طريقة عمل بسكويت بالمربى وغريبة للعيد
عيد الفطر بيجي بفرحة كبيرة ولمة الاحباب والزيارات العائلية وكل الطقوس الاسرية الجميلة وفي وسط كل ده في ضيوف اساسين كل سنة بنلاقيهم في كل بيت هما حلاويات العيد، اكيد الكحك هو الاساس لكن مانقدرس كمان مانتكلمش عن البسكويت والغريبة اللي بيعتبروا من الاساسيات، والنهاردة احنا جبنالكم موضوع حلو اوي عن طريقة عمل بسكويت بالمربى وغريبة وكل سنة وانتم طيبين
اولا طريقة عمل بسكويت بالمربى
المقادير
- 3 كوبايات دقيق
- ملعقة صغيرة بيكنج بودر
- رشة ملح
- كوباية زبدة طرية
- كوباية سكر بودرة
- بيضتين
- كيس فانيليا
- مربى النوع اللي تحبيه (وممكن تستبدليه بشيكولاتة سايحة)
طريقة التحضير
- انخلي الدقيق والبكينج بودر والملح مع بعض
- في وعاء غويط اضربي الزبدة مع السكر لغاية ما تبقى كريمة خالص
- حطي الفانيليا وبعدين اول بيضة واضربي لغاية ماتختفي، حطي البيضة التانية واول ما تندمج طفي المضرب (لو المضرب مش متوفر ممكن تستخدمي الخلاط)
- دلوقتي بقى ابدأي في اضافة الدقيق والتقليب بالمعلقة الخشب
- اول ما تلاقي العجينة اتكورت معاكي اتأكدي ان المكونات كلها مندمجة مع بعض
- حطيها في كيس نايلون وسيبيها في التلاجة على الاقل ربع ساعة
التشكيل والخبيز
- دلوقتي حتجيبي الصينية وامسحيها بالسمنة خفيف جدا جدا عشان ما تحرقش البسكويت ولو الصينية تيفال بلاش تدهنيها اصلا
- افردي العجين بالنشابة لغاية ما يبقى سمك نص سنتيمتر تقريبا
- اقطعي العجين بالشكل اللي يعجبك
- خدي نص كمية العجين اللي قطعتيها واعملي في نصها تقطيعة تانية بقطاعة اصغر سواء بنفس الشكل او بشكل تاني يعني ممكن البسكوتة مدورة والتجويف على شكل قلب او العكس
- حطيهم في الصينية وسيبي بينهم مسافات شوية
- اخبزي على درجة حرارة 200 لمدة عشر دقايق وخلي بالك بلاش تزودي السوا عشان ما ينشفش، اول ما تلاقيه مسك في بعضه ولون طلعية على طول
- بعد ما يبرد خالص حطي على البسكويتة الكاملة طبقة من المربى او الشيكولاتة وبعدين حطي فوقها البسكويتة اللي فيها تجويف
ثانيا طريقة عمل الغريبة:
المقادير
- 2 ونص كوباية دقيق
- كوباية زبدة بدرجة حرارة الغرفة
- نصف كوباية سكر بودرة
- كيس فانيليا
طريقة التحضير
- اضربي الزبدة مع السكر والفانيليا كويس اوي
- لما يبقى شكلها زي الكريمة خالص ابدأي في اضافة الدقيق واحدة واحدة
- قلبي بالمعلقة الخشب لغاية ما الدقيق يختفي وبعدين حطي دقيق تاني
- كرري العملية لغاية ما تخلصي كمية الدقيق
- اعجنيها في بعض كويس بس ما تطوليش عشان الزبدة حتسيح وتخلي العجينة تفك
- حطيها في كيس نايلون وسيبيها ساعة في التلاجة عشان الزبدة تجمد تاني
- حضري الصينية ويا ريت تكون تيفال من غير ماتدهنيها او لو حندهن يبقى خفيف جدا
- شكلي الغريبة في شكل كور صغيرة وحطي على كل واحدة لوزة او واحدة سوداني او صنوبر
- دخلي الفرن على درجة 160 او 180(حرارة متوسطة) لمدة ربع ساعة
