فساتين صيف 2015 منتهى الشياكة

بقلمأنجي سليمان فيموضة وأزياء visibility1737

يعتبر الفستان هو قطعة اللبس الأسهل والاشيك في الدولاب، وده يمكن لأن لبس الفستان دايما بيدي المظهر الأنيق والجذاب، واكيد كلنا ملاحظين أن الفساتين بقالها اكتر من صيف موجودة على خريطة الموضة، لكن الصيف ده بالتحديد الفساتين موجودة بموديلات اكتر من السنين اللي فاتت، وعشان كده جيبنالكم طرق لبس الفساتين وموضتها من نصائح خبراء الازياء لصيف 2015 اتفرجي معانا على فساتين صيف 2015 منتهى الشياكة

فساتين صيف 2015
فساتين صيف 2015

الألوان

السنة دي الوانها متنوعة جدا عشان ترضي جميع الأذواق، لكن اول حاجة بتيجي في قايمة الموضة هي اللون الكاكي، وبعدها درجات الملابس المموهة والالوان الترابية وكمان درجات الازرق، الالوان دي هي الاكثر انتشارا بالنسبة للفساتين طبعا غير اللونين اللي مش حنختلف عليهم زي الابيض والاسود، اما لو كنتي بتحبي الالوان المبهجة فالصيف ده مليان بهجة مع الفساتين المشجرة بدرجات الوان مختلفة وتصاميم مختلفة زي الدواير والخطوط او حتى الورود

الخامات

الخامات كمان متنوعة زي الالوان ولكن بنلاقي الخامات الشبابية هي اللي غالبة على تصاميم الفساتينن والصيف ده بيشهد رجوع الفساتين الجينز بقوة كبيرة، كمان حنلاقي اقمشة زي الجبردين والاقمشة القطنية التقيلة، اما لو كان زوقك بعيد عن الخامات دي فحتلاقي في موديلات ارق غالب عليها الدانتيل واللينو وطبعا الشيفون

الموديلات

بالنسبة للموديلات فبيعتبر مصممين الازياء ان 2015 انعكاس لموضة السبعينيات في حاجات كتير عشان كده حنلاقي الفساتين اللي بكم والفضفاضة راجعة موضة جدا ممكن تشبه شوية القفطان المغربي، وكمان في الفساتين القصيرة والمتوسطة كلها موجودة في بيوت الازياء العالمية الصيف ده، وعليكي بس انك تختاري المناسب ليكي

الاكسسوارات والصنادل

الصنادل الملونة موضة الصيف ده
الصنادل الملونة موضة الصيف ده

وطبعا دول الحاجتين اللي بيكملو اللوك مع الفستان، الصنادل السنة دي ملونة او مطرزة والكعب الويدج موضة السنة دي او الكعب العالي جدا، وبالنسبة للاكسسوارات اختاري كل حاجة ملونة وابعدي عن الحاجات التقليدية، موضة 2015 هي الالوان والانطلاق شوفي كده موديلات 2015 في الصنادل

وممكن تشوفي اللينك ده كمان موضة مكياج 2015 عشان تعرفي حتعملي مكياج ايه مع فستانك