طريقة استعمال السشوار فى البيت

ساعات كثير بيكون مفيش وقت نروح للكوافير وبنبقي زهقانين قوي من المشوار ده اللي بنضيع فيه وقت كتير, او شعرنا بيبوظ بسرعة من الحر وبنحتاج نغسله ونعمله كذا مرة و كمان فترة الصبح واحنا رايحين الشغل بنكون عايزين شكلنا يكون جميل وشعرنا مظبوط من غير وقت ولا مجهود كبير. بنات حوا جايبلكم خطوات بسيطة  إزاي ممكن نستخدم السشوار لتسريح شعرنا في البيت و فرده و مش هتاخد مننا وقت خالص تعالوا نشوف الخطوات دى و نجربها و اكيد هتساعدنا كثير …

طريقة استعمال السشوار فى البيت:

أهم حاجة الادوات اللى هنستعملها

1- فرشة رول مقبضه خشب كبير الحجم للشعر

2- فرشة رول مقبضه خشب صغير الحجم للقصة

3 -فرشة رول مقبضه خشب صغير كثير للشعيرات الصغيرة

4- مشط ابو اسنان متباعده.

5 – سشوار ذو قوه كبيره 2500 واط

6-سيروم

7- كليبس للشعر

يللا نشوف الطريقه..

1- بعد ما غسلتي شعرك نشفيه بالفوطه كويس وخليه يشم شوية هواء ولما يكون نصف ناشف هنحطله السيروم من الجدور الى الاطراف و بعدين تسرحيه.

2- اقسمي الشعر لاربع اقسام اعملي فرق في النص يعني نص الراس وبعدين اقسمي بالعرض القسمين عشان يكون على شكل + ولمي القسم لي على اليمين فوق ودوريه وحطي الكليبس عليه والشمال فوق نفس الطريقة ويمين تحت والشمال تحت نفس الطريقة.

3- وخذي خصلة من الجزء الاول الي على اليمين تحت وسرحيه بمشط ابو اسنان علشان تفكى الشعر بعدين خدي الفرشة الكبيرة وابدئي عملية السشوار جزء بجزء ودوري الفرشة اعمليها مره مرتين ثلاث ومتلزقيش الفرشة الرول بالسشوار لانه بيحرق الفرشة.

4- اعملي نفس الطريقه في الجزء الشمال لتحت.. وبعد ما تخلصي  اعملى جزء اليمين فوق وبعد ما تخلصي اعملى جزء الشمال فوق.. 5- وقبل ما تخلصى اعملي نفس الطريقة للقصه لكن بالرول الصغير..ولو عندك شعريات زائدة وخشنة فوق الجبهة سشوريها بالرول الصغير جدا.

6- وفي النهاية لو كان شعرك جاف جدا هتحطى من السيروم قليل جدا وتوزعي على كل الشعر وتسرحيه بالمشط ابو اسنان عريضة من فوق لتحت مع السشوار.

سر نهائى لو عايزة الشعر الحرير لمي الشعر واربطيه وهو لسه سخن بعد السشوار وبعد نصف ساعه فكيه وشوفي النتيجة, ولو عايزه فيه تموجات جربي تلميه على شكل كحكه وسيبه للصبح ولما تفكيه هتلاقي شعرك عامل تموجات وشكلها طبيعي ورائع.