أسوأ 6 جمل مش بنبقي قادرين نسمعها بعد الإنفصال!
من أصعب الأوقات اللي بتعدي في حياة الإنسان هو وقت الإنفصال, لما شخص يشعر بأن حياته بتتفكك وبيتعرض لجرح كبيروبيبقي بيحاول إنه يخف منه بأي طريقة.
وقتها الإنسان بيلجأ لاقرب الناس ليه, صحابه أو عيلته وبيحاول يتعكز عليهم لغايه لما المحنة ده تعدي. بيحاول إنه يلاقي حكمه أو تشجيع.
بس للاسف فيه جمل معظمنا بنستعملها عشان نشجع بيها بعض في المواقف ده بس الجمل ده فعلا مش بتخفف الشعور بالألم والضيق , حبينا نشارككم العبارات ده عشان تتجنبوا تقولها وتستبدلوها بجمل فعلا ممكن تعمل فرق:
1- “الحياة هتستمر وإنتي هتنسي وهتبقي كويسة”:
كلنا عارفين إن الحياة هتستمر بس بعد الإنفصال الواحد مش بيبقي شايف ولا فاهم حاجة وفي دماغة حاجة غير سؤال واحد بس” أنا ليه حصل معايا كده”.
2- “إنتي تستاهلي أحسن منه”:
طبعا ديه مجاملة حلوه ولطيفه, بس صدقوني في الموقف ده بيبقي لسة فيه مشاعر والحب لسة منتهاش عشان كده أي كلمة جارحة عن الشريك بتبقي صعبة والواحد مش بيبقي قادر يسمعها أو يستحملها.
3- “كل حاجة بتحصل لسبب”:
أكيد كل حاجة بتحصل لسبب, بس لو أنت مش عارف السبب ده دلوقتي يبقي الجملة ده مجرد كلام في الهوا, طيب ما العلاقة اللي كانت مابينا ديه برده أكيد كانت لسبب, طيب إيه سبب الإنفصال بقي؟!
4- “كده أحسن, استمتعيليك بكام يوم حرية كده “:
ايوة أكيد الحرية حلوة وممتعة, بس هو من قال إنها أحسن من إني ابقي في علاقة؟! كل حاجة ولها مميزتها وعيوبها, وبعدين لو الحرية حلوة قوي كده, طيب كانت فين النصيحة ديه من زمان؟
5- “سيبك منه, في غيره كتير وبكره يجيلك سيد سيده!”
طيب أنا مش عايزة سيد سيده, أنا عايزة هو ومش عايزه غيره, أنا مش قادره أشوف أي حد في حياتي دلوقتي غيره ومجرد محاوله إني اتخيل نفسي مع حد تاني ديه بتوجع قوي.
6- “أنا عمري ماحبيته أصلا”:
طبعا الجملة ديه بتخلي الشخص اللي بينصح بيفقد مصدقيته تماما! إزاي عمرك ماحبيته وإزاي كنت بتتعامل معاه حلو قوي كده؟ هزار وغدوات ومكالمات تليفون؟ وبعدين طالما عمرك ماحبيته ليه مقلتش كده من زمان؟ ليه جاي تقول كده دلوقتي بعد الإنفصال! وإزاي أنا ممكن اثق في كلامك تاني في أي حاجة بتقولهالي؟!.
