللي ممكن ينجرح بسهولة. 
  نوع العلاقة: ناجحة ومثيره وفيها تفاهم ومرونه وتقدير.

 10- برج الأسد والجدي:

أكتر تحفظا, أكتر واقعية, ده برج الجدي, طبيعة تختلف كتير مع الأسد الحماسي, اللي كله دفء وحيوية..حتي في ذوقهم الشخصي هتلاقي اختلاف واضح, الجدي ذوقه أكتر كلاسيك, أنيق, ويعشق البساطة, الأسد هتلاقيه بيحب الألوان, علي الموضة وميحبش حد يبقي لابس نفس ستايله, ده ممكن يكون بيعبر عن شخصيتهم الداخليه برده, الجدي أكتر حرص وهدوء, أقل اندفاع ويحب يبقي متأكد من أي قرار قبل مايخده, الأسد أكتر تفتحا, عنده قدرة اكبر على التعبير عن مشاعرة وبيحتاج لوفرة من المشاعر والتقدير من الشريك وده شيء الجدي مش بيقدر يوفرهوله..

الحاجة المشتركة مابينهم, هما الاتنين ملتزمين قوي وعندهم ولاء ووفاء لشريك حياتهم..

نوع العلاقة: متناقضين ومختلفين, صعب انكم تقتنعوا بشخصية بعض, وقدامكم تحدي كبير عشان تقدروا تنجحوا العلاقة ديه.

11- برج الأسد والدلو:

الدلو بينجذب جدا للاسد لانه بيلاقى فيه الدفء والحيوية اما لاسد فبيتشد جدا للدلو لانه بيشوف فيه شخصية مميزة جدا ومفيش زيها وفى ذكائها. على الرغم من ان الدلو عنده دايره اصحاب و زمائل شغل و معارف كبرة جدا الا انه مش بيقدر يكون صداقات حميمة زى الاسد اللى بيهمه جدا الموضوع ده انه يكون ليه صديق او اتنين قريبين.  الاسد بيشوف الدلو دايما هادى و بارد و الدلو بيشوف ان الاسد بيحب يعيش في دراما طول الوقت ويكبر المواضيع و بياخد كل مشكلة بحساسية عالية. هما الاتنين مختلفين جدا بس ممكن يستفيدوا من اختلافات ورؤي بعض.

نوع العلاقة: متناقضين ومختلفين, صعب انكم تقتنعوا بشخصية بعض, بس لو حصل ما بينكم انجذاب بيكون قوي وبتقدروا تغيروا وتأثروا في شخصيات بعض.

اقروا مواصفات برج الدلو

12- برج الأسد والحوت:

الفرق الأساسي ما بينهم إن الحوت مش عنده شعور الفخر بالنفس, الطموح وانه يكون مميز والناس مهتمة بيه, الحوت عمره ماهيدخل منافسة مع الأسد وعمره ماهيحب انه يبقي في دايرة الضوء على عكس الأسد طبعا.

الحوت رقيق, طيب وأكترعاطفية وحساسية في العلاقات, الحوت بيتعامل أكتر بالاشارات والاحاسيس أكتر من الكلام المباشر وده بيخليه غامض وغير مفهوم بالنسبه للأسد الواضح المباشر اللي لما شريكه يعوز منه حاجة, الافضل انه يطلبها بوضوح وصراحة. 

اخر حاجة هي إن الأسد ممكن وبمنتهي السهولة يسيطر على مشاعر الحوت, وده ممكن يؤدي لتعاسة الحوت في النهاية…

نوع العلاقة: علاقة صعبة جدا واختلاف كبير! لازم مجهود جامد ومحاوله للتغيير والمرونه من الطرفين.

اقروا مواصفات برج الحوت

في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…

اقروا كمان الملكة الفاتنة: انثى برج الأسد

 القائد الواثق: رجل برج الأسد

توافق برج الأسد مع باقي الأبراج

أهم 5 أسباب لجاذبية برج الأسد!

أيه هي عيوب برج الأسد؟!

إزاي تكسب قلب انثى الأسد؟

إزاي تكسبي قلب رجل برج الأسد؟