طريقة عمل بلح الشام وازاي تقدميه
بلح الشام من الحلويات الشرقية المحبوبة لنا كلنا كبار وصغيرين ودايما نحب ناكلها في مختلف المناسبات واكيد مافيش مناسبة اجمل من رمضان نقدم فيها بلح الشام، و طريقة عمل بلح الشام سهلة جدا وسريعة كمان وكتير مننا بيعرف يعملها، لكن الجديد النهاردة ان احنا مش جيبنلك بس طريقة عملها لا احنا كمان جبنالك اكتر من طريقة تقدمي بيها بلح الشام وتجددي من طعمه عشان يبقى بلح الشام بتاعك مختلف عن اي مكان تاني
طريقة عمل بلح الشام
مقادير العجينة
- كوباية ماية
- كوباية دقيق
- 2 معلقة سمنة او زبدة
- 2 – 3 بيض حسب احتياج العجينة
- نص معلقة صغيرة سكر
- رشة ملح
- كيس صغير فانيليا
تحضير العجينة
- حطي كوباية الماية على النار في حلة صغيرة
- حطي السمنة والملح والسكر في الماية وسيبيها على النار
- اول ما تبدأ تسخن جامد وقبل الغليان طفي النار
- حطي كوباية الدقيق وقلبي بسرعة جدا
- استمري في التقليب لغاية ما العجين يبدأ ياخد شكل الكرة ويبعد عن الحلة
- حطية في بولة كبيرة وسيبيه يبرد خالص
- دلوقتي حطي الفانيليا على بيضة وحطيها على العجينة وقلبي جامد لغاية ما البيضة تختفي داخل العجينة
- حطي البيضة التانية وكرري نفس الحكاية
- لو العجينة وصلت للشكل كده ما تحوطيش البيضة التالتة لكن لو العجينة كانت لسه ناشفة حطي البيضة التالتة
- دلوقتي العجينة جاهزة للاستخدام
- حطي زيت غزير على النار وسيبيه يسخن جامد جدا
- حطي العجينة في كيس الحلواني واضغطي عليها فوق الزيت
- لما العجينة يوصل طولها 2 سنتيمتر تقريبا قصيه فوق الزيت وكرري العملية بسرعة
- لما يبقى بلح الشام لونه دهبي طلعيه في مصفاة واسعة
طرق التقديم
- لما يتخلص من الزيت خالص اختاري الطريقة اللي حتقدميه بيها من دول
- رشي عليه السكر البودرة
- افتحيه بسكينة رفيعة واحشيه نوتيلا
- افتحيه بسكينة رفيعة واحشية قشطة ومكسرات
- او ممكن تقدميه بالطريقة العادية خالص اغمسيه في الشربات التقيل ورشي عليه جوز الهند والمكسرات
