توافق برج الثور مع الابراج الثانية
الصدق والثبات وتحمل المسؤولية والانسجام من أهم الصفات اللي بتميز مواليد برج الثور، وعشان كده بيخلوك تشعر بالراحة لما تكون جمبهم و زى ما اتعرفنا قبل كده على مميزات و صفات انثى برج الثور و رجل برج الثورجايبنلكم معلومات هتحبوا تعرفوها عن مدى توافق برج الثور مع الأبراج الثانية…
من أنجح علاقات برج الثور بتكون مع (العذراء، الجدي، السرطان والحوت) ومن أصعبهم واللي بتكون محتاجة شغل وصبر عشان تنجح (الدلو, الأسد).
1- برج الثور والحمل:
الثور بيتعامل بتفكير عقلانى و عملى جدا على عكس الحمل الشغوف الحماسي بزيادة, لو الحمل اندفع ورا فكرة من غير تخطيط وبعدين فشلت, بتلاقي الثوربـيلومه يوبخه و دى طبعا حاجة بتضايق الحمل جدا و بتخليه يبعد عن الثور. الثور ممكن يتجنب الموضوع ده لما يواجه الحمل بطريقة لطيفه و يساعده على اتخاذ قرارات مفهاش تسرع وفي نفس الوقت ممكن يتعلم شوية اندفاع وسرعة في اتخاذ القرارات من الحمل.
نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, بس بمجرد إن ده يحصل علاقتكم هتكون رائعة عشان هتكملوا بعض.
2- برج الثور والثور:
انتم الاتنين شخصيات يعتمد عليها و عقلانيين و عمليين جدا , بتحبوا الطبيعة و بتفضلوا تعيشوا فى مكان هادى انتم الاتنين كسلانين شوية بس بتحبوا تستمعوا بكل حاجة فى الحياة سوا . العند من اهم صفاتكم و بتتمسكوا برأى واحد و لا يمكن تغيروه . مع الوقت التفاهم بيكون كبير بينكم بس للاسف حياتكم بتفقد الشعلة اللى فيها و بتفقد الحماس و بتميل للملل.
نوع العلاقة: قوية جدا! لأنكم بتبقوا فاهمين بعض كويس قوي كأنه كتاب مفتوح…
3- برج الثور والجوزاء:
الثور متزن و عقلانى صفتين مش موجودين فى الجوزاء لكنه بينجذب ليهم جدا و ساعات بيزهق برده من عقلانية الثور الشديدة . الثور بيحترم ذكاء الجوزاء جدا لكنه بتضايق ساعات لما الجوزاء مش بينفز وعوده . الجوزاء بيحب يتكلم كثير و بيتقل من موضوع للتانى بسرعة و دى حاجة مش بتريح الثور لانه بيحب يركز فى موضوع واحد. لما يكون فى قرار مهم فى حياتهم الثور بيحب يفكر بهدوء و ياخد وقته لوحده لكن الجوزاء بيفضل يتكلم مع حد بسرعة . لازم البرجين يحترموا اختلافات بعض و الا هيكون فى بينهم صدامات كثيرة.
نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, انتوا لازم تتعلموا إزاي تحترموا الاختلاف وإزاي تقدروا تظبطوا العلاقة والموضوع محتاج شوية مجهود.
4- برج الثور والسرطان:
الناس بتشوفهم طيبين اوى واجتماعين و بيقدروا اى حاجة حلوة فى الحياة حتى لو كانت بسيطة .لو كونوا اسرة و كان عندهم اطفال مش بيبخلوا بوقتهم ثانية على اولادهم و بيركزوا معاهم فى كل تفاصيل حياتهم و ده بيرجع برده انهم بيحبوا يقعدوا فى البيت اكثر ما بيخرجوا . بيحبوا الاماكن الهادية البعيدة عن اى دوشة . السرطان عاطفى جدا و مرتبط عاطفيا بالاهل و الاصدقاء جدا بعكس الثور العملى لكن السرطان بيتفهم ده لان الثور بيعرف يتعامل بحكمة و لين مع طبيعة السرطان.
