إزاى تنظمى وقتك بين البيت والشغل

بقلميسرا خالد فيمنوعات visibility1429

كثير من بنات حوا اللى بيشتغلوا بيعانوا من مشكلة انه مفيش وقت يعملوا فيه اى حاجة  لنفسهم او فى البيت و ان حياتهم فيها عدم نظام و فوضى و ده بيخليهم يحسوا انهم مش بينجزوا اى حاجة فى بيتهم و مرهقين و محبطين علاطول و مش عارفين يوازنوا بين البيت و الشغل و فى الآخر ممكن يضطروا انهم يسيبوا شغلهم و دى حاجة احنا مش هنخليها تحصل عشان ممكن جدا نكون ناجحين فى حياتنا العملية و كمان الخاصة بحل سهل و بسيط اسمه تنظيم الوقت.يللا نشوف إزاى فى السطور الجاية ..

تنظيم الوقت
تنظيم الوقت

1 – أول خطوة هي الورقة والقلم، اللى هيكونوا اصحاب ليكى و هيساعدوكى فى تنظيم وقتك  اقعدى لوحدك و اكتبى كل المسؤليات اللى عليكى ما بين مواعيد شغلك و مسؤلياتك فى البيت

2 – ابتدى في تخطيط يومك  بالوقت و الساعة ، من اول مواعيد صحيانك من النوم و كل حاجة بتعمليها لحد ما توصلى شغلك و لما ترجعى كمان  و مواعيد زوجك و رجوعه من الشغل و مواعيد الاولاد و ايام الاجازات . الخطوة دى مهمة عشان هتساعدك تحددى بالظبط ايه اكثر الحاجات اللى ممكن تاخد وقتك و ايه اكثر الحجات اللى بتضيعلك وقتك و مجهودك و مش لازم تعمليها كل يوم

3 – من الحجات اللى ممكن ترهقك جدا او تضيعلك وقت كثير انتى ممكن تكونى محتاجاه لنفسك او لراحتك و نومك هى المطبخ و الاكل . بنات حوا بتنصحك تحضرى قائمة بالاكل و الحجات اللى عايزة تشتريها من السوبرماركت لمدة اسبوع و الطلبات دى هتساعدك كمان تحضرى اكل بكميات تكفى يومين او تلاتة و ده هيقلل وقت وقوفك فى المطبخ طول الاسبوع

4 – اتعلمى تقولى لا و متحمليش نفسك فوق طاقتها . حاولى تبعدى عن المكالمات التليفونية الطويلة او الزيارات و الخروجات اللى بتكون فى وسط الاسبوع لانها بتزود من ارهاقك و بتخليكى مش نشيطة فى شغلك تانى يوم . ممكن الخروجات دى و الاجتماعيات نأجلها ليوم الاجازة لأنها بتضيع من وقتك و صحتك و حق بيتك و نفسك كثير .

5 – حددى اولوياتك كل يوم و شوفى ايه الحجات اللى لازم تتعمل و المهمة لان فى حجات ممكن تتعمل اسبوعيا و حجات لازم تتعمل كل يوم . الطريقة دى هتقلل من توترك و هتلاقى فى وقت فاضى كثير عندك لنفسك . مثال : مش لازم تنضفى البيت و تروقيه كل يوم و مش لازم توقفى فى مطبخك كل يوم .

6 – اتفقى مع اولادك يعملوا حجات بنفسهم زى مثلا يساعدوكى فى تحضير سندوتشات المدرسة او يرتبوا هدومهم او يحضروها و هاتيلهم دايما مكافأة او هدية عشان تشجعيهم . الطريقة دى هتشيل ضغط كبير من عليكى و هتعلمهم يعتمدوا على نفسهم

7 – بلاش تاخدى معاكى اى شغل للبيت . اى ورق او ملفات او حاجة عايزة تقرأيها خليها دايما فى وقت الشغل بلاش تأجلى او تأخرى حاجة عن وقتها  و دايما خلى وقت الشغل للشغل ووقت البيت ليكى و للبيت لانك هتحسى بأرهاق شديد و هتضطرى تفضلى سهرانة و ده طبعا هيأثر على نشاطك تانى يوم و مش هتكونى قادرة تعملى حاجة

لازم تعرفى ان اعداء النجاح هما قلة التركيز و التأجيل للحجات المهمة وانك تحطى لنفسك خطط غير واقعية ممكن توصلك للفشل . اهم حاجة عشان تنظمى وقتك انك تكونى متسامحة مع نفسك و مترهقيش نفسك و متعمليش كل حاجة فى نفس الوقت .