طريقة عمل الباديكير للقدمين في البيت

القدمين الانيقتين الناعمتين هما الحاجة اللي كل بنت بتدور عليها طول الوقت لكن بنهتم بالموضوع ده زيادة في فصل الصيف لأن غالبا بنلبس صنادل مفتوحة ورجلينا بتظهر اكتر من الشتا، وحتى لو كنتي من محبي الاحذية المقفولة لازم تدللي نفسك ويكون مظهرك جميل جوة البيت، شوفي معانا الموضوع ده واقري النصايح اللي بنات حوا بتقدمهالك عشان تعرفي ايه هي طريقة العناية بالقدمين في البيت وازاي تعملي باديكير لنفسك من غير الحاجة الى صالونات التجميل.

معلومة مهمة بنات حوا حابة توضحهالكم ايه الفرق مابين الباديكير والمانيكير؟ العناية بالقدمين وضوافر القدمين اسمها باديكير “Pedicure” والعناية بالأدين وضوافر الادين اسمها مانيكير”Manicure“ , لكن احنا بقي الشائع عندنا واللي علي طول بنقوله إن تلوين الضوافر هو المانيكير والعناية بيها وتقليمها هو الباديكير وديه معلومة مش صح حبنا نوضحها :)

:نصايح العناية بالقدمين قبل عمل الباديكير

1. بلاش تلبسي احذية مقاسها مش مظبوط ولا واسعة ولا ضيقة عشان دي بتسبب الم في الاظافر ومششاكل في عقل الاصابع ولو حتلبسي حاجة مفتوحة زي الصندل او البالرينا حطي كريم واقي من الشمس على رجليكي قبل ما تخرجي
2. قصي اظافرك بانتظام عشان تتجنبي كسر الضوافر
3. اخلطي معلقة كبيرة بودرة التلك وماء الورد مع عصير نص ليمونة وعجنيهم في شكل معجون خفيف شوية وحطية على رجليكي من فوق مرة واحدة سيبيه لغاية ما ينشف خالص ويبقى بودرة اغسلي رجلك، كرري العملية مرة واحدة في الاسبوع عشان تتخلصي من اي بقع غامقة على رجليكي
4. رطبي رجليكي يوميا بكريم الرجلين قبل النوم، بس من وقت للتاني استخدمي الفازلين او زيت الزيتون بدل الكريم عشان تحصلي على ترطيب اعمق
5. بلاش تلبسي الكعب العالي فترات طويلة ولو حصل في مناسبة معينة، لما تروحي البيت حطي رجليكي في ماية فيها شوية من الملح البحري وبعدين رطبي رجليكي بزيت الزيتون

:طريقة عمل الباديكير للقدمين في البيت

6- شيلي بقايا المانيكير القديم من ضوافرك بالاسيتون والقطن الطبي

7- حطي رجليكي في ماية دافية فيها نقطة من الشامبو لمدة ربع ساعة

8- وزعي المقشر على رجليكي وادعكيها بأسفنجة كويس

9- اشطفي رجليكي وابدأي في تنظيف ضوافرك من خلايا الجلد الميت بالبنز الخاص بتنظيف الاظافر

10- ادعكي رجليكي كويس بالحجر الخفاف

11- حطي طبقة من الكريم المرطب على رجليكي و بعدين قصي ضوافرك وابرديها كويس

12- حطي طلاء الاظافر باللون المفضل عندك