7 طرق للتخفيف من آلام الدورة الشهرية

يسرا خالد

في

9378

معظم البنات و السيدات بيعانوا من تقلصات و آلام فترة الدورة الشهرية ، و بيلجأوا بسرعة للمسكنات عشان يخلصوا نفسهم من الوجع اللى ممكن يعطلهم عن نشاطات كثيرة فى حياتهم . بس دى مش حاجة صحية لأن استعمال المسكنات كثير له تأثير ضار جدا على المدى الطويل و بعد فترة الجسم بيتعود عليه و بتلاقى نفسنا مش عارفين نعمل ايه . بنات حوا جايبالكم خطوات بسيطة جدا لو عملتوها هتساعد فى تقليل الوجع ده بنسبة كبيرة و عن تجربة ..تعالوا نقرأها سوا…

1- الرياضة:

تعتبر الحل السحرى اللى لازم كلنا نجربه قبل ميعاد الدورة الشهرية لانها بتحافظ على صحة الدورة الدموية و بتقلل من مزاجك و مودك الملخبط وقتها و كمان بتريحك من التقلصات . اهم انواع الرياضة هى تمارين البطن المختلفة و تمارين الظهر و اسهلهم هو المشى.

2- زيت اللافندر:

الزيت ده رائع و مناسب جدا للفترة دى لان وقتها بتكون الاوعية الدموية فى الرحم منقبضة و ده بيسببلك وجع بس الزيت ده لو استعملتيه فى تدليك البطن او الظهر بمساج خفيف هيساعد انه يهدى الاوعية دى و يفك العضلات المشدودة . ممكن تلاقيه متوفر عند اى عطارة .

3- بلاش كافيين:

البعد عن الأكل الحراق و المخللات و كمان المشروبات اللى فيها الكافيين زى القهوة و النسكافيه و الشاي كمان و المشروبات الباردة اللى بتصعب جدا من نزول الدورة و ده بيسببلك وجع اكثر . ممكن وقتها تشربى البابونج اللى بيقلل من التوتر و الصداع و كمان زيه الكراوية و الحلبة و البردقوش.

4- الموز:

الموز له فوائد رائعة للجسم لأنه يعتبر مسكن طبيعى مليان بالبوتاسيوم اللى بيقلل جدا من الانقباضات المؤلمة.

5- متحرميش نفسك من النوم:

من أهم اسباب آلام الدورة الشهرية هوانه ميكونش فيه عدد ساعات النوم الكافية، عشان كده حاولى قبل الدورة الشهرية انك تنامى لمدة 8 ساعات متواصلة، ده هيقلل جدا من الآلام المختلفة اللى بتحصل نتيجة لإرهاق الجسم.

6- مصادر الأوميجا 3 المختلفة:

متترديش فى إدخال مصادر حمض الأوميجا 3 فى اكلك، زى أسماك التونة والسالمون، لأن الخبراء اكدوا فعاليته فى التخفيف من آلام الدورة الشهرية . ممكن كمان تلاقيه متوفر كأقراص فى الصيدلية زى فيتامينات و مفيد كمان عشان شعرك و جلدك.

7- قربة المياه السخنة:

هنستعملها أسفل البطن زى حمام سخن، لانها بتساعد جدا فى تخفيف الوجع لان الحرارة اللى فيها بتفك شد العضلات . حطى المياه السخنة فى القربة و لفى حوليها فوطة خفيفة عشان الحرارة و استعمليها لمدة 10 دقائق.