وسائل ازالة الشعر الزائد وازاي تختاري اللي يناسبك

أنجي سليمان
أنجي سليمان
في
بشرة
20682

البشرة النضرة الناعمة والخالية من الشعر الزائد بتدي احساس جميل بالخفة والنضافة والثقة في النفس، والشعر الزائد بيظهر في اكتر من مكان من الجسم وبختلف من ناحية كونه غزير او خفيف من شخص للتاني وكمان بيفرق طبيعة الجلد اذا كان حساس او لأ، عشان كده لازم تفكري كويس قبل ما تستخدمي وسائل ازالة الشعر الزائد ولازم تعرفي مميزات كل منها وعيوبها وهل حتكون مناسبة لبشرتك ولا لأ. 

مميزات وعيوب وسائل ازالة الشعر الزائد المختلفة

1- الحلاوة:

تقريبا هي الوسيلة الاشهر بين كل الوسايل التانية، عشان كده بنلاقي ان اكتر السيدات والفتيات بيستخدموها وتقريبا الحلاوة مالهاش اضرار كتيرة لكن هي ممكن تسبب شوية احمرار في الجلد بسبب الشد غير كده مالهاش لأنها كلها مواد طبيعية مش مضرة بالبشرة، اما من ناحية المميزات فهما ميزتين اساسيتين اولا الحلاوة بتشي الشعر كله حتى الخفيف او القصير عشان كده بتدي مظهر جميل للجلد، اما الميزة التانية فهي انها بتخلي الشعر ياخد وقت طويل جدا على ما يظهر مرة تانية تقريبا مفعولها بيستمر من شهر لغاية 6 اسابيع.

2- الشمع:

الوسيلة دي مكانتش مشهورة اوي في مصر لكن بدأت تظهر مؤخرا وفي ناس كتير بتعتمد عليها سواء في البيت او في صالونات التجميل، والشمع بيتوفر في شكلين الاول عبارة عن ورق جاهز تقريبا في عرض وطول نص صفحة كراسة، بيتسخن بين الكفين كده بالفرك وبعديت بيتفصل اتنين ويتحط على المكان اللي محتاجين نشيل منه الشعر ونسيبيه نص دقيقة وبعدين نشيله زي الحلاوة، والطريقة دي ميزتها انها سهلة وسريعة لكن عيبها انها مش بتقدر على الشعر الغزير والقوي يعني بتكون ممتازة مع شعر الذراعين والوش لكن الارجل والابطين ومنطقة البكيني مش فعالة اوي.

اما الشكل التاني للشمع فهو مكنة الشمع وده جهاز بيتحط فيه الشمع وبيتسخن شوية وبعدين بيتوزع بيه الشمع على المنطقة المراد ازالة الشعر منها وبيتيجي معاه شرايط مخصوص شبه القماش شوية بتتفرد عليه وتتساب شوية وبعدين تتنزع زي الحلاوة، الطريقة دي بتكون فعالة اكتر من الورق في المناطق اللي الشعر فيها غزير.

جهاز الشمع
جهاز الشمع

وفي كل الاحوال الشمع مش بيتشال بالماية ولكن بزيت الاطفال او بالزيت الخاص بيه بيكون معاه في العلبة في حالة الورق لكن لو حاولتي تشيليه بالماية حيلزق اكتر.

اما عيب الشمع الاساسي فهو أنه مش ملائم اوي للبشرة الحساسة غالبا الشعر قبل ما بيطلع بيطلع في شككل بثور حمراء صغيرة وبعدين بيطلع الشعر وده بيسبب احمرار ومظهر خشن للجلدن عشان كده لو بشرتك حساسة يستحسن تبعدي عن الوسيلة دي.

3- الكريم والاسبراي واللوسيون:

الوسائل التلاتة دول بيعتبروا الاشهربين الوسائل كلها وده لأنهم اسرع وسائل ازالة الشعر، لكن عيبهم الاساسي هو ان الشعر بيطلع مرة تانية بسرعة، اما العيب التاني فهو ان غالبا بيسبب اسمرار في منطقة ازالة الشعر لكن ده مش شرط لأنه مش كل السيدات بتعاني من نفس المشكلة اما العيب الاخير فهو ان الوسائل دي بتخلي الشعر يطلع خشن وقوي جدا عن الاول وكمان بيطلع بكثافة اكتر من الاول.

بالنسبة للكريم فهو اسرع وسيلة وبينفع في اغلب المناطق في الجسم، وبالنسبة للاسبراي فهو مناسب اكتر للذراعين والابطين عشان الكثافة بتاعة الشعر بتكون خفيفة، اما اللوسيون فهو بيكون مخصص لشعر الوش بس.

4- ماكينة ازالة الشعر (سيلك ابيل):

الوسيلة دي يمكن بتعتبر من اشهر واسهل واكتر الوسائل الأمنة، المهم بس تستخدميها صح وماتستعجليش وانتي بتشيلي بيها الشعر، خليها عمودية تماما على الجلد وشيلي براحة في عكس اتجاه نمو الشعر، مميزات الوسيلة دي السرعة وازالة الشعر من الجدور، وده بيخليه ياستغرق حوالي شهر على ما يظهر مرة تانية اما الميزة التانية فهي انها مش بتسبب اي اسمرار في الجلد او خشونة في الشعر، وبالنسة لعيوبها فهي انها احيانا بتتسبب في ظهرو الشعر مدفون تحت الجلد لكن المشكلة دي مش متكررة من معظم البنات، وعشان تتجنبي المشكلة دي، استخدمي طريقة ترطيب وتقشير الجلد المكتوبة في اخر المقال عشان تتأكدي ان الشعر المدفون كله ظهر قبل ما تشيلي الشعر.

