عجينة المخبوزات الهشة للحلو والحادق

اكيد كلنا بنحب المخبوزات وريحتها ولونها الذهبي الجميل، ودايما بنتفنن في اختيارها وشرائها، لكن هل فكرت قبل كده انك تعملي المخبوزات في البيت وبنفس جودة الافران، معانا النهاردة طريقة سهلة جدا لعمل عجينة المخبوزات والمميز فيها انك ممكن تحشيها حلو او حادق حسب رغبتك المهم تظبطي العجين وتخبزي صح، اما موضوع الحشو فده يرجع لاختيارك ورغبتك

طريقة عمل عجينة المخبوزات

• المقادير

3 كوب دقيق منخول

معلقة كبيرة خميرة جافة

رشة ملح

معلقة صغيرة سكر

معلقة صغيرة باكينج بودر

معلقتين زبدة او سمنة

معلقتين كبار لبن بودرة

كوب الا ربع ماء دافيء للعجن

• طريقة تحضير العجينة

في بولة حطي كوباية دقيق والخميرة والسكر والماية وقلبيهم بالمعلقة وسيبيهم عشر دقايق او ربع ساعة لغاية ما الخميرة تنشط وتطلع فقاقيع صغيرة

في وعاء تاني اخلطي كل المكونات المتبقية الدقيق والملح واللين البودرة والباكينج بودر، حطي عليهم معلقتين السمنة واقلبيهم بالمعلقة غاية ما يبقوا شبه الرمل

بعد ما يخمر الخليط الاول ضيفي المكونات اللي فاضلية عليه واعجنيهم كويس جدا ودي خطوة مهمة جدا جدا لأن العجين كل ما كان اطول كل ما كان احسن

 لو لقيتيها ناشفة او يابسة شوية ممكن تزودي شوية ماية دافية ولو لقتيها لينة وبتلزق في الايد زودي دقيق لغاية ما تبقى عجينة لينة ومش بتلزق

دلوقتي قسمي العجين 6 كور متساوية وسيبيه في صينية واسعة من غير ما تقربيهم من بعض وغطيه بفوطة نضيفة وسيبيه في مكان دافي من 50 دقيقة الى ساعة ونص حسب نوع الخميرة وحرارة المطبخ، لما تلاقي العجين بقى هش وحجمه تضاعف تعرفي انه اصبح جاهز

خطوات تحضير العجين 

على سطح مستوي في المطبخ رشي القليل من الزيت وافردي العجينة على قد ما تقدري ومش مهم لو اطرافها اتقطعت بس خليها رقيقة جدا

هاتي فرشة او باطراف اصابعك حطي طبقة خفيفة جدا من السمنة، ولمي طرف العجين اليمين وبعدين الشمال وحطي طبقة سمنة تانية، وبعدين حطي الطرفين اللي فوق واللي تحت وحطي شمنة حتلاق شكلها بقى مربع، حطيها على جنب

خدي كرة تانية وافرديها بنفس الطريقة بحيث تكون رقيقة جدا جدا، وادهنيها سمنة بسيط اوي وبعدين حيط في نصها المربع اللي عملي الاول، ولمي عليه اطراف العجينة اللي تحت وادهني سمنة بسيط مع كل قلبة

كده اول جزء بقى جاهز، كرري العملية مع الاربع كور اللي فاضلين بحيث يبقى عندك في النهاية تلات مربعات من العجين

دلوقتي شوفي البوم الصور واختاري الاشكال اللي تعجبك واشتغلي على العجين اللي انتي جهزتي، ممكن تخبزي العجين سادة من غير حشو وترشي عليه سمسم او حبة البركة وحيبقى زي الخبز تغمسي بيه حلو او حادق، اما لو عايزة تحشيه يبقى اختاري من الحاجات دي

اولا الحشو الحادق

• جبنة بيضاء بالبقدونس
• جبنة بيضاء بالزيتون المقطع او المهروس
• زيت زيتون وزعتر وفص ثوم مهروس
• خضروات (فلفل رومي مقطع صغير وطماطم – جزر مبشور وبطاطس مسلوقة ومتبلين بالملح والفلفل – اي افكار خضروات بتحبيها)
• لانشون لحمة او فراخ
• جبنة شيدر او رومي مبشورة
• جبنة موتزاريلا وبسطرمة
• جبنة كريمي او جبنة مثلثات
• سوسيس
• شاورما فراخ مع الطماطم والفلفل الرومي
• لحمة مفرومة عصاج

ثانيا الحشو الحلو

• مربى
• عسل نحل
• نوتيلا
• شيكولاته مطبخ سايحة
• سكر وقرفة
• تفاح مهروس مع القرفة والسكر
• فواكه مجففة (زبيب – مشمش – قراصيا)

ملحوظات الخبيز

بعد الانتهاء من تشكيل العجين سيبيه يخمر على الاقل نص ساعة واقصى حاجة ساعة عشان يبقى هش من الداخل ومش مكتوم

قبل الخبيز ادهني وجه المخبوزات بفرشاة المطبخ بالقليل من الحليب والسكر للحلو، او الحليب والزبدة للحادق

لما تبدأي في تشكيل العجين سخني الفرن على اقصى درجة حرارة، وبعدين تدخلي المخبوزات على حرارة متوسطة 180 و 200 درجه

باش تدهني الصينية اي مواد دهنية وتابعي المخبوزات اول ما لونها يبقى دهبي، طفي الفرن وشغلي الشواية شوية

لما المخبوزات تخرج حطيها في فوطة او علبة جواها فوطة وغطي وشها بفوطة تانية عشان ماتنشفش وفي نفس الوقت ما تعملش بخار ماية ويخلي شكلها مش حلو وبايش

لو بتحبي المخبوزات وبتحبي اشكالها نتمنى تشاركينا تجربتك وصور المخبوزات اللي نفذتيها