ازاي تتعاملي مع اولادك المراهقين

تربية الاولاد مهمة مش سهلة لكن برضه هي محتاجة شوية تفهم لطبيعة عمر اولادك واحتياجاتهم، ولكل مرحلة من المراحل اللي بيمر بها اولادك اسلوب معين وطريقة مختلفة للتربية، ومن اصعب المراحل دي هي مرحلة المراهقة واللي بتعتبر اكتر مرحلة عمرية حساسة بيمر بها الاولاد، وعشان تعدي المرحلة دي انتي واولادك بأمان ومن غير مشاكل لازم تتفهمي ابعاد المرحلة العمرية دي وطبيعة المشكلات اللي حتواجهك فيها عشان تعرفي ازاي تتعاملي مع اولاد المراهقين بشكل صحيح

ازاي تتعاملي مع اولادك المراهقين

• افهمي طريقة تفكيرهم

الاولاد في مرحلة المراهقة بيبانوا ظاهريا ان هما كبروا لكن في الحقيقة هما بيعبروا من مرحلة الطفولة لمرحلة النضج، يعي عقلهم لسه بيطور من نفسه ومن طريقة تفكيره، اولادك ف مرحلة المراهقة لسه معندهمش القدرة على الوصول للنتايج والتفكير بشكل تحليلي، وبناء على الحقيقة دي لما اولادك يعرضوا عليكي موضوع او مشكلة ما تتوقعيش منهم النتيجة والحل مباشرة لكن لازم تتكلمي معاهم وتتناقشي وتفتحيلهم طرق للتفكير توصل بيهم للنتيجة اللي انتي عايزاها علميهم تحليل الموضوع وماتقدميلهومش الحل على طبق من دهب

• الشك والثقة

دايما التفكير في الاولاد في مرحلة المراهقة بيبقى ان هما عرضة للانحراف في كل خطوة او كل مكان، دي مش حقيقة هو الاولاد في مرحلة المراهقة بيبحوا الاستكشاف ودي حقيقية لازم تتعاملي معاها بحكمة وتخليهم يستكشفوا في المكان او الاتجاه اللي حيفيدهم، وده بيبدأ بخطوة مهمة اسمها الصداقة والثقة حسسي اولادك طول الوقت ان هما محل ثقتك مش لازم لما يدخلوا من برة يشوفوا نظرة الشك في عينك ويحسوا ان انتي حتبدأي تحققي معاهم، خليهم يحسوا ان هما عايزين يروحوا البيت عشان يحكولك كل حاجة واتعلمي تسمعيهم باهتمام واعرفي اسماء اصحابهم واسألي عنهم بانتظام وخليكي حكيمة في انتقاد اصحابهم يعني الفتي نظرهم لتصرف غلط اصحابهم عملوه وبناء عليه ممكن تطلبي منهم يبعدوا عن الاصحاب دول لكن لازم تفهميمهم انتي ليه بتطلبي الطلب ده وعواقب سلوك الاصحاب دول وليه انتي شايفاهم مش كويسين مش يبقة مجرد فرمان وامر بإنهاء صداقتهم بصحابهم وبس

• حب البيت

الاولاد بيبانوا في مرحلة المراهقة متمردين ومش حابين اي حاجة في حياتهم وبيسعوا دايما لكسر القواعد والقوانين، لكن الحقيقة خلف التصرفات دي هي ان الاولاد في مرحلة المراهقة بيكونوا خايفين، بيخافوا من الفشل ومن المدرسين ومن انتقاد زملائهم ومن شكلهم والتغيرات الجسمانية اللي بتطرأ عليهم وغالبا بيكون التظاهر بالقوة والتمرد هو الحل لكل مشاعر الخوف دي، والطريقة الصحيحة لعلاج الموقف ده ان هما يحسوا ان البيت هو الملجأ والملاذ اللي هما بيتخلصوا فيه من كل مشاكلهم ومخاوفهم حيقدروا يتكلموا معاكي او مع والدهم ويفضفضوا ويحسوا بالامان مش بالخوف او الشك

• المشاركة

الاولاد في سن المراهقة بيكونوا متمحورين حول ذاتهم وكأن الكون كله بيدور حولهم هما وبس وده طبعا لأن هما لسه في مرحلة الاستكشاف بيستكشفوا نفسهم واهلهم والحقايق اللي في الدنيا والعالم اللي حواليهم وكتير غيرها من الاسئلة لكن ده مش معناه ان انتي تسيبيهم لنفسهم من غير حدود يتعاملوا بيها لازم ازلادك يعرفوا ان البيت له قواعد بتحكمه ولازم يتعلموا احترامها يعني مواعيد للخروج ومواعيد للدخول، مهمام منزلية لازم يلتزموا بها يوميا زي ترتيب غرفتهم شراء طلبات للبيت او غيرها من المهمام تخليهم يتحملوا مسئولية نفسهم ويعرفوا ان هما بيضيفوا للبيت ولغيرهم

• الثواب والعقاب

مش معني ان اولادك في سن المراهقة ان انتي تتعاملي معاهم على انهم في حالة مرض وحيخف بعد فترة لأ انتي لازم تتعاملي معاهم على انهم في مرحلة حرجة من حياتهم محتاجة حد يساندهم عشان يخرجوا منها بالشخصية اللي انتي تتمنى تشوفيهم عليها وعشان ده يحصل لازم تتعاملي معاهم على اد عمرهم يعني لما اولادك يعملوا غلطة وده وارد وحيتكرر كتير في المرحلة دي مش حينفع تستخدمي نفس نوع العقاب اللي كنتي بتعاقبيهم به وهما اطفال، يعني مش حتقدري تمنعي عنهم المصروف او تحبسيهم في غرفتهم، لازم تتكلمي معاهم في التصرف ده وتاخدي منهم اعتراف واضح بأن تصرفهم ده غلط وبناء عليه خليه هو اللي يختار العقاب لنفسه ويحدده ويحدد مدته مثلا يحرموا نفسهم من الخروج، ما يستخدموش اللاب توب او الموبايل تلات ايام، ولازم يكون العقاب على اد الغلطة، ولازم يكون في تصعيد يعني مثلا تهدديهم بأن الموضوع ممكن يوصل لوالدهم وساعتها العقاب حيكون اكبر بس ما تتسرعيش في اللجوء للحيلة دي عشان ما تخسريش صداقتهم وتخليهم يخبوا عليكي

طبعا دي الخطوط العريضة اللي بتحكم المرحلة دي لكن كل انسان بيختلف عن غيره ومنك يكون اولادك محتاجين مجهود اكتر او اقل من كده لكن الاكيد ان النصايح دي حتساعدك في تربيتهم وفي فهم ابعاد المرحلة العمرية دي