إزاي الجوزاء بيتعامل مع الأبراج التانية؟!

بقلمسارة جمال فيبرج الجوزاء visibility44716

اتكلمنا في مقالة قبل كده عن أهم مميزات برج الجوزاء وأسرار جاذبيته, النهارده حبينا نتكلم عن إزاي البرج الغامض المتقلب ده بيتعامل وبيتفق أو يختلف مع الأبراج التانية.

الجوزاء مع الأبراج التانية من أنجح علاقاته بتكون مع (الميزان, الدلو, الأسد, الحمل) ومن أصعبهم واللي بتكون محتاجة شغل وصبر عشان تنجح (العذراء والحوت).

إزاي بيتعامل الجوزاء مع الأبراج التانية؟!
إزاي بيتعامل الجوزاء مع الأبراج التانية؟!

يلا نبدأ نشوف توافق الجوزاء مع كل برج:

1- برج الجوزاء والحمل:

فيهم حاجات كتيرة مشتركة, الأتنين بيحبوا الحيوية والنشاط, بيحبوا انهم يعيشوا الحاضر ومبيفكروش كتير فالماضي. سريعين الملل وبيحبوا التغيير والتجديد عشان معندهمش صبر.وهم الاتنين عندهم حب للحرية ومعندهمش قابلية انهم يستحملوا الخنقة أو الضغط.

أوقات لما الجوزاء يكون بيناقش موضوع مع الحمل, بيتفاجأ إن الحمل زهقان أو معندوش صبر يكمل النقاش, ولازم الجوزاء يكون حذر فالوقت ده ويدي الحمل مساحته وممكن يرجع للمناقشه في وقت تاني. والمشكلة ده سببها إن الجوزاء خياله خصب وعنده أفكار ونظريات كتيره مش موجوده عند الحمل ولأن الحمل صبره ااقل من الجوزاء.

نوع العلاقة: عندكم تناغم وتعاون وفيه بينكم حاجات كتيرة مشتركة, بتقدروا بعض ومن السهل جدا انكم تنجحوا مع بعض عاطفيا.

2- برج الجوزاء والثور:

الثور هو برج متزن, ثابت ومستقر, طبعا الصفات ده كلها مش موجودة في الجوزاء. الثور بينجذب جدا للجوزاء , بيبحوا خفة دمهم, ذكاءهم والنشاط اللي عندهم بس في نفس الوقت بيتضايقوا جدا من التغيير والتجديد اللي الجوزاء بيحب يعيشه.

الجوزاء في أي نقاش بتلقيه دخلك في 100 موضوع في نفس الوقت على عكس الثور اللي بيحب يحلل ويفكر ويدي كل موضوع وقته. عشان كده تلاقي وقت اتخاذ قرار مهم, الثور بيحب يتمشي على البحر ويفكر عشان يعرف يوصل لقرار لكن الجوزاء عايز تكلم مع أكتر من شخص عشان يعرف يوصل لقرار.

نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, انتوا لازم تتعلموا إزاي تحترموا الاختلاف وإزاي تقدروا تظبطوا العلاقة والموضوع محتاج شوية مجهود.

3- برج الجوزاء والجوزاء:

طبعا الجوزاء مع بعض علاقة رائعة, هما الاتنين فضوليين, بيبحوا التجارب والتغير, متكلميين وبتستمتعوا بعلاقتكم مع بعض لأقصى الحدود.

نقاط الضعف: طبعا الملل الزيادة وسرعة التخلي عن الشيء فالمواقف الصعبة وتحت الضغط, لما بتبقوا أنتم الاتنين جوزاء الموضوع بيبقي صعب جدا, عشان مفيش واحد فيكم بيشجع التاني لانه هو نفسه بيبقي محتاج اللي يشجعه, وبرده زي ما اتكلمنا قبل كده عن ذكاء الجوزاء وحبه لاختبار اللي حواليه, الموضوع ده بيبقي مرهق وبيسبب مشاكل كتير لما اتنين جوزاء يكونوا بيتعاملوا بالطريقة ده مع بعض.

تاني نقطة ضعف موضوع الصراحة الزيادة اللي عند الجوزاء, لما يكونوا الاتنين صرحه قوي كده مع بعض بيبقي دايما في موجهات قاسية من الطرفين وديه ساعات بتتعب, ساعات الواحد مش بيحب يسمع الصراحة أو بيبقي حابب يسمعها بشكل ميأذيش مشاعره.

