طريقة عمل الدوناتس المقلية بالصور
الحلويات عنصر مهم على سفرة الفطار وبعد مرور عشر ايام من شهر رمضان اكيد محتاجين شوية تغيير وتجديد من الحلويات الشرقية من كنافة وقطايف وغيرها، عشان كده بنات حوا جيبالك النهاردة طريقة عمل الدوناتس المقلية وهي من الحلويات الغربية المشهورة في امريكا الشمالية بشكل خاص وبتتقدم بطرق مختلفة وطعمها مميز جدا
طريقة عمل الدوناتس المقلية بالخطوات
المقادير
- 3 كوبايات دقيق
- كيس خميرة فورية
- ¼ كوباية ماية دافية
- معلقة صغيرة ملح
- كوباية الا ربع حليب دافي
- ½ كوباية سكر
- 2 بيضة
- 2 معلقة كبيرة زبدة طرية
خطوات التحضير
- دوبي الخميرة مع معلقة صغيرة سكر في نص كوباية الماية الدافية وسيبيها ترتفع في الكوباية لمدة عشر دقايق
- اخلططي المكونات السايلة كلها مع بعض كويس جدا (الحليب والخميرة والبيض والزبدة) اما باستخدام العجانة او باستخدام معلقة خشبية
- انخلي كوباية واحدة دقيق مع الملح والسكر والفانيليا وحطيها على الخليط السابق
- زودي باقي الدقيق بالتدريج وقلبي كويس
- القوام المظبوط للعجينة لما تبقى مش بتلزق في الايد وفي نفس الوقت عجينة لينة
- غطيها بفوطة نضيفة وسيبيها تخمر نص ساعة في مكان دافي
- قطعي العجينة على شكل دواير وجوه كل دايرة واحدة تانية اصغربالشكل ده
- ودلوقتي غطيها بفوطة نضيفة وسيبيها تخمر المرة دي حوالي ساعة لغاية ما حجمها يتضاعف
- في زيت غزير وسخن جدا اقلي الدوناتس برفق وحافظي على شكلها
- طلعيها على ورق المطبخ وسيبيها تطرد كل الزيت الزيادة
طرق التقديم
- دلوقتي يجي وقت التقديم واختاري الطريقة اللي تحبيها
- رشي عليها سكر بودرة
- غطيها بالشكولاتة السايحة
- غطيها بالشيكولاتة البيضاء السايحة
- غطيها بعجينة السكر الخفيفة (معلقتين زبدة وربع كوباية سكر مع كيس فانيليا وحوالي 4 معالق ماية) دوبي المقادير على النار لغاية ما تبقى بالشكل ده
افتحيها طبقتين براحة جدا واحشيها بالكريم شانتية او القشطة
