ازاي نعالج الارق بطرق مختلفة

الضغط العصبي والتوتر والمشاكل الحياتية اللي بتواجهنا كل يوم ممكن تكون من اكتر الاسباب المسئولة عن الارق، وغالبا لما بيجي وقت النوم وبندخل السرير بنبدأ نفكر في كل المشكلات والهموم والمشاغل دي، لكن لأن النوم مهم جدا لراحة الجسم والعقل فلازم نجبر جسمنا وعقلنا على النوم عشان نستعيد طاقتنا البدنية والذهنية ونقدر نواصل ياتنا بشكل طبيعي، وبناء على الدراسات الكتير الي تمت في الموضوع ده فاحنا قدرنا نجمع مجموعة من الطرق والخطوات اللي تخلينا نعرف ازاي نعالج الارق من غير اللجوء الى الاطباء والادوية

التحضير البدني

ان احنا نحضر جسمنا للنوم دي اول خطوة لعلاج الارق، وتحضير الجسم بيبدأ من قبل معاد النوم بحوالي تلات ساعات

اقطع المنبهات زي الشاي والمشروبات اللي فيها كافيين عموما

قبل النوم بنص ساعة يفضل انك تاكل ثمرة موز او تشرب كوباية لبن دافية بمعلقة صغيرة من عسل النحل

يفضل انك تاخد دش دافي او على الاقل تغسل وشك وراسك واسنانك بماية دافية

البس ملابس قطنية مريحة

ممكن تستخدم زيت اللافندر او زيت الياسمين على رسغ الايد والجبهة وده بيساعد على النوم بسرعة جدا

لو حتنام اثناء اليوم ياريت يكون الوقت اللي حتنام فيه بدري شوية عن معاد نومك بليل

التحضير المادي

المقصود هنا تحضير المكان اللي حنام فيه السرير والغرفة اللي حنام فيها ودي خطوة مهمة جدا لأنها بتساعد جدا على استرخاء الجسم والتخلص من التوتر وبالتالي النوم بسرعة

رتب السرير وشيل كل الكتب او الاوراق او الهدوم من على السرير وسيب بس المخدة والغطا

خرج كل الالكترونيات بره الاوضة زي شاحن الموبايل او اللاب توب او التابليت

يفضل انك تستخدم منبه عادي بالبطارية او الزمبلك وتقفل الموبايل قبل النوم

عود نفسك على القراءة قبل النوم وخلي كتابك جنب السرير وحدد عدد معين من الصفحات اللي بتقراه يوميا قبل النوم على طول

التحضير النفسي

ودي من اكثر الخطوات اللي محتاجة تركيز ويمكن كمان مجهود عشان نتخلص من مشكلة الارق

اقنع نفسك ان النوم ده ضرورة وان الدقيقة بتفرق في طاقتك ومجهودك تاني يوم

ابعد كل الافكار عن مخك قبل النوم واطردها من تفكيرك تماما وفكر بس في ان النوم بدأ يتسرب لجسمك وان جسمك بقى تقيل وان انت بدأت تفقد السيطرة عليه

تخيل انك بتعد اي حاجة سرب من الطيور او اوراق وردة او غيرها واستمر في العد لغاية ما تنام

نظم نفسك خد شهيق وعد اثناؤه من واحد لاربعة ببطء وبعدين احبس نفسك وعد بنفس السرعة من واحد لسبعة، خرج النفس وانت بتعد من واحد لتمانية، وبعدها اتنفس بشكل عادي

ازاي نعالج الارق

في النهاية لازم نعرف ان النوم ضروري جدا لكل اجهزة الجسم عشان ترجع تعمل بنفس كفائتها في اليوم التالي، وان قلة النوم دي  بتضعف مناعة الجسم وترهق شكل الملامح، لأن لو اقتنعنا نفسيا بالنقاط دي حيكون النوم عملية اسهل واسرع من العادي، ولو حاولنا نلتزم بالخطوات اللي فاتت يبقى حنعرف ازاي نعالج الارق بكل سهولة ومن غير ادوية.