طريقة عمل الفتوش بالخلطة المميزة
السلطة الخضراء من المكونات الاساسية على السفرة المصرية والعربية بشكل عام، لكن لكل بلد عربي ثقافته اللي بتنطبع على طريقته في تقديم الاكل الخاص به، والنهاردة بنات حوا جايبالكم طريقة عمل الفتوش وهي شبيهة بالسلطة الخضراء المصرية لكن بشوية مكونات لها مذاق رائع ومميز، جربي معانا الطريقة دي وجددي من طريقة تقديمك للسلطة على سفرتك
طريقة عمل الفتوش الرائع
المكونات
- 4 ثمرات طماطم
- 3 ثمرات خيار
- حزمة بقدونس
- حزمة جرجير
- 3 بصل اخضر
- 2 ثمرة جزر
- كرنب سلطة او خس كابوتشي
- 2 رغيف لبناني صغير او رغيف كبير
مكونات الصوص
- معلقتين كبار زيت زيتون
- عصير ليمونة كبيرة
- معلقة كبيرة خل تفاح
- ربع معلقة نعناع ناشف
- ملح وفلفل
- ربع معلقة كزبرة ناشفة
- فص ثوم مهروس كويس جدا
- 3 معالق كبيرة من فصوص الرمان
طريقة تحضير الفتوش
- اول ملحوظة قبل ما تبدأي انك ما نخلطيش مكونات السلطة على بعض من البداية عشان مكونات السلطة لما بتتخلط بتخرج الماية اللي فيها وبتبقى اكتر من اللزوم
- قطعي الطماطم مربعات صغيرة بس بعد التخلص من كل البذر والسوائل اللي فيها
- قطعي الخيار مكعبات صغيرة
- ابشري الجزر
- قطعي الكرنب او الخس شرايح رفيعة واحتفظي به لوحده عشان الخس او الكرنب عشان هو اكتر حاجة بتخرج الماية بتاعتها بعد التقطيع
- قطعي البصل الاخضر بس الجزء الابيض منه بس
- افرمي الجرجير والبقدونس رفيع
- قطعي العيش مربعات صغيرة وممكن تستخدمي مقص المطبخ واقليها في الويت او ادهنيها نقطة زيت وحمصيها في الفرن
- دلوقتي جهزي الصوص بتاع الفتوش
- اخلطي الزيت والخل والليمون والملح والفلفل والكزبرة الناشفة والنعناع الناشف وفص الثوم مع بعض كويس
- قبل معاد تحضير السفرة مباشرة حطي قليل من الصوص على الخبز المقلي او المحمص
- حطي رشة صغيرة على حبوب الرمان
- حطي الخضار كله في وعاء وحطي عليه الصوص وقلبي كويس
- حطي الخبز على وش الطبق
- حطي فصوص الرمان
- قلبي حاجة بسيطة بحيث ان الخبز ما يطراش ويشرب من ماية السلطة وفي نفس الوقت ياخد من طعم الخضروات وقدميه مباشرة
