طريقة عمل كيكة المولتن بالشيكولاتة السايحة

اجمل طعم في الدنيا هو طعم الشيكولاتة والاحلى منه هو شكلها وهي سايحة وبتخرج من قلب الكيكة واحلى من الاتنين احساسك وهي مع كل معلقة بتاكلي فيها كيك الشيكولاتة مع شيكولاتة سايحة كتير معاها، الوصفة دي سهلة جدا لواحدة من اجمل واشيك الكيكات اللي ممكن نقدمها للضيوف او لافراد العائلة، هي بتتخبز في قوالب السوفليه او الكريم كراميل وتقدري كمان تعمليها في صينية الكب كيك تعالي اقري معانا طريقة عمل كيكة المولتن بالشيكولاتة السايحة

المقادير

• 170 جرام شيكولاتة مطبخ غامقة
• ¾ كوباية دقيق
• 3 بيضات
• 10 معالق طعام زبدة
• كوباية و ¾ سكر بودرة
• 3 صفار بيض
• رشة فانيليا

طريقة التحضير

• سخني الفرن على درجة 220
• حضري قوالب الخبيز الفخار بدهنهم كويس بالزبدة او بطني صينية الكب كيك بورق الكب كيك

• حطي الزبدة مع الشيكولاتة في بولة بيركس

• حطيهم في المايكرويف دقيقتين لغاية ما يسيحوا او اعمليلهم حمام ماية سخنة

• امزجيهم مع بعض كويس جدا لغاية ما يختلطوا كويس

• ضيفي سكر البودرة وقلبي كويس

• ضيفي الدقيق وامزجيه كويس جدا مع الخليط حيكون سميك حاجة بسيطة

• اخفقي البيض وصفار البيض مع رشة فانيليا
• قلبي البيض مع خليط الدقيق كويس لغاية ما تحصلي على القوام ده

• صبي الخليط في الاكواب بس ما تمليهاش للاخر سيبي منها حوالي سنتيمتر ونص

• حطيهم في الفرن وسيبيهم من 10 الى 15 دقيقة
• حتلاقي الجوانب استوت وارتفعت والوسط ناعم وطري شوية

• خرجيهم من الفرن وسيبيهم خمس دقايق حتلاقيها هبطت شوية ده عادي

• هاتي سكينة رفيعة جدا وبدأي في فصل الكيكة عن الطبق براحة

• حطيها في طبق ورشي وشها بالسكر البودرة

• قدميها مع الفاكهة او الايس كريم او الكريم شانتية