نوع العلاقة : فى توافق كبير ما بينكم و انسجام و بتقدروا قيمة بعض جدا و بتتعاونوا مع بعض فى الحياة.
5- برج الثور والاسد:
هما الاتنين عندهم قوة ارادة عالية وعند شديد و لما بيكرسوا حياتهم لشخص, مستحيل يسيبوه و ده بيقوى من علاقتهم مع شريكهم لانهم بيكونوا مخلصين جدا لبعض وحريصين على انهم يحافظوا على العلاقة دى بحلوها و مرها . ساعات اهتمامتهم بتكون مش زى بعض و ده بيسبب بعض المشاكل مثلا الأسد اجتماعى أكتر من الثور و بيحب أكتر الخروج والمخاطرة علي عكس الثور اللي بيفضل أكتر الهدوء والبيت. علاقتكم فيها ترابط قوى وعارفين كويس انكم تقدروا تعتمدوا على بعض, انتوا الاتنين مش بتحبوا التغيير لدرجة انه حتي لو بقيتوا مش مرتاحين مع بعض, انتوا صعب جدا عليكم انكم تقروا انكم تسيبوا بعض وتبدأوا من الأول مع أشخاص تانيين.
نوع العلاقة: فى تناقضات كثير بين ميولكم و شخصياتكم و ده بيسبب مشاكل كثير و خلافات بسبب اختلاف طبيعتكم.
6- برج الثور والعذراء:
هما الاتنين علاقتهم منسجمة جدا و بيحبوا يساعدوا بعض دايما هما الاتنين عمليين و يصلحوا لبعض جدا فى الزواج او الشغل عندهم القدرة انهم يوهبوا نفسهم لبعض او لعائلتهم او اطفالهم تماما . برج الثور هادى اكثر فى مشاعره عن برج العذراء اللى بيقدر طبيعة الثور اللطيفة الهادية المتماسكة و بالرغم من انكم الاتنين بتحبوا الاكل جدا لكن العذراء بيهتم اكثر بصحته و انواع الاكل اللى بياكلها عكس الثور اللى بيستمتع بكل حاجة و مش بيهمه.
نوع العلاقة : على الرغم من ان فى اختلافات فى مشاعركم و طبيعتكم العاطفية لكن انتم بتلاقوا حاجة حلوة فى الاختلاف لانه بيزود الانجذاب بينكم.
7- برج الثور والميزان:
بيحاولوا يتجنبوا الخناق و المشاكل بأى طريقة و على الرغم من ان اصحابهم بيحبوا يتواجدوا معاهم فى اى مكان لان علاقتهم متجانسة و هادية و لطيفة لكن فى بينهم اختلافات فى الشخصية. الميزان بيحب يتواجد مع الناس و بيحب النشاطات الاجتماعية اللى بيشارك فيها اصحابه لكن الثور بيفضل يبتعد عن الدوشة و الكلام الكثير و بيركز على اهتماماته الشخصية و الهوايات الخاصة بيه اللى بيحب يعملها لوحده فبيحصل من وقت للتانى مشاكل بينهم لاختلاف طريقتهم فى الحياة.
نوع العلاقة: متناقضين ومختلفين, صعب انكم تقتنعوا بشخصية بعض, بس لو حصل ما بينكم انجذاب بيكون قوي وبتقدروا تغيروا وتأثروا في شخصيات بعض.
8- برج الثور والعقرب:
التوافق الفكرى والعقلى بينهم تقريبا مش موجود لكن بيتوافقوا عاطفيا جدا و لو قدروا يكونوا متفاهمين مش بس عاطفيا لكن فكريا مش هيقدروا يبعدوا عن بعض ابدا. هما الاتنين عندهم حب تملك شديد خصوصا العقرب اللى عنده غيرة قاتلة. العقرب احتياجه للحب و الاهتمام بيكون زيادة شوية بعكس الثور الهادى العاقل حتى فى مشاعره . هم الاتنين بيتميزوا بالعند وعشان كده لازم يحاولوا يوصلوا لحل وسط عشان ميخسروش بعض بسبب اختلافتهم و تمسكهم برأيهم.
