8 نصايح للتعامل الصحيح في سنة اولى ماما
اجمل لحظة بتمر بيها اي ام هي اللحظة اللي بتحضن فيها مولودها بعد شهور كتيرة من القلق ةالتعب والدعاء لربنا ان الطفل يجي بالسلامة، وعلى اد مشاعر الفرحة والسعادة والرضا على اد ما بتبقى ف مشاعر جديدة مختلفة ومضطربة بتعدي على كل ام بسبب التغيرات اللي بيعملها وجود الطفل في حياتها، وموضعنا النهاردة حيلخصلك في 8 نقاط تتوقعي ايه في سنة اولى ماما عشان تحضري نفسك كويس للمرحلة دي
عقبات سنة اولى ماما وحلولها
1- اضطرابات النوم
حتسمعي كتير نصايح عن انك لازم تأجلي شغل البيت لما مولودك ينام، لكن في الحقيقة النصيحة دي مش هي الافضل الافضل ليكي ان انتي تنامي وقت ما مولودك ينام وتحاولي ترتاحي خصوصا في الساعات اللي هو بينام فيها كتير خصوصا ساعات الليل وقسمي شغل البيت على طول الساعات التانية اللي هو بياخد فيها وقت للراحة
2- مشاركة الزوج
ما تتوقعيش ان جوزك حيهتم بالمشاركة في مسئولية المولود لوحده، هو غالبا حيكون خايف من المعاملة مع الطفل الصغير الضعيف ده وحاسس انه مش حيفهم احتياجاته او يقدر يتعامل معاه عشان كده الأسلوب الصحيح للمعاملة في الحالة دي هو ان انتي تحاولي تشركي زوجك معاكي في العناية بالطفل عن طريق انك تطلبي منه مهام صغيرة زي مثلا انه يشيله لغاية ما تحضري ببرونة، او انه ياخد باله منه لغاية ما تخلصي حاجة في البيت بس خلي بالك ما تعمليش ده والطفل في حالة بكاء او عصبية لأنه فعلا مش حيقدر يتعامل
3- التغيرات الجسمانية
اكيد الحمل والرضاعة لهم تأثير كبير على جسمك وده برضه له تأثير على حالتك النفسية، لكن ببساطة طمني نفسك ان الوزن والتغيرات دي زي ما اكتسبتيها بالوقت حتتخلصي منها كمان مع مرور الوقت وده طبعا بعد ما تهتمي بطريقة اكلك وتاكلي المفيد لكي وللطفل كمان ومع المتابعة مع طبيب الاطفال وطبيب التغذية حترجع كل حاجة لحالتها الاولى بس اهم حاجة ما تستعجليش
4- الرضاعة
اثبتت الدراسات العلمية ان الرضاعة الطبيعة خصوصا في الشهور الاولى من عمر الطفل هي افيد حاجة لصحتة ونموه بشكل طبيعي وصحي، لكن احيانا الظروف مش بتسمح بده زي مثلا ان الام تكون بتاخد دواء منتظم مايسمحلهاش بانتظام الرضاعة مع الطفل او مثلا يكون اللبن غير كاف ويطلب منك الطبيب اللجوء للرضاعة الصناعية، في الحالة دي ما تستلميش للافكار السلبية وما تفكريش ابدا ان انتي مقصرة في حق طفلك او ان الرابط اللي بينك وبينه حيتأثر كل دي مشاعر غير صحيحة لأن علاقتك بطفلك ومدى تعلقك به مش حيتأثر بالرضاعة فقط لكن بعوامل تانية كتير جدا بداية من ريحتك وملمسك لغاية صوتك وحنانك واهتمامك به
5- حرية الحركة
المتحكم في حياتك دلوقتي مبقاش رغباتك الشخصية لكن بقى الطفل الصغير اللي دخل حياتك عشان كده حتلاقي ان انتي بترفضي خروجات او عزومات كتير عشان ظروفها او وقتها ما يسمحش مع المولود ماتخليش حاجة زي دي تحسسك ان انتي بقيتي منعزلة ومنطوية او حتتحولي لشخصية مش اجتماعية بالعكس انعي نفسك ان ده وضع مؤقت حيفل بس لغاية ما طفلك يكبر شوية وبعد كده حياتك حترجع لطبيعتها مرة تانية وحاولي تستمتعي بكل لحظة انتي بتقضيها مع الطفل ده
6- الحياة الزوجية
تجربة الولادة تجربة كبيرة واثارها بتفضل مستمرة وممتده فترة كبيرة من الزمن وسواء كانت الولادة طبيعية او قيصرية فأنتي لازم حتستني فترة النفاس ويمكن بعدها بفترة كمان لغاية ما ترجعي لممارسة حياتك الزوجية بشكلها الطبيعي واكيد ده حيكون بعد استشارة الطيب كمان لكن عادي لو واجهتي شوية صعوبات في الرجوع لحياتك الزوجية مرة تانية بشكل طبيعي وفي الحالة دي لازم تتكلمي مع جوزك بمنتهى الوضوح وتطلبي منه ان هو يستنى شوية لغاية ما تكوني مستعدة للخطوة دي وده شيء طبيعي ومتوقع ما تخليش حاجة زي دي تقلقك
7- نمو طفلك
كلنا بنهتم بصحة اولادنا وبمتابعة نموهم واكيد انتي بتركزي مع طفلك من اول لحظة امتى ابتسم وامتى بدأ شعره ينمو وامتى بيقعد وامتى بيمش وموعد التسنين وغيرها وغيرها من مؤشرات النمو، واكيد حتكوني بتابعي مع طبيب الاطفال لكن برضه حتسمعي كلام كتير من قريباتك وصديقاتك او حتى من البحث على الانترنت، اهم حاجة تحطيها في اعتبارك ان في حاجة اسمها الفروق الفردية يعني عادي لما طفلك يتأخر في حاجة او يتقدم فيها بفرق اسابيع او شهور مش مشكلة لو اتأخر شهر في الحبو مثلا او لو اسنانة بدأت تظهر بدري شوية اهتمي بس بالمتابعة مع الطبيب باستمرار عشان تتطمني ان هو في المتوسط الطبيعي للنمو
8- التربية والرعاية
في فرق كبير بين المصطلحين دول لازم تعرفيه ولازم تعرفي ان الطفل في عامه الاول بيتعلم اغلب السلوكيات والمهارات الاساسية اللي حيعتمد عليها بعد كده في حاجات كتير، عشان كده ما تخليش اهتمامك بطفلك مجرد رعاية في اللبس والاكل والنوم، لكن اهتمي بالتربية وتعليم المهارات يعني تختاري الالعاب اللي بتنمي ذكاؤه ومهاراته على حسب عمره، كلميه كتير وما تفتكريش ان هو مش حيفهمك هو ممكن يكون مش عارف معنى الكلام لكن انتي بتكبري عنده مخرزون الكلمات اقريله كل يوم ربع ساعة قبل النوم، بعد ما يخلص اللعب كل يوم خليه يتفرج عليكي وانتي بتشيلي الالعاب في مكناها عشان اول ما يبدأ يتكلم ويتحرك حتلاقيه بينفذ كل اللي انتي عودتيه عليها لأن هو خلاص اتخزن في ذاكرته
