إزاي تعملي ال”سكرب” أو مقشر البشرة في البيت؟!

أهلا بنات حوا, احنا عارفين أد إيه منتجات العناية بالبشرة مكلفة وفيه بنات كتير بتبقي قلقانة إن المنتجات ديه بيبقي فيها مكونات كيماوية وممكن على المدي الطويل تضر أكتر ما تفيد, عشان كده احنا جبنلكم النهردة طريقة عمل السكرب أو مقشر البشرة في خطوات سهلة وبسيطة جدا في البيت.

بصي يا ستي الطريقة سهله جدا وبتاخد حوالي 3 دقايق, وممكن تعمليه باللون والريحة اللي إنتي حباها. السكرب بيستخدم للوجه والجسم وكمان الشفايف عشان تحصلي على بشرة متجددة وناعمة.

طريقة عمل مقشر البشرة في البيت:

مكونات السكرب:

سكر – زيت جوز الهند – ألوان  طعام – وعاء صغير.

طريقة تحضير السكرب:

– عايري واحد ونصف كوب من السكر في وعاء خلط – أضيفي 1 قطرة من ألوان الطعام – إضافة 3 ملاعق من زيت جوز الهند.

شفتي الموضوع سهل إزاي؟ ممكن لو مش حابة موضوع ألوان الطعام ده بلاش تستعمليه وهيبقى عندك سكرب أبيض عادي, زيت جوز الهند ممكن يستعمل لوحده كمان وفوايده كتير جدا, شاهديها من هنا , السكرب هيساعدك على ترطيب جسمك كله سواء اليدين, الوجه ,الكعوب أو الشفايف.

طريقة استعمال السكرب:

حطيه علي وشك أو جسمك, دلكي في حركة دائرية لمدة 3 دقايق وبعد كده سيبيه ينشف لمدة 5 اللي 10 دقايق واخر خطوة اشطفيه.

يلا جربوا السكرب وقولولنا إيه رأيكم في وصفة البيت السهلة ديه من بنات حوا؟