كورس تجديد الشعر التالف في اسبوع

بقلمأنجي سليمان فيشعر visibility30722

الشعر الجاف والتالف من اسوأ المشكلات اللي ممكن تواجهنا لأنه بيحسسنا بالاحباط والاكتئاب وبيقلل الثقة في النفس، وطبعا كلنا بنقبى عايزين نظهر في احسن مظهر قدام صديقاتنا وقرايبنا او حتى لو عندنا مناسبات خاصة محتاجين شكل شعرنا يبقى حلو ولامع وناعم فعشان كده بنات حوا النهاردة جابتلك كورس مكثف يساعدك على تجديد الشعر التالف وتجديد مظهره خلال اسبوع نفذي الكورس وحتلاقي نتايج مبهرة.

كورس تجديد الشعر التالف

قبل ما نبدا في عمل الكورس حنتفق على مجموعة من الخطوات اللي حتساعدنا على الحصول على النتيجة المثالية:

  • ممنوع تماما استخدام السشوار او المكواة خلال اسبوع الكورس.
  • ممنوع تجفيف الشعر بالفرك بالفوطة ولكن لفي شعرك بفوطة جافة ولما تشرب الماية سيبي شعرك ينشف براحته خالص وبعدين مشطيه بمشط واسع ويفضل يكون خشب.
  • بلاش تنامي وشعرك فيه اي نوع من التوك او الاكسسوارات خالص.
  • البلسم اللي حنستخدمه طول ايام الكورس عبارة عن: كوب من البلسم + 3 معالق من البن دوبيهم في ماية واغليهم على النار كويس وخدي التفل حطيه على البلسم، معلقتين كبار من الحليب ومعلقة كبيرة من عسل النحل، اخلطي المكونات مع بعض كويس جدا وسيبيهم في عبوة البلسم واستخدميهم زي ما حنقول.
  • الكريم المرطب المستخدم قبل النوم: 4 معالق من زيت جوز الهند، قرصين شمع عسل، معلقة صغيرة زيت لوز مر معلقة صغيرة زيت لوز حلو، معلقة صغيرة زيت بارافين، معلقة كبيرة زيت زيتون، معلقة صغيرة زيت خروع، كبسولتين فيتامين E ، سيحي زيت جوز الهند وشمع العسل في حمام ماية سخنة لغاية ما يبقى سائل، اخلطي معاه باقي الزيوت وافتحي كبسولات الفيتامين وخدي المحتوي بتاعها حطيهم مع الخليط وقلبي بسرعة وسيبيه في علبة او برطمان زجاج لغاية ما يجمد شوية وبعدين استخدميه زي ما حنقول

اليوم الاول

في اول يوم من الكورس مشطي شعرك مرة واحدة في اليوم، وبليل قبل النوم حطي طبقة كثيفة من الكريم المرطب على شعرك واربطيه براحة خالص بإيشارب قطن عشان الزيت مايجيش على وشك وسيبيه طول الليل وتاني يوم اغسلي شعرك كويس بالشامبو وحطي الماسك ده.

اليوم التاني

ماسك الموز والبن

تجديد الشعر التالف

المكونات:

  • ثمرة موز
  • معلقة كبيرة عسل نحل
  • معلقة كبيرة زبادي طبيعي
  • معلقتين حليب بودرة
  • معلقة كبيرة زيت زيتون

الطريقة:

  • اهرسي الموزة كويس جدا جدا وحطي عليها باقي المكونات.
  • بعد ما تغسلي شعرك وتسيبية نص ساعة يتشرب الماية.
  • قسمي شعرك خصل ووزعي الخليط على كل خصلة من الجدور الة الاطراف في طبقة كثيفة.
  • لما تخلصي الشعر كله ويتشرب الخليط بالكامل لفيه على نفسه وغطي شعرك ببونية الشعر.
  • سيبي الماسك من ساعتين الي تلات ساعات وبعدين اغسلية بالشامبو كويس.
  • استخدمي كمية من البلسم اللي قولنا عليه في البداية وسيبية خمس دقايق واشطفيه.

سيبي شعرك يجف وهو ملفوف بالفوطة من غير اي دعك ولما ينشف خالص مشطية ولميه في شكل ضفيرة واربطية من تحت خالص مش من ناحية فروة الرأس.

ريحي شعرك باقي اليوم وماتحطيش فيه اي حاجة تانية.

اليوم الثالث

سيبي شعرك طولي اليوم ما تعمليش فيه حاجة، بس تمشطية مرة واحدة بالمشط الخشب، وقبل النوم حطي طبقة من الكريم المرطب اللي قلنا عليه فوق واربطيه بالايشارب القطن وسيبيه طول الليل.

تجديد الشعر التالف (2)

اليوم الرابع

اغسلي شعرك كويس من الزيت وسيبيه يهدى شوية وبعدين اعملي الماسك ده.

ماسك البيض وخل التفاح

المكونات

  • معلقة صغيرة خل التفاح
  • 2 معلقة كبيرة زيت زيتون
  • 3 بياض بيض مخفوق

الطريقة

  • اخلطي المكونات كويس جدا.
  • وزعي الخليط على شعرك من الجدور للاطراف باستخدام فرشاة الصبغة.
  • البسي عليه البونية البلاستبك وسيبيه نص ساعة.
  • اغسلي شعرك بالشامبو.
  • حطي البلسم اللي اتفقنا عليه لمده خمس دقايق وبعدين اشطفيه كويس اوي.
  • كرري الخطوات السابقة من تجفيف وتمشيط وعمل ضفيرة وريحي شعرك باقي اليوم.

اليوم الخامس

مثل اليوم الثالث بالظبط.

قبل النوم انقعي عدد عشر حبات لوز في نص كوب من الحليب طول الليل عشان تعملي بيهم الماسك تاني يوم.

اليوم السادس

ماسك اللوز والحليب وجوز الهند

المكونات

  • اللوز المنقوع في الحليب
  • معلقة كبيرة عسل النحل
  • معلقة كبيرة من حليب جوز الهند
  • معلقة كبيرة من جل الصبار (متوفر عند العطار)

الطريقة

  • قشري اللوز واضربيه في الخلاط مع الحليب اللي كان منقوع فيه.
  • اخلطي عليه حليب جوز الهند والعسل وجل الصبار وقلبيهم كويس جدا.
  • بعد غسيل شعرك كويس وزعي الخليط على شعرك من الجدور للاطراف بطبقة كثيفة تغطي بيها الشعر كله.
  • لفي شعرك والبسي عليه بونية بلاستيك وسيبية ساعة الي ساعتين.
  • اغسلي شعرك كويس بالشامبو وبعدين استخدمي البلسم اللي قولنا عليه وسيبيه خمس دقايق وبعدين اشطفي.

اليوم السابع

ريحي شعرك خالص وممكن تدهنيه بسيط جدا بزيت الزيتون.

ودلوقتي تقدري تحسي بالفرق الرهيب في لمعة ونعومة شعرك، وتقدري طبعا تروحي للكوافير او تستخدمي السشوار في البيت وتستمتعي بشعر صحي وجميل.