افكار هدايا لخطيبك او زوجك .. تجنن

أنجي سليمان
أنجي سليمان
127024

المناسبات اللي بنحتاج نقدم فيها الهدايا للخطيب او الزوج كتيرة ومختلفة زي عيد الميلاد عيد الحب او عيد الجواز او حتى عشان نحسسه بالشكر والامتنان لوجوده معانا، لكن كل مرة بنقع في نفس الحيرة حنجيب ايه؟ ويمكن ده لأن الاختيار محدود في الهدايا المخصصة للشباب او الرجال، بس حتى لو الافكار مكررة انتي تقدري تضيفله لمسه من عندك تخليها مميزة جدا واحنا هنا جمعنالك شوية افكار هدايا لخطيبك او جوزك حتساعدك تخلي المناسبة ماتتنسيش.

قبل ما نتكلم عن الهدايا نفسها، حنتكلم في شوية نقط سريعة حتفيدك جدا عند اختيار الهدية، وهي طريقةاختيار الهدية اللي حتخلي هديتك مميزة وحتخليه يفرح بيها ويقدرها.

طريقة اختيار الهدية

لازم تعرفي كويس اهتماماته يعني مثلا بيحب الكورة، بيحب الخروج، بيهتم بمظهره، بيهتم بعربيته، وطبعا اكيد انتي عارفة هو رومانسي ولا عملي، بيحب المفاجأت ولا لأ .. يعني باختصار فكري شوية في طبيعته وحتلاقي نفسك بدأتي توصلي للحاجة اللي انتي عايزاه. ولو محتاجة مساعدة في موضوع شخصيته شوفي من هنا أفكار هدايا لكل رجل علي حسب برجه 

الحاجة التانية المهمة هي ميزانيتك يعني لازم تحددي السعر اللي انتي بتتحركي فيه او المبلغ اللي تقدري تصرفيه في مناسبة زي دي عشان تعرفي اختيارك مناسب ولا لأ.

طبيعة المنابة اللي حتقدمي فيها الهدية كمان عليها عامل كبير، يعني عيد الميلاد بتبقى الهدية شخصية له هو غير عيد الحب اللي بتبقى الهدية فيه رومانسية اكتر وفيها تقدير لعلاقتكم سوا.

افكار هدايا لخطيبك 1
افكار هدايا لخطيبك 1

افكار الهدايا

اما بقى الهدية اللي حتتقدم نفسها فده حيتحكم فيها النقطة الاولى اللي اتكلمنا عنها في البداية اللي هي اهتماماته وطبيعته وحنبدأ الاول بالهدايا اللي مش مكلفة

  • لو بيحب البلايستاشين ممكن تجيبي جويستيك وتقوليله ان ده عشان لما يكون بيلعب مع صحابه ومبسوط يفتكرك ومينساكيش.
  • لعبة كمبيوتر او بلايستيشن لو كانت دي من اهتماماته.
  • جمعي صوركم سوا في البوم صور وحطي في اول صفحة من الالبوم ميموري كارد من بتاعة الموبايل حطي عليها اغانيكم المفضلة.
  • هاتيله محفظة جلد وحطي فيها صورتك وورق صغير مكتوب فيه كلام رومانسي تعبري فيه عن مشاعرك.
  • اطبعي صوركم على مج و خدادية وهاتي معاهم منبه عشان تبقى كل حاجة في اوضته بتفكره بيكي.
  • كتاب او رواية جديدة للكاتب اللي هو بيحبه.

اما بالنسبة للهدايا الاغلى شوية وطبعا الهدية قيمتها في معناها مش في تكلفتها، لكن لو كانت ميزانيتك تسمح تقدري تجيبي حاجات تانية زي مثلا:

  • ماكينة حلاقة كهربائية.
  • تي شيرت او بلوفر من الماركة اللي هو بيحبها او كرافته على ذوقك.
  • ساعة حلوة تليق مع ستايل اللي بس بتاعة كاجوال او كلاسيك.
  • جهاز بلايستيشن لو كان ده اهتمامه.
  • اكسسوارات للعربية زي مثلا فرش كامل للعربية من جوه وفي افكار كتير عند محلات كماليات السيارات ممكن تتفرجي وتشوفي ايه اللي حيعجبه منه.
  • اشتري مشغل اغاني وفيديوهات وحطيله عليه اغانيكم وصوركم سوا.
  • جهاز رياضي لو هو مهتم بجسمه ووزنه واختاريه على حسب ميزانيتك.

طبعا كل الافكار دي محتاجة طريقة حلوة لتقديمها، ويمكن طريقة التقديم اهم من الهدية نفسها وحتلاقي هنا برضه شوية افكار على حسب ميزانيتك وطبيعة علاقتكم سوا زي مثلا بتحبو الهدوء والاماكن الهادية او بتحبو الخروج والدوشة او مثلا لو بتفضلو الاحتفال في البيت.  

طريقة تقديم الهدية

افكار هدايا لخطيبك 2
افكار هدايا لخطيبك 2
  •  احجزي عشاء في مطعمكم المفضل او في مطعم هادي بيقدم اكلاته المفضلة وبعد العشاء ممكن تقدمي الهدية.
  • اتقابلو في المكان اللي اتعودتو تتقابلو فيه وممكن تاكلوا اكل انتي طبختيه بنفسك وبعدها قدميله الهدية.
  • اعمليله سلسلة مفاجآت وقسمي الهدية تلاته ابعتي حاجة على الشغل وحاجة على البيت والتالة لما تقابليه تديهاله بس خلي بالك من اسلوب تفكيره وفكري لو كان ده حيبسطه ولا حيحرجه.
  •  لو هو متوقع الهدية في يوم معين زي عيد ميلاده استني يومين كأنك ناسية واعمليله مفاجأة.
  •  قبل معاد المناسبة بيومين او تلاتة اطلبي منه تروحي مطعم معين وتكوني متفقة مع المطعم لما تخلصو العشاء يطفو الانوار ويقدمو التورتة.
  • لو هو رومانسي، هاتي صندوق هدايا شكله حلو وحطي فيه ورق ملون صغير مكتوب فيه كلام رومانسي وحطي معاه الهدية اما لو هو مش حيهت بحاجة زي دي ممكن تخبزي بسكويت في البيت او كب كبيك وتحطيه في صندوق حلو وتقوليله انك عملاه عشانه.

في النهاية افتكري انك ممكن تقدمي هدية تذكارية او بسيطة لكن طريقة تقديمها وتوقيت التقديم ده حيخليها ذكرى ماتتنسيش.

مقالات متعلقه

11 هدية تكنولوجية ممكن تجيبيها لشريكك

11 هدية تكنولوجية ممكن تجيبيها لشريكك

افكار هدايا انيقة ومش مكلفة لشريك حياتك

افكار هدايا انيقة ومش مكلفة لشريك حياتك

افكار تجنن للاحتفال وتقديم هدايا الفلانتين

افكار تجنن للاحتفال وتقديم هدايا الفلانتين