وصفات وماسكات طبيعية لتساقط الشعر

من اكتر واشهر المشكلات اللي بتواجه كتير مننا مشكلة تساقط الشعر، وكتير بنحاول نقلل من المشكلة دي باستخدام انواع مخصوص من الشامبو او حمام الكريم، لكن في احيان كتير المستحضرات دي بتزود المشكلة لأنها متكونة من مركبات كيميائية ومواد بتضعف الشعر وبتقصفه او بتديله مظهر باهت ومش حلو، عشان كده احنا جبنالك وصفات وماسكات طبيعية لتساقط الشعر وكلها ممكن تتعمل في البيت بالمكونات المتاحة في مطبخك ومن غير الاضرار بتاعة المواد الكيميائية والمستحضرات الجاهزة

1- ماسك البيض والثوم

من الماسكات المفيدة جدا للشعر وده عشان الثوم بيقتل البكتريا والفطريات، يعني لو سبب تساقط الشعر فطريات او قشرة شعر مثلا فالثوم حيكون من اكتر المواد المفيده في الحالة دي، اما العسل فمعروف انه من اقوى مرطبات الشعر ومن المواد اللي بتعمل لمعة جميلة جدا وبتخلي الشعر ناعم ومن مكونات الماسك كمان جل الصبار وهو من المكونات المهمة جدا في تكثيف الشعر وتطويله
مكونات الماسك
ملعقة صغيرة من عصير الثوم
ملعقتين كبار من جل الصبار متوفر عند العطار او السوبر ماركت
ملعقة كبيرة من عسل النحل
صفار بيضة
طريقة تحضير الماسك
اخطلي جميع المكونات مع بعض لغاية ما يبقى القوام كثيف بس مش متماسك
اغسلي شعرك كويس جدا
ابدأي بتوزيع الماسك على جذور الشعر ودلكيه كويس لغاية ما تتشربه فروة شعرك
سيبيه نصف ساعة وبعدين اغسلي شعرك كويس
ملحوظة: لو حسيتي ان ريحة شعرك مش حلوة اخلطي معلقة نسكافيه كبيرة في كوباية ماية واشطفي بيها شعرك بعد الشامبو والبلسم

وصفات وماسكات طبيعية لتساقط الشعر

2- ماسك الزيت وفيتامين E

الماسك ده من ابسط واسهل الماسكات لعلاج تساقط الشعر عشان بيتكون من زيوت متوفرة في كل بيت، ونتيجته مش بس لعلاج تساقط الشعر لأ هو كمان بينعم ويطول الشعر ويديله لمعان جميل وريحه حلوة جدا
مكوناته
ملعقة كبيرة من زيت الزيتون
ملعقة كبيرة من زيت اللوز الحلو
ملعقة كبيرة من زيت السمسم
ملعقة كبيرة من زيت جوز الهند
(كبسولة فيتامين  (متوفرة في الصيدليات
طريقة تحضير الماسك
اغسلي شعرك كويس جدا
دوبي زيت جوز الهند في حمام مياة سخنة
ضيفي باقي الزيوت وكبسولة الفيتامين
استخدمي الخليط وهو دافي
وزعي الزيوت على فروة الرأس
دلكيها كويس جدا لغاية ما الجلد يتشربها
حطي ماية بتغلي على النار وحطي فوقها الفوطة عشان تسخن من البخار
حطي الفوطة على شعرك ولفي بيها الرأس كويس
كرري العملية كل ما الفوطة تبرد تسخنيها بالبخار وتلفي بيها الرأس والشعر
بعد نص ساعة اغسلي شعرك بالماية السخنة والشامبو
رطبي شعرك بزيت الصبار ومشطيه كويس
ملحوظة: بلاش تمشيط الشعر وهو مبلول لأن ده بيسبب تساقط الشعر، حطي زيت التصفيف واستني فترة نص ساعة على الاقل وبعدين مشطي الشعر بمشط او فرشاة مصنوعة من الخشب

3- ماسك صفار البيض والموز

من الماسكات المغذية جدا للشعر لأنه بيحتوي على كمية كبيرة من الفيتامينات المفيدة والمواد المرطبية للشعر، مثلا صفار البيض في بروتين وفيتامينات مهمة جدا لتغذية الشعر، والموز كمان في مواد مضادة للاكسدة بتفيد الشعر جدا
مكونات الماسك
موزة مهروس
صفار بيضة
ملعقة كبيرة من زيت الخروع
ملعقة كبيرة من البن المطحون
ملعقة كبيرة من عسل النحل
طريقة التحضير والاستخدام
اغسلي شعرك كويس بالماية الدافية عشان تتفتح مسام فروة الرأس
افردي الماسك على الشعر بفرشاه الصبغة
ابدأي من الجذور وبعدين على باقي الشعر
لفي شعرك كويس والبسي بونية بلاستي
سيبيه ساعتين وبعدين اغسلية كويس جدا بالشامبو
رطبي شعرك بزيت الصبار ومشطية
ملحوظة: قللي استخدام السشوار على قد ما تقدري وحاولي تريحي شعرك من التسخين، وكمان حاولي تسيبي شعرك من التوكة قدر الامكان ونامي وشعرك مش مربوط عشان الشعر بيحتاج للهواء والاكسجين ممكن تسرحي شعرك بطريقة الضفيرة وتمسكيه بتوكة من الاخر عشان تضمني انه بيوصله الهواء بشكل كويس