كريم بذور الكتان لترطيب البشرة الجافة
البشرة الجافة دايما بتعاني من نقص الترطيب الطبيعي وده بيخليها دايما شكلها باهتة ومش نضرة, وبتبقى محتاجة دايما ترطيب بشكل مضاعف, عشان كده النهاردة هنقولك على طريقة كريم طبيعي بيساعد على ترطيب البشرة الجافة.
المكونات:
معلقة كبيرة من بذور الكتان.
معلقة كبيرة جليسرين.
معلقة كبيرة من جل صبار الالوفيرا.
كوباية مية مقطرة او مية معدنية.
الطريقة:
في اي حلة او طبق معدني اخلطي بذور الكتان مع المية وحطيهم على النار يغلوا لمدة دقايق, لحد ما قوام الخليط يبقى هلامي, ارفعيه من على النار وصفية بقطعة شاش عشان يبقى الهلام عندك خالي من اي بذور, بعدها ضيفي له الجليسرين وجل صبار الالوفيرا, واضربيهم مع بعض بالمضرب الكهربا.
كده يبقى الكريم جاهز عندك, حطيه في اي علبة فاضية محكمة الغلق, واستخدميه للترطيب بشكل يومي بنفس طريقة الكريم المرطب العادي, واحفظيه في الثلاجة وممكن يقعد معاكي لحد اسبوع.