ايس كريم في البيت سهل وطعمه ما يتوصفش
ايه رأيك تعرفي طريقة حلوة لعمل ايس كريم في البيت ، الايس كريم ده تقريبا مافيش حد في العالم كله مش بيحبه، النهاردة جيبنالك طريقة مميزة جدا لعمل ايس كريم في البيت وطعمها مختلف جدا، جربيه وخلي ضيوفك يدوقوا احلى ايس كريم مأكلوش زيه قبل كدة، والايس كريم اللي حنقدمه النهاردة حنستخدم في المانجو لكن لو انتي حابة تستخدمي نوع فاكهة اخر اختاري النوع اللي تحبيه، ممكن خوخ او موز او فراولة او غيرها على حسب ذوقك
طريقة عمل ايس كريم في البيت
حتحتاجي الى:
- ثمرتين مانجو
- نص لتر حليب
- معلقة كبيرة مليانة نشا ذرة
- نص كوب من بودرة الكاسترد بطعم الفانيليا
- 2 تين جاف متقطع صغير جدا
- 2 معلقة كبيرة مليانة زبيب
- معلقة كبيرة مليانة من الفستق المقشور المحمص
- نص كوباية سكر
- نص كوباية حليب مكثف
طريقة العمل
- قشري المانجو وقطعيها واضربيها في الكبة من غير اي ماية لغاية ما تبقى زي المعجون
- ضعي الحليب في حلة واتركيه على نار هادية جدا لغاية ما يغلي
- اول ما تبدأ الفقاقيع تظهر في الحليب، حطي السكر والحليب المكثف وقلبي كويس
- ضيفي التين والزبيب والفستق
- خدي نص كوب حليب ساخن دوبي فيه بودرة الكاسترد والنشا كويس جدا
- دلوقتي حطي خليط الكاسترد والنشا على الحليب اللي على النار
- استمري في التقليب لغاية ما الحليب يتقل طفي النار وسيبيه يبرد شوية
- لما الخليط يبقى في درجة حرارة الغرفة حطي عليه معجون المانجو وقلبيه كويس
- صبي الخليط في قالب الايس كريم المناسب
- دخليه الفريزر على الاقل 4 ساعات وبعدين قدميه
