طريقة تنظيف الثلاجة والحفاظ عليها
تعتبر الثلاجة من اهم الاجهزة الكهربائية في البيت ولا يمكن الاستغناء عنها، والحفاظ على الثلاجة ونظافتها يضمن الحفاظ على صحة افراد العائلة بجميع افرادها وده لأن الثلاجة هي مخزن الاكل والشرب اللي بيستغله افراد البيت، وممكن تفتكري ان ثلاجتك نظيفة او مترتبة لكن في الحقيقة الثلاجة بتحتاج للنظافة بشكل دوري عشان مايتكونش فيها بكتريا وجراثيم، تابعي معان الموضوع ده واعرفي ايه هي طريقة تنظيف الثلاجة بشكل صحيح
طريقة تنظيف الثلاجة خطوة خطوة
اول حاجة حنعمليها قبل تنظيف الثلاجة هي تجهيز المنظف، والثلاجة بتحتاج لمنظف قوي عشان نتخلص من البيكتريا والجراثيم، وبنحتاج كمان ليفة نضيفة ماستخدميتهاش قبل كده، وفوطة ناشفة ونضيفة
احتياجات منظف الثلاجة
- كوبين من المياة
- كوباية من الخل الابيض
- ملعقتين من الصابون السايل
- خمس نقاط من زيت القرفة او زيت البرتقال
- حطي المكونات في بخاخة ماية فاضية وحضريها للاستعمال
اما بقى خطوات التنضيف فهي كالتالي
- افصلي التيار الكهربي عن الثلاجة
- خرجي كل الاواني برة الثلاجة
- اخلعي كل الارفف اللي ينفع تتخلع وحطيها في الحوض واغسليها بالماية والصابون
- ماتنسيش تكرري نفس الحكاية في الفريزر كمان
- ابدأي باستخدام المنظف اللي عملتيه رشية على كل الجوانب بتاعة الثلاجة
- ادعكي كويس بالليفة النظيفة
- امسحي داخل الثلاجة بالفوطة النظيفة وجففيها كويس
- نشفي الارفف ورجعيها مكانها
- قبل ما ترجعي الاكل في الثلاجة، اتأكدي من تاريخ صلاحية كل حاجة
- شيلي الاكل في علب نظيفة محكمة الغطاء وبلاش الحلل جوة الثلاجة
- بلاش كمان الكراتين زي كرتونة البيض، حطي البيض في المكان المخصص له في باب الثلاجة او حطية في بولة كبيرة مفتوحة
- ماتنيسش في النهاية انك تمسحي باب الثلاجة من برة وخصوصا مقابض الابواب لأنك بتمسكيها كتير وانتي بتبخطي واكيد مليئة بالبكتريا والجراثيم
الحفاظ على نظافة الثلاجة بعد تنظيفها
ودلوقتي بعد ما نضفتي الثلاجة واتخلصتي من كل الزحمة والحاجات اللي مش مستخدمة، اعرفي ازاي تحافظي على نظافتها وعلى ريحتها حلوة
- ماتدخليش اي اكل مكشوف في الثلاجة، استخدمي ورق الاسترتش لو حتدخلي حاجة في اطباق
- تجنبي الاحتفاظ بالاكل في الحلل، يفضل تستخدمي علب بلاستيك او زجاج محكمة الاغلاق
- امسحي اي حاجة تتكب جوة الثلاجة اول بأول قبل ما تنشف وتبقى صعبة الازالة
- راجعي على الخضار والفاكهة اللي في الثلاجة واتخلي من الفاسد منها قبل ما تفسد غيرها
- لو في اكل تاريخ صلاحيته متفاوت قديم وجديد زي علب الزبادي مثلا خلي القديم اقرب للاستخدام من الجديد
- في الفريزر احتفظي باللحمة والدواجن والسمك على الرف السفلي، والعيش والمجمدات على الرف العلوي، الايس كريم والثلج الجاف في باب الفريزر
- حطي ملعقتين من البن المطحون في طبق مفتوح في الرف السفلي من الثلاجة عشان يمتص اي روايح كريهة، او ممكن تستبدليه بقطعة فحم، او نص كوباية كربونات الصوديوم مخلوط مع 20 قطرة من زيت القرفة او زيت البرتقال
- اهتمي بتنظيف الثلاجة مرة واحدة على الاقل في الاسبوع
ماتنسيش ان الحفاظ على نظافة الثلاجة هي الخطوة الاولى للحفاظ على صحة اسرتك