نوع العلاقة: قوية جدا! لأنكم بتبقوا فاهمين بعض كويس قوي كأنه كتاب مفتوح…

4- برج الجوزاء والسرطان:

السرطان هو الشخص اللي بيهتم بمشاعر الأخرين حتي لو على حساب نفسه, بيسأل على كل الناس, بيهتم بكل الناس وبيسمع ويحاول يحل مشاكل كل اللي حواليه.

السرطان بيهتم قوي بالذكريات والماضي , بيحب دايما يبقي على إتصال بالصحاب القدام و ينبسط ويرتاح وهو في الأماكن القديمة, ده طبعا على عكس الجوزاء زي ماذكرنا أكتر من مرة.

السرطان عاطفي أكتر وبيحب دايما في كلامة أو في طرق حله للمشاكل إنه يركز على جزء المشاعر والاحاسيس على غير الجوزاء اللي بيحب يركز عليها فكريا عشان الجوزاء بيبقي عنده نظريات كتيرة وطبعا موضوع صراحة الجوزاء اوقات كتير بيبقي صادم شوية للسرطان.

فيه نظريات بتتكلم عن انجذاب الأضداد “يعني الناس المختلفة” وبنلاقي النظرية ديه صح قوي في حالة الجوزاء والسرطان, السرطان بيحب ذكاء الجوزاء وطريقة تفكيره والجوزاء بيحب العاطفة والعمق اللي عند السرطان. من الواضح إن بين البرجين دول حاجات كتيرة قوي ممكن يتعلموها من بعض.

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, بس بمجرد إن ده يحصل علاقتكم هتكون رائعة عشان هتكملوا بعض.

ممكن تعرفوا أكتر عن برج السرطان من هنا

5- برج الجوزاء والأسد:

هما الاتنين بيبحوا الحياه, المرح, الاستكشاف والمغامرة وده بيبقي باين قوي وهم مع بعض, بيحبوا الدراما ” الافوره يعني :) ” وبيحبوا الألوان. الجوزاء مفكر أكتر من الأسد, والأسد بيبقي عايز يكون اهم شيء في حياة الجوزاء بغض النظرعن كل علاقات ونشاطات الجوزاء, الأسد عنده ولاء قوي جدا وبمجرد إنه يلاقي حد بيحبه أو يرتاح ليه الأسد عمره مابيسيبه.. وده صفه على عكس الجوزاء شوية اللي بيحب التغير والتجديد, الأسد مش بيفهم ولا بيقدر الحته ده في شخصية الجوزاء.

نوع العلاقة: الأسد والجوزاء ينفعوا أصحاب أقويه جدا, فيه بينهم تناغم واتفاق ولو حبوا بعض يقدروا يكونوا عشاق متوافقين جدا.

6- برج الجوزاء و العذراء:

الاتنين مفكرين وعقلهم بيغلب على عاطفتهم, بيحبوا يتكلموا مع الناس وبيحبوا خفه دم بعض, العذراء افكاره إلى حد ما ليها هدف مش مجرد لعب بالنظريات واختبار الأخرين زي الجوزاء.

الجوزاء بيحب المخاطرة والتجربة على عكس العذراء تماما اللي شديد الحرص والحذر.

نوع العلاقة: التفاهم مابينكم صعب إلى حد ما, وفيه احتمال انه يحصل مابينكم اختلافات كبيره, العلاقة محتاجه مجهود جامد من الطرفين عشان تنجح وتكمل.

7- برج الجوزاء والميزان:

عندهم اتصال عقلي وتفهم قوي جدا, بتحبوا وبتحترموا ذكاء, خفه دم وستايل بعض, بتحبوا الاختلاط والمحادثه مع الناس, انتوا الاتنين بتبحوا تختاروا شريك حياتكم يكون صديق قبل مايكون حبيب.

الميزان بيحب جدا إنه يسعد شريكه, سواء كان جوزاء أو غيره, عنده استعداد قوي للبذل والعطاء.

نوع العلاقة: علاقة مثيره وناجحة , بينكم تفاهم قوي وكافي وبينكم اختلاف بيجذبكم لبعض ويخلي علاقتكم كلها اثارة.

8- برج الجوزاء والعقرب:

مختلفين! العقرب بيقرب ويرتاح بس لناس معينة وأماكن معينة, وبيحس إن الجوزاء مصطنع وطفولي والجوزاء بيحس إن العقرب معقد , متطلب وغير مفهوم. 

الاختلاف بينهم يتضمن اختلاف كمان في اسلوب الحياه ويحتاج إلى جهد عشان تحولوا الاختلاف ده لحاجه تكملوا بيها بعد ومش حاجة تختلفوا بيها مع بعض.

