5 علامات للحب من طرف واحد! احذريهم

الحب الحقيقي والالتزام عمله نادره الإيجاد فالزمن اللي احنا فيه … وبالرغم من ده احنا بنفضل عايشين طول حياتنا بندور عليه..

وفي اوقات كتيره أثناء بحثنا عن الحب الحقيقي بنعدي في علاقات بتنتهي نهايه حزينه… وده عشان أسباب كتيره زي مثلا الشعور بالوحده أو ضغط الأهل أو الأصحاب, ساعتها احنا بندخل مرحلة الوهم و بنهياء لنفسنا إن هوا ده الشخص المناسب وإنه الشخص ده عنده مشاعر متبادله مع انه لو فكرنا شوية بشكل عقلاني هنكتشف انه العلاقه ده نهايتها الفشل وإن ده مجرد حب من طرف واحد… وإن الشريك ده مش في حاله حب حقيقي..

جمعنلكم اهم علامات إزاي ممكن تعرفوا بيها انكم في حالة حب من طرف واحد:

1- الأحترام المتبادل:

العنصر الرئيسي للحب هو الاحترام المتبادل, وإذا كان شريكك بيهنيك لأي سبب أو مش بيحترمك سواء قدام الناس أو بينكم لوحدكم, ده بيبقى اكبر دليل إنه مش بيحبك.. أو مش شايفيك إنك هتبقي زوجته وأم أولاده في يوم من الأيام..

2- العلاقة سرية

هل شريكك عايز إن علاقتكم تبقي سرية؟؟ وإنك متتكلميش مع حد من أصحابك أو أهلك عنه؟ وهو كمان ميبقاش فيه حد من أهله أو أصحابه عارفك؟ في الحالة ديه اعرفي إنه مش جدي معاكي.. وإنه حاجة من اتنين, يا إما لسة عنده شك في مشاعره من ناحيتك يا إما بيلعب وعايز يقضي شوية وقت وخلاص.

3- بتتقابلوا مرتين فالشهر؟!

لما يكون دايما مش فاضي, دايما عنده شغل أو ارتباطات تانية, دايما الأولوية لأصحابه او عيلته والخروج معاهم, وبتشوفيه بس كام مرة فالشهر! إذا إنتي مش من اولوياته وده مش حب حقيقي…

4- مش شايف فيكي غير إنك جميلة

السؤال الازلي: إنت ليه بتحبني؟ لو كان الرد عشان إنتي اجمل وأحلى وارق واحدة فالدنيا تأكدي إن ده مش حب حقيقي… مينفعش شريكك ميكونش شايف فيكي أي صفات غير شكلك, لازم يكون بيحب شخصيتك, بيحب يتكلم معاكي, لما تحصلوا مشكلة إنتي أول واحدة يبقى عايز يكلمها يحكيلها وياخد رأيها لأنه أكتر رأي بيثق فيه..

5- شعورك بالسعادة والرضي

آخر واهم علامة هو شعورك إنتي بالسعادة فالعلاقة وإنك راضية بيها ولا لأ, لازم من وقت للتاني تدي نفسك فرصة للتفكير وهل إنتي فعلا سعيدة؟ ولا بتدعي السعادة؟! صدقيني مفيش أي حد ممكن يديكي رأي أو نصيحة أحسن منك إنتي لنفسك..

بنتمني إن النصايح تكون مفيده وإن كل بنت تلاقي السعادة والحب الحقيقي اللي يقدرها ويسعدها وتعيش معاه طول حياتها…