طريقة عمل اقماع الكنافة بالحشوات المختلفة
من اشهر والذ الحلويات اللي بنقدمها في رمضان هي الكنافة، وتقريبا الكنافة هي ملكة الحلويات طول 30 يوم رمضان، وده اللي بيخلينا ندور على طرق متنوعة ومختلفة لتقديمها، ايه رأيك تجربي الكنافة الكورنية او اقماع الكنافة المحشية، في الموضوع ده حتعرفي طريقة عمل اقماع الكنافة وكمان حنقدملك اكتر من طريقة للحشو تختاري منها اللي تحبيه
خطوات و طريقة عمل اقماع الكنافة
المقادير
نص كيلو كنافة
زبدة او سمنة
اقماع معدنية او ورق فويل
شربات (قطر) : كوب سكر + نص كوب ماء + قطرات ليمون – قطرات ماء ورد او رشة فانيليا
طريقة عمل اقماع الكنافة
حافظي على شكل خصلات الكنافة بدون تقطيعها
خذي خصلة رفيعة من الكنافة وادهنيها كويس جدا بالزبدة او السمنة
لفيها على القمع كويس ابدأي من تحت واتجهي لفوق
ادهنيها سمنة تاني من برة
وحطيها في صينية مدهونة
كرري العملية مع كل الكمية
دخليها الفرن على درجة حرارة متوسطة 180 تقريبا
سيبيها عشر دقايق او اكتر لغاية ما يبقى لونها دهبي
خرجيها من الفرن وسيبيها تبرد خالص
طلعيها من القمع براحة وبحرص عشان ماتتفرفتش
اغمسيها في الشربات كويس
وبعدين احشيها بحاجة من الاتي
- كاسترد : نفذي التعليمات اللي على العبوة
- كريمة خفق : حطي كمية من الكريمة بودرة او سايلة واخفقيها لغاية ما تجمد
- كريمة شيكولاتة : نفس الخطوات السابقة بس حطي معاها معلقة كبيرة من الشيكولاتة السايحة او من النوتيلا
- قشطة: حطي كوب من اللبن مع معلقتين كبار سكر ومعلقة صغيرة من النشا وارفعسهم على النار، لما تبقى مهلبية ارفعيها عن النار وضيفي عليها علبة قشطة جاهزة وقلبيها كويس واحشي الاقماع
- زينيها بالفستق المفروم وقدميها بالهنا والشفا
