افكار جديدة للعشاء سهلة جدا

بقلمأنجي سليمان فيسلطات visibility1

دايما بنسأل نفس السؤال قبل كل وجبه، حناكل ايه؟ وغالبا بتبقى الحيرة في وجبة الغدا لأن الفطار والعشاء من الوجبات اللي تقريبا ثابتة وبتتكرر كل يوم، بس اكيد التكرار ده بيسبب الملل، عشان كده النهاردة جبنالك مجموعة من الافكار اللي تقدري تنفذيها بسهولة وبسرعة وفي نفس الوقت تجددي من روتين العشاء بتاعك، اقري الموضوع وشوفي شوية افكار جديدة للعشاء وحاولي تجربيها

فاهيتا الفراخ

غالبا كلنا بنستخدم صدور الفراخ المخلية في عمل البانية، لكن في طريقة تانية كمان حلوة جدا وبعيدة ع القلي والزيت الكتير نقدر نعمل بيها صدور الفراخ للعشاء وهي الفاهيتا

فاهيتا الفراخ
فاهيتا الفراخ

المقادير

قطعتين او تلاتة من صدور الفراخ المخلية مغسولة كويس ومتقطعة مكعبات

بصلة صغيرة متقطعة جوانح

فص ثوم واحد مهروس

ثمرة فلفل رومي اخضر ولو في كمان فلفل الوان متقطعين شرايح رفيعة

ثمرة طماطم متوسطة نشيل منها البذر والماية ونقطع اللحم بتاعها مكعبات

ملح – فلفل – كزبرة ناشفة – زعتر ناشف او اخضر

الطريقة

في طاسة غويطة بنشوح البصل لغاية ما يبدأ لونه يتغير

حطي الثوم المهروس وقلبي لغاية ما يبقى لونه دهبي

حطي الفلفل الرومي وقلبي لغاية ما يطرى

حطي التوابل على الفراخ وقلبيها كويس وبعدين حطيهم مع البصل والثوم والفلفل على النار

قلبيهم وحطي نص كوباية ماية وغطي الطاسة شوية

لما الماية تتشرب اتأكدي ان الفراخ استوت ولو لسه زودي ربع كوباية ماية وسيبيها تستوي تاني

لما تستوي حطي الطماطم وقلبيها وطفي النار

طريقة العيش اللبناني
طريقة العيش اللبناني

لعمل الساندوتشات

هاتي العيش اللبناني الرفيع وادهنية بالميونيز او الكاتشب او سلطة الطحينة

حطي معلقتين من الفاهيتا على جنب الرغيف

لفيه زي الرول

قدمية مع بطاطس محمرة او بطاطس شيبسي ومخلل

افكار جديدة للعشاء

السوسيس بالصلصة

دي برضه طريقة جميلة جدا لعمل السوسيس بيبقى طعمه زي صلصة البيتزا بالظبط

افكار جديدة للعشاء

المقادير

سوسيس على حسب عدد الافراد

3 فصوص ثوم

ثمرة طماطم كبيرة او اتنين متوسطين

فلفل رومي متقطع شرايح صغيرة

زيتون اسود او اخضر حسب المتوفر منزوع البزر ومتقطع حلقات

ملعقة صغيرة كاتشب

ملعقة كبيرة صلصة

ملح وفلفل وزعتر

الطريقة

فكي السوسيس في شوية ماية بتغلي لغاية ما يبقى طري وبعدين قطعية طرنشات

في طاسة على النار حمري الثوم المهروس لغاية ما يبقى دهبي

حطي عليه الطماطم والفلفل الرومي وقلبية كويس لغاية ما الفلفل يطرى شوية

حطي عليهم الكاتشب والصلصة وربع كوباية ماية عشان نفك الصلصة

حطي عليهم الزيتون والسوسيس المتقطع  وسيبيه يغلي دقيقتين عشان ياخد من الطعم

افكار جديدة للعشاء

لعمل الساندويتشات

حطي السوسيس بالصلصة في العيش اللبناني الملفوف او في العيش الفينو الايطالي

رشي عليه شوية جبنة جودة او شيدر مبشورة

قدميه مع بطاطس شيبسي ومخلل

التونة بالسلطة

برضه من مقترحات العشاء الخفيف وبتبقى جميلة عشان طعمها مختلف

التونة بالسلطة
التونة بالسلطة

المقادير

بصلة صغيرة جدا او ربع بصلة عادية

واحدة فلفل رومي

ثمرة جزر

ثمرة خيار

ثمرة طماطم

شوية خس كابوتشى متقطع شرايح رفيعة

ليمونة كبيرة

ملح وفلفل وكمون

سلطة طحينة

طريقة التحضير

اضربي البصل والفلفل والجزر مع بعض في الكبة او ابشريهم بالمبشرة اليدوية

قطعي الطماطم والخيار عليهم

حطي عليهم الخس

صفي التونة من الزيت كويس جدا وحطيها عليهم

حطي الملح والفلفل والكمون واعصري الليمونة

قلبيهم كويس جدا

افكار جديدة للعشاء
افكار جديدة للعشاء

لعمل الساندويتشات

اختاري العيش اللي بتحبيه لبناني او فينو

افردي طبقة من سلطة الطحينة وبعدين معلقتين من سلطة التونة

قدمية مع بطاطس الشيبسي والحاجة الساقعة