كاسات الكنافة اسرع تحلية في رمضان

ساعات كتير مش بنلحق نعمل الحلويات عشان تكون جاهزة بعد الفطار، او ممكن ممثلا نتفاجيء بضيوف او بعزومة مفاجئة وبنضطر نعمل حاجة سريعة عشان نقدمها، النهاردة جبنالك اسرع تحلية ممكن تقدميها في رمضان مشش محتاجة ولا وقت ولا مجهود ولا محتاجة مكونات خاصة او مقدير مخصوص، شوفي معانا النهاردة تحلية كاسات الكنافة بالحشوات المتنوعة وطرق التقديم المختلفة

كاسات الكنافة بالحشوات المختلفة

المقادير

• كمية من الكنافة على حسب احتياجك
• معلقتين سمنة
• ربع كوباية سكر بودة

بالنسبة للحشو على حسب المتوفر عندك

• مهلبية
• كريمة
• قشطة
• كريم شانتيه
• نوتيلا
• فواكه معلبة او طازة
• كاسترد
• جيلي
• ايس كريم
• بودنج الشيكولاتة
• بودنج الموز
• مكسرات

طريقة تحضير الحشوات

• المهلبية

حطي كوب من الحليب مع معلقة كبيرة من السكر ومعلقة صغير مليانة بالنشا وارفعيهم على النار لغاية ما يتقل ويبقى قوامه غليظ

• بودنج الشيكولاته

حطي تلات معلقة كبيرة من الدقيق مع معلقتين كبار من بودرة الكاكاو الخام مع معلقة صغيرة من الزيت ومعلقتين من السكر حطي معاهم نص كوباية حليب وقلبيهم كويس جدا وارفعيهم على النار لغاية ما يبقى قوامهم سميك وغليظ

• القشطة

كرري نفس طريقة المهلبية وقبل ما يتقل الخليط ضيفي عليه علبة قشطة وقلبي كويس لغاية ما يبقى قوامها غليظ

• بودنج الموز

اهرسي موزة كويس جدا لغاية ما تختفي منها القطع تماما

حطي على النار معلقتين كبار من الدقيق ومعلقة زيت ومعلقتين سكر ودوبيهم بنص كوباية حليب وارفعيهم على النار لغاية ما يتقل سيبيه يبرد خالص وبعدين حطيه على الموز وقلبية كويس

• اما بالنسبة للكاسترد والجيلي والكريم شانتية تقدري تحضريهم ببساطة زي التعليمات المكتوبة على العبوة

طريقة التحضير

• فتتي الكنافة كويس جدا بحيث تبقى رفيعة على قد ما تقدري
• حطي طاسة غويطة على النار وحمري الكنافة في السمنة لغاية ما يبقى لونها دهبي
• وهي لسه في الطاسة حطي عليها سكر بودرة وقلبيه لغاية ما يختفي السكر
• حضري كاسات التقديم بالعدد المطلوب
• وزعي طبقة من الكنافة في الكاس
• حطي طبقة من الحشو
• وطبقة من الفواكه
• وطبقة تانية من الكنافة
• زيني بالكريم شانتيه والمكسرات والفواكه وقدميه