أحلى افلام رومانسية تتفرجوا عليها فى الفلانتين

سارة جمال
سارة جمال
11147

أعزائى قراء بنات حوا..  هابي فلانتين داي :)

احنا خلاص على أبواب الفلانتين وعشان المناسبة الجميلة قررت إني اعملكم ليست بالافلام الرومانسية اللي ممكن تتفرجوا عليها فاليوم ده مع شريك حياتكم.

يلا نشوف احلي أفلام الفلانتين :

1-When Harry Met Sally 1989

فيلم من بطولة ميج ريان و بيلي كريستال, و أحلى جملة رومانسية في الفيلم لما البطل في الاخر راح للبطلة وقالها  “أنا جتلك النهارده عشان لما تعرف و تتأكد إنك عايز تقضي بقية حياتك مع حد… بتبقي عايز تبدأها دلوقتي حالا….”

2-Love Story 1970

طبعا كلكم أكيد عارفين الفيلم ده, لانه من أشهَر الأفلام الرومنسية على الاطلاق وعلى الرغم من النهاية الحزينة إلى إنه فيلم رائع وبيخلينا نتعلم إزاي نقدر الحياه

أحلى جملة رومانسية في الفيلم هي “البطل: الحب هو إنك عمرك ما تكون مضطر إنك تقول أنا آسف …”

3-Pretty Woman 1990

الفيلم الشهر بطولة الجميلة جوليا روبرتس و فتى أحلام كل البنات ريشارد جير, فيلم ممتع ونهاية سعيدة مليانة أمل.

أحلى جملة رومانسية في الفيلم “البطل: وإيه اللي بيحصل بعد ما الفارس بيجي على حصانه وينقذ الأميرة؟ … البطلة: الأميرة هتنقذه هو كمان”

4-Crazy, Stupid, Love 2011

فيلم حديث مقارنه بـباقي الليست, فيلم كوميدي وفيه أكتر من قصة وأكتر من وجهة نظر عن الحب, بطولة ستيف كاريل, ريان جوسلنج , ايما ستون و جوليان مور.

أحلى جملة “البطل: مش هبطل احبك أبدًا…لانك لما بتلاقي شريك حياتك وتعرف إن هو ده .. عمرك ما هتيأس أبدًا”

5-The Notebook 2004

فيلم أكتر من رائع بيحكي عن الحب بين البطل الفقير والبطلة الغنية وبتواجههم مشاكل من الأهل اللي كانوا بيضغطوا عشان مش راضيين عن العلاقة لكن الاحداث بتطور وبنشوف في الفيلم اصرار وتضحية و ولاء. الفيلم بطولة ريان جوسلينج برده ومعاه ريشل ماكدامس.

أحلى جملة في الفيلم “الموضوع مش هيبقى سهل, الموضوع هيبقى صعب جدا..بس احنا هنحاول كل يوم .. عشان أنا عايزيك, عايز كل حاجة فيكي للأبد..”

6-Casablanca 1942

فيلم من التراث ولازم تشوفه على الاقل مرة في حياتكم.. بتدور أحداثه في المغرب في وقت الحرب وبيحكي عن قصة حب معقدة ومستحيلة تنتهي بتضحية.

أحلى جملة في الفيلم ” أنا مش قادر اقاوم أكتر من كده, أنا هربت منك مرة بس مش هأقدر أعملها مرة تانية…”

7- While You Were Sleeping 1995

فيلم من بطولة ساندرا بولوك, رومانتيك كوميدي وينتهي نهاية سعيدة.

أحلى جملة في الفيلم ” هل عمرك حبيت حد من أول نظرة؟ حد  حتى متكلمتش معاه قبل كده؟”…

8- Dirty Dancing 1987

فيلم تاني بيحكي عن الطبقية ونظرة المجتمع والأهل ورفضهم للعلاقة لما يكون فيه اختلاف في المستوى الإجتماعي..بس بينتهي نهاية سعيدة لما البطل وال بطلة بيتحدوا الجميع و يكملوا قصة حبهم.

أحلى جملة في الفيلم “أنا؟ أنا خايف من كل حاجة..أنا خايف من اللي شفته, خايف من اللي عملته وخايف من نفسي..وأكتر حاجة مخوفاني إني أمشي وأقضي بقيت حياتي من غير ما أحس الإحساس اللي أنا حاسه معاك دلوقتي…”

9- French Kiss 1995

فيلم من بطولة ميج ريان وكيفين كلين.. فيلم رومانسي كوميدي بحيكي عن البطلة اللي طول الفيلم بتدور وبتجري عشان ترجع حبها اللي هي فكراه ضاع منها مع إن طول الوقت حبها كان معاها وهي مش شيفاه..

أحلى جملة في الفيلم “البطلة: إنت بتؤمن بالحب؟ الحب اللي بيعيش طول العمر؟.. البطل: أنا بحب أمي!.. البطلة: كلنا بنحب أمهاتنا. أنا بقصد الحب من راجل واحد عشان ست واحدة بس..”

10- Sleepless in Seattle 1993

فيلم  أيضًا من بطولة ميج ريان, لو ملحظن إن ليها 3 أفلام من ال 10 أفلام اللي موجودين في الليست بتعتنا, نرجع لموضوع الفيلم , الفيلم بيحكي عن راجل فقد زوجته ومكنش متوقع إنه ممكن يحب تاني… بس القدر كان أقوى من توقعاته وينتهي الفيلم نهاية سعيدة..

أحلى جملة في الفيلم “القدر هو كلمة احنا اخترعناها عشان احنا بس مش قادرين نصدق إن كل حاجة بتحصل في حياتنا هي مجرد صدفة..”

أتمنى إن تكون ليست الأفلام عجبتكم وانكم تقضوا فلانتين رومانسي وسعيد :)

مقالات متعلقه

افكار تجنن للاحتفال وتقديم هدايا الفلانتين

افكار تجنن للاحتفال وتقديم هدايا الفلانتين

أحلى هدايا عيد الحب لك وله!

أحلى هدايا عيد الحب لك وله!

3 نصايح للسينجل في الفلانتين!

3 نصايح للسينجل في الفلانتين!