طريقة عمل ناجتس الفراخ في البيت

من الوصفات اللي بنحبها كلنا كبار وصغيرين وبنطليها من المطاعم هي ناجتس الفراخ، دايما بيتهيألنا ان هي اكلة صعبة ومش ممكن نعملها في البيت، لكن في الحقيقة هي وصفة سهلة جدا ومكوناتها مش صعبة، والنهاردة احنا حنقدملك طريقة عمل ناجتس الفراخ في البيت بأسهل المكونات والخطوات

المقادير

قطعتين من صدور الفراخ الفيليه من غير عظم او جلد

عصير نص ليمونة

نص كوباية دقيق

ملح وفلفل

التوابل المفضلة عندك مثلا: زعتر – قرفة – كزبرة ناشفة – جنزبيل مطحون – بابريكا

بيض

بقسماط مطحون

طريقة التحضير

قطعي الفراخ مكعبات متساوية بس لاحظي انها متبقاش رفيعة عشان ماتنشفش اثناء التحضير

اغسلي الفراخ وصفيها كويس جدا من الماية وقلبيها مع عصير الليمون

تبلي الدقيق بالملح والفلفل والتوابل

حطي الفراخ في الدقيق وغطيها كويس جدا

اضربي البيض بالشوكة

انفضي الفراخ من الدقيق وحطيها في البيض

  تبلي البقسماط

حطي الفراخ في البقسماط

انفضيها كويس من البقسماط ورصيها في صينية واسعة ووزعيها بعيد عن بعض

دخليها الفريزر نص ساعة او ساعة

سخني زيت غزير على النار واقلي فيه الفراخ وهي متجمدة

اقليها لغاية ما يبقى لونها دهبي وخرجيها على ورق المطبخ

قدميها في الساندويتشات مع سلطة الطحينة وشرايح الخس والطماطم

او قدميها مع المسطردة  والكاتشب او اي صوص بتحبيه