وسائل ازالة الشعر الزائد 1
وسائل ازالة الشعر الزائد 1

6- الحلاقة:

دي وسيلة برضه بيعتمدها الكثير من السيدات لأنها سريعة جدا وبتزيل الشعر نهائيا لكن المشكلة في ان الشعر بيطلع بسرعة كبيرة جدا احيانا بنضطر ان احنا نكرر ازالة الشعر يوميا او يوم بعد يوم، اما العيب اللي بيصاحب الوسيلة دي فهو اسمرار الجلد وظهور الشعر خشن جدا واحيانا بيسبب حبوب وبثور اثناء ظهوره، اما الشرط الاساسي لاستخدام ماكينة الحلاقة فهو انه لازم يكون في مادة مرطبة اثناء الحلاقة زي اللوسيون الخاص بالحلاقة او زيت الزيتون او حتى معجون الحلاقة الرجالي.

7- الفتلة والملقاط:

طبعا محدش مايعرفهومش هما الوسيلتين الرئيسيتين لأزالة شعر الوش والحواجب، وهما الوسائل السهلة جدا لكن بيحتاجو شوية خبرة وخاصة الفتلة عشان ماتسببش التهاب او احمرار، والطريقة المثالية لتجنب الالتهاب فهي غسيل الوش بعد الانتهاء من ازالة الشعر بالماية الباردة واستخدام كريم مرطب زي البانثىنول على اماكن ازالة الشعر وطبعا تجنب المشي في الشمس والعرق قدر الامكان عشان الالتهاب.

وسائل ازالة الشعر الزائد 2
وسائل ازالة الشعر الزائد 2

نصائح هامة قبل ازالة الشعر:

  • قبل ما تجربي اي وسيلة جديدة جربيها على جزء من بشرتك في مساحة حوالي 2 سم X2 سم واستني 24 ساعة وشوفي اثرها على جلدك اذا كانت حتسبب التهاب او احمرار او لأ.
  • بلاش تزيلي الشعر في بداية اليوم خليها بليل وخدي دش واسترخي ونامي يعني حاولي تتجنبي العرق قدر الامكان عشان المسام ماتتسدش وتسبب التهاب للجلد.
  • استخدمي الوسائل بالطريقة الصحيحة وزيلي الشعر في عكس اتجاه النمو عشان الشعر يتشال من الجذور وما يتقطمش او يتكسر وتفضل باقي الشعرة على سطح الجلد وتخليه خشن.
  • قبل ازالة الشعر بثلاثة ايام رطبي جلدك كل يوم قبل النوم بزيت الزيتون والبسي حاجة قطن ونامي بيه بحيث ان الزيت يفضل على الجلد اطول فترة ممكنة، وفي نهاية الثلاثة ايام استخدمي المقشر وادعكي به الجلد كويس اوي ويفضل تعملي المقشر في البيت (ثلاث معالق كبار سكر خشن او سكر بني، معلقة كبيرة زيت زيتون، معلقة صغيرة من زيت اللوز) بعد الحمام والدعك بالليفة كويس وزعي المقشر على الجلد وسيبيه خمس دقايق وبعدين ابدأي في الفرك بأطراف صوابعك في حركات دائرية، في النهاية استخدمي الليفي في ازالة المقشر واستخدمي الماية بس في ازالتة، وبعد الحمام على طول ابدأي في ازالة الشعر.
  • بعد ازالة الشعر، خدي دش كويس جدا بس يفضل من غير استخدام الليفة عشان الجلد مايلتهبش، وكمان بلاش الحمام بماية سخنة خليها فاترة، وفي نهاية الحمام حضري في بخاخة ماية نص كوباية من زيت الاطفال (بيبي اويل جونسون الروز افضل نوع) وحطي عليه معلقة صغيرة من زيت اللوزن وحوالي 20 قطرة من الزيت العطري اللي تحبيه زي (زيت النعناع – زيت الياسمين – زيت اللافندر – المسك – زيت البرتقال – زيت الورد)، قبل تنشيف جسمك رجي البخاخة كويس اوي وبعدين رشي من الخليط ده على كل الجسم وهو لسه مبلول، ووزعيه كويس وفي النهاية لفي جسمك في الفوطة او البسي برنس بلاش التجفيف بالفرك بالفوطة وسيبيه الجلد يتشرب الزيوت فترة، فايدة الزيوت دي انها بترطب مكان ازالة الشعر وكمان بتعمل ريحة عطرية حلوة جدا للجسم بتستمر اكتر من يوم.

مقالات متعلقه

6 نصايح فعالة هتساعدك تتخلصي من اكتر المشاكل الجمالية المزعجة

6 نصايح فعالة هتساعدك تتخلصي من اكتر المشاكل الجمالية المزعجة

ازاي تعملي تفتيح “تشقير” شعر الوجه بطرق طبيعية

ازاي تعملي تفتيح “تشقير” شعر الوجه بطرق طبيعية

واكس اللبن لازالة الشعر الزائد وتقليل نموه وتفتيح البشرة

واكس اللبن لازالة الشعر الزائد وتقليل نموه وتفتيح البشرة