ازاي تختاري هدوم العيد للاطفال
دلوقتي احنا قربنا على نص رمضان وكل سنة وانتم طيبين معروف انه في التوقيت ده من كل سنة بنبدأ نشتري هدوم العيد لنفسنا ولاولادنا كمان، بالنسبة لنا احنا الموضوع بيكون اسهل كتير من اختيار هدوم الاطفال، بنات حوا النهاردة جمعتلك شوية افكار عشان تعرفي ازاي تختاري وتوفقي هدوم العيد للاطفال على طريقة بيوت الازياء العالمية لصيف 2015
هدوم العيد للاطفال الصيف ده
اولا هدوم البنات
السنة دي هدوم البنات متنوعة لكن كلها بتتميز بالرقة والبساطة والشياكة بتاعة زمان زي الفساتين والجيبات القصيرة المنفوشة، او الشورتات والبنطلونات المشجرة مع البلوزات الرقيقة او التي شيرت
بالنسبة للالوان فالسنة دي كلها الوان مبهجة بس مش مفرقعة يعني درجات الروز ودرجات الاصفر واللبني والاخضر وطبعا اللون الابيض لكن الفوشيا والبينك والفسفوري مش منتشرين اوي مع انهم برضه لسه موجودين بس مش بكترة زي السنة اللي فاتت
شوفي الالبوم وحتلاقي مجموعة كبيرة من الصور اللي حتديكي افكار لأطقم للعيد ممكن تشتريها منفصلة وتوفقيها على بعض وكمان حتلاقي افكار لطريقة لبس الفساتين مع تسريحات الشعر والصنادل
ثانيا هدوم الولاد
اما بالنسبة للولاد فالهدوم السنة دي بسيطة وعملية جدا بعيد عن استايلات السنين اللي فاتت السنة دي الشورت السادة موضة جدا مع القميص البسيط او التي شيرت وطبعا الجينز موجود بكترة سواء في الشورتات، البنطلونات او القمصان
اما بالنسبة للالوان فالرمادي والازرق بدرجاته والاخضر بدرجاته واللون الابيض هما اكتر الالوان المنتشرة في هدوم الولاد، وبالنسبة للاحذية فالموضة السنة دي الحاجات المريحة يعني الصنادل الولادي المصنوعة من خامة الكوتشي او الحذاء الرياضي وطبعا الكونفرس او الاسبدريه لو مش بتحبي صنادل الولاد
واتفرجي في البوم الصور دلوقتي حتلاقي افكار كتير لطريقة تنظيم استايل ابنك في العيد عشان يلبس على موضة بيوت الازياء العالمية