نوع العلاقة : فى بينكم كل حاجة و عكسها و عشان كده الاختلافات اللى ما بينكم هو سر انجذابكم لبعض.
9- برج الثور والقوس:
اكثر حاجة بتجنن القوس انه عاشق الاجتماعيات و السفر و الرحلات بعكس الثور المحب للهدوء و الراحة و الوحدة و ده بيخلى القوس يمل من الثور أوقات كتيرة. برج الثور مش بيحب النشاط الزيادة اللى عند القوس لانه فى رأيه بيشتت تركيزه عن حجات اهم زى الشغل . لازم الاتنين يتعلموا ان كل واحد فيهم يقدر يمارس هواياته و اهتمامته لوحده من غير التانى و ده هيساعد على فهمهم لبعض و يقدروا يوازنوا حياتهم.
نوع العلاقة: متناقضين ومختلفين, صعب انكم تقتنعوا بشخصية بعض, بس لو حصل ما بينكم انجذاب بيكون قوي وبتقدروا تغيروا وتأثروا في شخصيات بعض.
10- برج الثور والجدى:
عمليين, واقعيين, ومتوافقين جدا فكريا.. ساعات حياتهم بتكون مملة و روتينية لانهم بيعملوا ثنائى عقلانى وعملى بزيادة و مفيش فى حياتهم اى مجال لتضيع الوقت او الاسترخاء و عشان يتجنبوا الملل ده لازم يشاركوا بعض فى اى هواية او يجربوا رحلات السفر و يحاولوا يغيروا من روتين حياتهم . هما الاتنين معتمدين على بعض جدا لان الجدى بيخطط للحياة و الثور بينفذ و يوافق على الخطط دى لانه بيثق فى رأى الجدى و تفكيره.
نوع العلاقة : على الرغم من ان فى اختلافات فى مشاعركم و طبيعتكم العاطفية لكن انتم بتلاقوا حاجة حلوة فى الاختلاف لانه بيزود الانجذاب بينكم.
11- برج الثور والدلو:
الثور نمط حياته تقليدى وهادى جدا بعكس الدلو اللى بيحب يجرب كل حاجة جديدة و يواكب الاحداث والموضة وعشان كده اذواقكم بتختلف فى الفن و الموسيقى و الاراء السياسية و الاجتماعية . الصفة المشتركة ما بينهم هى العند و خصوصا الثور اللى مش بيتقبل الاختلاف بينه و بين الدلو وده بيسبب مشاكل بينهم لانه بيكون من الصعب يغير رأيه او يكون مرن.
نوع العلاقة: متناقضين ومختلفين, صعب انكم تقتنعوا بشخصية بعض, وقدامكم تحدي كبير عشان تقدروا تنجحوا العلاقة ديه.
12- برج الثور والحوت:
هما الاتنين مرنين مع بعض و بيحبوا السلام و الهدوء .الثور بيحب طيبة الحوت و رقته فى التعامل اما الحوت بيقدر جدا عقل الثور . الاختلافات بينهم بتكون فى اتخاذ القرارات او التفكير الثور بيحب التفكير المنظم اللى بيوصل لحلول عملية اما الحوت بيفكر بعاطفته اكثر و بيعتمد على حدسه و مشاعره اكثر من الخطط والافكار العقلانية بتاعت الثور.
نوع العلاقة : فى توافق كبير ما بينكم و انسجام و بتقدروا قيمة بعض جدا و بتتعاونوا مع بعض فى الحياة.
مواليد الثور سلميون جدًا، و مش بيحبوا الخلافات أو المشاكل مع الآخرين، و عشان كده مش هتلاقى أصدقاء أو جيران أو حتى أزواج أحسن منهم، ولكن في نفس الوقت الهدوء والسلام والثبات ده مش بيلائم كل الشخصيات و بيتوقف على احترامك وتقديرك لهم.
في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…
نتمنى إن الموضوع يكون عجبكم وفعلا استفدتم منه وقدرنا نوضحلكم ونتعمق أكتر في مواصفات البرج الصادق المريح.. برج الثور.
