تجديد الحياة الزوجية .. ضرورة مش رفاهية
الحياة الزوجية مليئة بالمسئوليات والاعباء الملقاه على الطرفين الزوج والزوجة، مشاغل وحكايات وحوارات ومشاكل المصاريف والولاد والاهل والمدارس وغيرها وغيرها، لكن هي في الاساس قايمة على زوجين بينهم عشرة ومحبة، عشان كده تجديد الحياة الزوجية بين الطرفين دول ضروري جدا
يعني لازم نقف مع نفسنا بين فترة والتانية ونفتكر الحقيقة دي ان كل واحد فيما بيستمد قوته من وجود التاني، البعد والانشغال عن الطرف الاخر بيخليه يستسلم لأفكار سلبيه، يا ترى انا اتجوزت الشخص الغلط؟ يا ترى انا كان مصيري اقابل حد يحبني بجد؟ وممكن كمان يخلينا نزهد البيت والحياة الاسريه زي القعاد لفترات طويلة في بيت الاهل من غير سبب مقنع او اللجوء للاصدقاء والمقاهي والسهر بره البيت لمجرد البعد عن الضغط النفسي الموجود فيه
المشاعر دي طبيعية جدا، وبتحصل في كل بيئة وفي كل ثقافة وفي كل ظروف، لكن لازم ناخد بالنا منها من اول ما تبدأ تتسرب لحياتنا، اكيد المسئوليات والاعباء مش حتسيبلنا مساحة كبيرة عشان نفكر في المشاعر القديمة واهمية تجديدها، لكن ممكن نشوف الموضوع بطريقة تانية، ان البعد والجفاء والاحساس بغياب الطرف الاخر ده حيخلينا نقصر في مسئولياتنا دي، وحيخلينا نستسلم لحالة من الاكتئاب والملل اللي ممكن تخلينا نكره الطرف الاخر او على الاقل ننصرف عنه نفسيا
تجديد الحياة الزوجية وتخفيف الضغط النفسي
الحل مش صعب لكن محتاج صبر وايمان بأهمية الموضوع، اكيد الولاد مهمين وهما الاهتمام الاول في حياتنا، واكيد كمان المصاريف والشغل والعلاقات العائلية والاجتماعية مهمة، لكن ممكن ندي لعلاقتنا الزوجية كمان شوية وقت، تابعي الخطوات دي وحاولي تنفذيها وحتحسي بفرق كبير في احساسك ومشاعرك تجاه البيت والزوج والمسئوليات
الصراحة والحوار
- ماتحسيش ان التفكير في الحكاية دي تفاهة او رفاهية لأ بالعكس، علاقتك بجوزك هي الركيزة الاساسية اللي البيت قايم عليها، يعني لو حسيتي ان جوزك بدأ يتغير من ناحية البيت وبيهرب بالخروج او العكس انتي حسيتي ان البيت عبء عليكي وعايزة تخرجي او تهربي من الكلام مع جوزك يبقى لازم تعترفي ان في مشكلة، وضروري جدا ان انتي تتكلمي معاه وقتها وتشرحي مشاعرك وتحاولوا تدوروا سوا على حل يرجع الامور لطبيعتها
وقتكم الخاص بيكم لوحدكم
- خلي لكم وقت مع بعض ماتتكلموش فيه في اي مشاكل او مواضيع فيها جدل، يعني سهرة قدام التليفزيون، مشروب في البلكونة ساعة العصر، او حتى ربع ساعة قبل النوم تسأليه فيها عن صحته واخباره وخططه ومشاعره وتتكلمي فيها عن مشاعرك، بس اوعي تجيبي سيرة المدارس والولاد او كلام الجيران او سيرة القرايب، اتكلمي عن نفسك وعن مشاعرك وعن حياتكم بس
اندهيله بإسمه
- مايمنعش وانتي بتتكلمي معاه خلال اليوم انك تناديله بإسمه اكيد بدأ ينسى اسمه من كتر ما بتقولي بابا او حاج او حتى حبيبي، لما تكلميه بإسمه حينتبه لكلامك اكتر، ولما تكلميه بصيله مش لازم تكوني مشغوله في حاجة تانية او بتبصي في الموبايل او التلفزيون او حتى مذاكرة الولاد، حسسيه انك بتكلميه هو وان هو مهم زي الولاد وزي الطبيخ وزي المسئوليات دي، لأن في الحقيقة هو له حق عليكي اكتر من اغلب الحاجات دي
مساحة الحرية
- شجعيه على الخروج مرة في الاسبوع لوحده مع اصحابه، وكلميه وهو برة البيت اسأليه اذا كان مبسوط ولا لأ، حسسيه انه من حقه شوية وقت لنفسه، وانتي كمان اخرجي مع صاحبتك او حتى مرة في الاسبوع زوري اهلك لوحدك من غيره بس طبعا بعد الاتفاق معاه، احساس ان لكل واحد مننا وقت خاص بيه لوحده ده بيدي دفعة نفسيه حلوة عشان نستمر في الضغوط والمسئوليات بنفسية افضل
لحظاتكم الخاصة
- جددي من حياتك الخاصة، جنب مشاكل الولاد واهتمامك بيهم وبمسئولياتهم، اسرقي لنفسك ولجوزك لحظات حلوة جددوا فيها مشاعركم اهتمي بنفسك وبمظهرك واقضوا وقت بعيد عن المشاكل والاعباء مع بعض، فكريه بذكرى حلوة من ايام الخطوبة فكريه بموقف حلو مر عليكم وقوليله نفسي حياتنا تكون كده على طول اتكلمي بإيجابية واوعي تشتكي او تتكلمي في مشاكل او حكايات تخص اي حد غيرك انتي وهو في اللحظات دي
في النهاية لو بصينا على الصورة كاملة مش حنلاقي حياة خالية من المشاكل والضغط، لكن اسلوبنا احنا في التعامل مع الضغط هو اللي بيزوده او بيقلله، عشان كده خففي اسباب التوتر والعصبية على نفسك وعلى زوجك وخليكي صريحة معاه قوليله ان هو اتغير او ان انتي مضغوطة والتوتر مأثر على نفسيتك ومشاعرك، وجددوا الحب والمشاعر القديمة عشان تحافظوا على حياتكم مستقرة
