كنافة تشيز كيك بالفراولة اكتر من حلوة

بقلمأنجي سليمان فيحلويات visibility2438

طبعا زي ما كلنا عارفين ان الكنافة هي الحلو الاساسي على سفرة رمضان لكن ده ما يمنعش ان احنا نجدد في عمل الكنافة، ومعانا النهاردة فكرة تحفة حتخلينا ناكل الكنافة بطعم واحد من اجمل الحلويات اللي كلنا بنحبها وهي التشيز كيك، وبكده يبقى اكلنا الحلويات الشرقية بطعم الحلويات الغربية لكن بجد هي تجربة تستاهل لأن طعمها اكتر من رائع، يلا بسرعة شوفي المكونات وابدأي حضري معانا كنافة تشيز كيك بالفراولة

خطوات عمل كنافة تشيز كيك بالفراولة

مقادير الطبقة الاولى

  • نص كيلو كنافة ويفضل تكوني حطاها في الفريزر من قبلها بيوم
  • 3 معلقة كبيرة سمنة
  • ربع كوباية سكر بودرة
  • ربع كوباية ماية + 3 معالق كبيرة عسل

مقادير الطبقة التانية

  • 2 علبة قشطة
  • 2 كيس بودرة كريم شانتيه
  • 8 قطع جبنة كيري
  • نص كوب حليب سائل
  • نص معلقة صغيرة عصير ليمون

مقادير صوص الفراولة

  • ربع كيلو فراولة مجمدة
  • اربع معالق كبيرة سكر
  • نص كوباية ماية
  • معلقة صغيرة عصير ليمون
  • معلقة صغيرة نشا ذرة + 3 معالق ماية

تحضير الطبقة الاولى

  • فتتي الكنافة المجمدة كويس اوي لغاية ما يبقى طولها حوالي نص سنتيمتر ولو كانت الكنافة طازة مش مجمدة افرميها في محضرة الطعام او الكبة بس ماتخليهاش ناعمة اوي
  • اخلطي السكر البودرة والسمنة مع الكنافة المتفتتة ووزعيهم مع بعض كويس
  • افرديها في الصينية كويس واضغطيها بحيث تبقى رقيقة جدا
  • دخليها الفرن وحمريها كويس من فوق ومن تحت
  • خرجيها من الفرن واسقيها بكوباية الماية المذاب فيها العسل ووزعي السائ كويس بحيث يغطي كل الكنافة
الطبقة الاولى
الطبقة الاولى

تحضير الطبقة التانية

  • حطي القشطة في وعاء عميق وابدأي في خفقها بالمضرب الكهربائي
اخفقي القشطة
اخفقي القشطة
  • زودي بودرة الكريم شانتية واستمري في الخفق
زودي بودرة الكريم شانتيه
زودي بودرة الكريم شانتيه
  • زودي اللبن بالتدريج من غير ما توقفي المضرب وزودي كمان عصرة الليمون
زودي الحليب وعصرة الليمون
زودي الحليب وعصرة الليمون
  • دلوقتي حطي قطع الجبنة المتقطعة واخفقي كويس جدا لغاية ما الجبنة تدوب تماما
اخفقي الجبنة الكيري
اخفقي الجبنة الكيري

واخيرا ضيفي طبقة الجبنة على طبقة الكنافة ودخليها الثلاجة لمدة ما تقلش عن اربع ساعات

تحضير صوص الفراولة

  • في حلة صغيرة اخلطي الفراولة المجمدة بالسكر والليمون
تحضير الصوص
تحضير الصوص
  • زودي الماية وارفعيها على النار لما تبدأ في الغليان وطي النار وسيبيها تستوي على نار هادية جدا لمدة عشر دقايق
اغلي الفراولة على نار هادية
اغلي الفراولة على نار هادية
  • لما تحسي الفراولة بدأ تطري اضغطي عليها بالمعلقة الخشب كويس واهرسيها براحة
  • سيبيها تستهدى شوية وابدأي في تصفيتها في وعاء تاني
صفي الفراولة
صفي الفراولة
  • حطيها مرة تانية على النار ودوب معلقة النشا مع تلات معالق ماية
زودي النشا المذاب في الماية
زودي النشا المذاب في الماية
  • حطي النشا مه الفراولة وهدي النار وابدأي في تقليبها لغاية ما تحسي ان قوامها بدأ يتقل سيبيه يبرد وبعدين دخليها الثلاجة لغاية ميعاد التقديم
لما الصوص يبدأ يتقل طفي النار
لما الصوص يبدأ يتقل طفي النار

حطي التشيز كنافة في طبق واسع وزينيها بقطع الفراولة الطازة وصوص الفراولة البارد وقدميها

زينيها بقطع الفراولة وصوص الفراولة
زينيها بقطع الفراولة وصوص الفراولة