ازاي تعملي لازانيا الفراخ بالخطوات
المكرونة بأشكالها من الاكلات المحبوبة عى السفرة العربية كلها وعشان التنوع مطلوب فإحنا جبنالك النهاردة طبق مميز جدا وشكل جديد من اشكال المكرونة وهو اللازنيا، طبعا الطبق ده معروف جدا عالميا ومشهور جدا والجميل فيه كمان ان هو سهل جدا في طريقة عمله، عشان كده بنقترح عليكي تقري الموضوع ده وتحاولي تعملي اللازنيا بنفسك في البيت وتنوعي من سفرتك بطبق لازانيا الفراخ الجميل
خطوات عمل لازانيا الفراخ
المقادير
- باكيت لازانيا
- حوالي 4 صدور فراخ فيليه
- بصلة صغيرة مبشورة
- صلصة طماطم (4 ثمرات طماطم مقشرة + فص ثوم صغير + ملح فلفل + معلقتين صلصة طماطم) اضربيهم في الخلاط كويس جدا وجهزيهم للاستخدام
- جبنة كريمي
- جبنة موتزاريلا مبشورة
خطوات التحضير
- افرمي الفراخ في الكبة وخليها خشنة مش ناعمة اوي
- في طاسة على النار حمري البصل مع رشة ملح ورشة فلفل
- حطي الفراخ المفرومة وقلبي كويس لغاية ما تتشرب مايتها وتستوي
- اسلقي اللازنيا في حلة مياه مع شوية زيت وملح
- في صينية التقديم حطي طبقة من الصلصة
- حطي طبقة من اللازانيا
- طبقة من الجبنة الكريمي والجبنة الموزاريلا
- حطي طبقة من الفراخ ووزعي عليها الصلصة
- كرري طبقة تانية من اللازانيا ثم الجبنة ثم الفراخ والصلصة
- وطبقة تالتة وغطي الوش بشرائح اللازانيا
- غطي الوجة بطبقة كبيرة من الصلصة والجبنة الموزاريلا
- غطي الطبق بورق الفويل ودخليه الفرن لمدة ربع ساعة
- شيلي الفويل وحمري الوش لغاية ما الجبنة تسيح
- قطعيها وقدميها