نوع العلاقة: متناقضين بس لو انجذبوا لبعض بيبقوا تأثير مغناطيسي قوي وبيبقي صعب انكم تحددوا إيه سبب الإنجذاب, محتاجين شغل جامد عشان العلاقة تستمر.

9- برج الجوزاء والقوس:

فضوليين, بتحبوا التجديد وبتحبوا الحياة, مغامرين, بتملوا حياة بعد بالمفاجآت والتحديات الجديدة, بتستمتعوا قوي بحياتكم مع بعض.

القوس فلسفي وبيحب التخطيط والنظام, وشخصيته قوية جدا, الجوزاء بينجذب لأفكار القوس وبتثير اهتمامه, من النادر إنك تلاقي اتنين بيفكروا فكر مختلف وفي نفس الوقت عندهم استعداد يسمعوا بعض كويس ويستفيدوا ويغيروا افكارهم عشان بعض. والتجاذب ده بنلاقيه في اقوي صوره بين الجوزاء والقوس. 

حب الحرية مهم جدا للاتنين وهم بيعرفوا يدوه لبعض وده بيخلي علاقتهم دايما فيها اشتياق وتجديد.

نوع العلاقة: ناجحة ومثيره وفيها تفاهم ومرونه.

10- برج الجوزاء والجدي:

مختلفين, الجدي بياخد الحياة بالتخطيط والصبر على عكس الجوزاء. الجدي بيحب يعمل لنفسه خطط على المدي الطويل, بيخطط لسنين قدام يعني, مخلص جدا ويعتمد عليه, الجدي متحفظ الي حد كبير بيحسسك انه واخد دور الاب والأم في الحياة, على عكس الجوزاء اللي بياخد دور الطفل المحب التجربة والاستكشاف.

نوع العلاقة: متناقضين ومختلفين, صعب انكم تقتنعوا بشخصية بعض, بس لو حصل ما بينكم انجذاب بيكون قوي وبتقدروا تغيروا وتأثروا في شخصيات بعض.

11- برج الجوزاء والدلو:

اهدافهم ونظرتهم للحياة متشابهه جدا, عندهم إتصال عقلي قوي, بيبحوا خفه دم بعض وبيحبوا يلعبوا بالافكار والمنقاشات, التفاهم الفكري مهم ليهم هما الاتنين وفي العلاقة ما بينهم بيحسوا انهم لقوا شريك قادرين يتفاهموا ويستمعوا بالحياه معاه, فيه احتمال قوي لصداقتهم مش بس حبهم لبعض.

نوع العلاقة: أي علاقة فالدنيا فيها تحدي بس أنتم بتشاركوا بعض علاقة كاملة وسعيدة وده بيغطي على أي تحديات موجودة ما بينكم.

12- برج الجوزاء والحوت:

عقول متفتحه, صراحة, المشكلة إن هما الأتنين بيحبوا التغير وسهل قوي انهم يتغيروا, عشان كده لو ديه بداية علاقة انتوا لازم تفكروا كويس جدا قبل ماتستمروا..

الجوازء بيفكر فالمشاكل بشكل عقلي أكتر من الحوت اللي بيفكر دايما عاطفيا وفي نوايا الناس اللي حواليه, الجوزاء بيحب النقاش على عكس الحوت وهتلاقيه في ساعات بيحاول يجبر الحوت انه يدخل نقاش معاه. الحوت معندوش قدره على التعبير والإقناع زي الجوزاء مع انه من جواه عنده حكمه وعمق بس هو مش بيعرف يعبر ويطلع ده. عشان كده بنلاقي إن الجوزاء بيشوف الحوت غامض وغير مفهوم والحوت بيشوف الجوزاء عصبي ودايما بيثير توتره.

نوع العلاقة: علاقة صعبة جدا واختلاف كبير! لازم محاوله للتغيير والمرونه من الطرفين, ولازم الجوزاء يظهر صبر على الحوت ويساعده ويسهل عليه انه يظهر مشاعره ويطلع اللي جواه في نفس الوقت يحاول شويه بشويه انه يحس أكتر بالجزء العاطفي اللي عند الحوت.

في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…

نتمنى إن الموضوع يكون عجبكم وفعلا استفدتم منه.

اقروا كمان: اللبقة متعددة الوجوه: انثى الجوزاء

الاجتماعي المحير: رجل برج  الجوزاء

 7 أسباب ليه الجوزاء شخص ما يتنسيش!!

أهم 5 أسباب لجاذبية برج الجوزاء

ايه هي عيوب برج الجوزاء؟!