5 وصفات طبيعية لتفتيح الابطين في وقت سريع

أنجي سليمان
أنجي سليمان
في
بشرة
31183

اسمرار منطقة الابطين من المشكلات اللي بتواجه بنات كتير، والمشكلة دي اسبابها كتير، اهمها استخدام الكريم او الحلاقة في ازالة الشعر الزائد من منطقة الابطين، واستخدام مزيل العرق بكثرة، ومهما كانت الاسباب لكن كلنا بندور على العلاج عشان كده بنات حوا جابتلك 5 وصفات طبيعية لتفتيح الابطين تقدري تعمليهم في البيت بمكونات سهلة ومتوفرة

وصفات طبيعية لتفتيح الابطين اختاري منها اللي يعجبك

1- الزبادي والحمص

الوصفة دي بيظهر اثرها من اول مرة، لكن لو لقيتي انك محتاجة تكرريها يبقى تعملي كده يوم بعد يوم لغاية اول اسبوع وساعتها حتلاقي لون الجلد بقى طبيعي

مكونات الوصفة

  • معلقة كبيرة من حمص الشام تطحنيها في مطحنة التوابل لغاية ما تبقى بودرة
  • معلقة صغيرة من الزبادي
  • معلقة صغيرة من عصير الليمون
  • ربع معلقة صغيرة من بودرة الكركم

الطريقة

  • اخلطي المكونات مع بعض لغاية ما يبقى شبه المعجون السميك
  • حطي طبقة كثيفة على منطقة الابطين
  • سيبيها لمده نص ساعة وبعدين اشطفيها بالماية الفاترة

وزي ما اتفقنا قبل كده الوصفة دي بيظهر اثرها من اول مرة بس ممكن تكرارها

2- الارز والخل الابيض

دي كمان من الوصفات الفعالة بس اثرها مش بس في التفتيح اثرها كمان في شد الترهلات والجلد

مكونات الوصفة

  • معلقتين من الارز العادي واطحنيهم في مطحنة التوابل لغاية ما يبقوا بودرة
  • معلقة كبيرة من الخل الابيض

طريقة الاستخدام

  • اخلط الارز مع الخل لغاية ما يبقى معجون كثيف
  • بعد الاستحمام جيدا حطي طبقة كثيفة من المعجون
  • سيبيه ربع ساعة او اكتر لغاية ما ينشف
  • اغسلي الابطين كويس

المميز في الوصفة دي انها بتقضي على البكتريا وبتقشر الجلد الميت وبالتالي بتقلل جدا من رائحة العرق

3- قشر البرتقال

دي كمان واحدة من الوصفات السريعة جدا اللي بيظهر اثرها من اول الاستخدام، لكن لو احتاجتي تكرريها ممكن تكرريها يوميا

مكونات الوصفة

  • معلقتين كبار قشر برتقالة متجفف في الفرن (قشري البرتقالة وخدي القشر بتاعها في صينية وسيبيه في الفرن لغاية ما يتحمص ويجف ويتخلص من الماية اللي فيها)
  • معلقة صغيرة ماء ورد
  • معلقة كبيرة حليب

طريقة الاستخدام

  • اخلطي المكونات الجافة والسائلة مع بعض لغاية ما تحصلي على معجون
  • بعد الاستحمام دلكي منطقة الابطين بالوصفة لمدة خمس دقايق
  • حطي طبقة كثيفة وسيبيها عشر دقايق الى ربع ساعة
  • اغسلي المنطقة بالماية الباردة

كرري الوصفة عند الحاجة

وصفات طبيعية لتفتيح الابطين
وصفات طبيعية لتفتيح الابطين

4- وصفة الخيار والليمون

الوصفة دي سهلة جدا وفعالة في ازالة البقع والكلف واثار الحبوب وممكن تستخدميها في اكتر من مكان مش بس منطقة الابطين

المكونات

  • ثمرة خيار حطيها في الكبة مع معلقة ماية واطحنيها كويس اوي وبعدين صفي العصير بتاعها بالمصفاة الضيقة او قطعة شاش واحتفظي بالعصير ده هو اللي حنستخدمه
  • معلقة صغيرة من عصير الليمون
  • ربع معلقة صغيرة من بودرة الكركم

طريقة الاستخدام

  • اخلطي المكونات مع بعض كويس وحطي منها على منطقة الابطين لمدة خمس دقايق
  • هاتي قطعتين كبا من القطن الطبي في حجم كف اليد تقريبا واغمسيهم في الخليط بحيث انهم يتشربوا منه كويس
  • افردي القطن المغموس في الخليط على المنطقة بالكامل وسيبيهم لمدة تلت ساعة
  • اشطفي المنطقة كويس بالماية الفاترة
  • ملحوظة: التفل اللي اتبقى من الخيار اخلطي معاه معلقة كبيرة من ماء الورد او من الحليب وعصرة ليمون ومعلقة صغيرة عسل نحل وحطيه على وشك زي الماسك وسيبيه ربع ساعة، حينعش بشرتك ويفتحها جدا

الوصفة دي من الوصفات المنعشة وممكن تكرريها يوميا لغاية ما تحصلي على النتيجة المرغوبة سواء في منطقة الابطين او اي منطقة اخرى فيها اسمرار

5- وصفة الكربوناتو

دي اسهل واسرع وصفة في الوصفات كلها ولها تأثير سريع مش بس في تبييض الابطين لأ كمان في انها بتقضي على الجراثيم والبكتريا المسببة لرائحة العرق بالاضافة الى انها كمان بتشيل الجلد الميت اللي بيسد المسام ويسبب البثور

المكونات

  • معلقتين كبار كربوناتو
  • معلقة كبيرة من ماء الورد

طريقة التحضير

  • اخلطي المكونات سوا وكوني عجينة.
  • حطي العجينة على المنطقة ودلكيه كويس عشان يقشر الجلد الميت
  • سيبيه خمس دقايق بس واشطفيه بماية دافية
  • حُطي كريم مرطب

كرري الوصفة يوم بعد يوم عند الحاجة

ولو عايزة تعرفي وصفات لتفتيح وتبييض البشرة في خلال اسبوع واحد بس دوسي هنـــا

مقالات متعلقه

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير