طريقة عمل الكنافة بالمانجو جميلة جدا
الكنافه بالمانجو من اجمل الاطباق اللي ممكن تدخل فيها الكنافة ويمكن بقالها كام سنة هي الاشهر في رمضان و وغالبا احنا كنا بنشتريها من برة لكن النهاردة احنا جبنالك طريقة عمل الكنافة بالمانجو بالخطوات التفصيلية والصور عشان تعمليها بنفسك في البيت وتفاجئي بيها عائلتك وضيوفك، لكن قبل ما نبدأ في كتابة طريقة العمل حنقول على ملحوظة مهمة بخصوص المانجو وهي ان المانجو الطازة احسن من المعلبة (الكمبوت) وكمان اختاري المانجو الناشفة شوية مش الطرية عشان تعرفي تقطعيها كويس ودلوقتي تابعي معانا الموضوع
طريقة عمل الكنافة بالمانجو
المقادير
كيلو كنافه
نص سمنة سايحة
ربع كوب سكر بودرة
شربات او قطر (كوب سكر + نص كوب ماية + قطرات ليمون + رشة فانيليا، بنرفعهم على النار مع بعض لغاية ما السكر يدوب كويس ونسيبه يغلي ويتقل وبعدين نطفي النار)
علبة عصير مانجو صغيرة معلبة
2 كيس بودرة كريم شانتية
3 ثمرات مانجو متقشرين ومتقطعين
طريقة التحضير
- جهزي الكريم شانتيه ودخليه الفريزر لغاية ما تحتاجيه
- افركي الكنافة مع السكر البودرة والسمنة السايحة كويس جدا
- اقسمي الكنافة على صنيتين متساويتين
- اضغطيها جامد عشان يبقى سطحها متساوي وتبقى رقيقة
- دخليها الفرن على درجة حرارة متوسطة وحمريها كويس من فوق ومن تحت
- لما تخرج الكنافة سيبيها تستهدى 5 دقايق
- حطي حوالي اربع او خمس معالق كبيرة من عصير المانجو على الشربات
- اسقي الصنيتين بالشربات المخلوط بالعصير وسيبيهم يتشربوا شوية
- حطي الجزء الاول من الكنافة في طبق كبير وواسع
- غطيه بالكريم شانتيه كويس
- حطي عليها قطع المانجو
- حطي الطبقة التانية من الكنافه وزينيها بالكريم شانتيه بقطع المانجو والمكسرات
- سيبيها في الثلاجة لغاية معاد التقديم
وعشان تنوعي في الطرق اللي بتقدمي بيها الكنافة في رمضان شوفي معانا المواضيع دي اقماع الكنافة و قوالب الكنافة وفي كمان الكنافة بالجبنة