طريقة الموس فونديشن في البيت

كلنا عارفين ان الموس فونديشن هو نوع كريم الاساس اللي بيكون كريم اساس وبودر مع بعض يعني مش محتاجة انك تستخدمي معاه بودر,والنوع ده بيكون مناسب جدا للبشرة الدهنية اللي عندها زيادة في افراز دهون البشرة والمكياج بيسيح عليها بسرعة, ده غير انه بيعمل تغطية عالية وبيداري عيوب البشرة, تعالوا نعرف الطريقة مع بعض.

الطريقة بسيطة وسهلة جدا, كل اللي هتعمليه هتجيبي كريم الاساس السايل العادي اللي انتي بتستخدميه, تاخدي منه كمية في علبة صغيرة وتخلطي عليه لوس بودر, ولو مش متوفر عندك لوس بودر هاتي البودرة العادية بتاعتك المضغوطة وباي حاجة حادة اكشطي شوية منها كده وضيفيهم على كريم الاساس, او لو عندك بودر قديمة مش بتستخدميها كتير مثلا ممكن تكسريها وتنعميها خالص وتستخدميها, او لو عندك بودر اتكسرت ممكن تستغليها وتعملي بيها الموس يعني اختاري اي طريقة تريحك, ضيفي البودرة بالتدريج على كمية الاساس بتاعتك وقلبيهم مع بعض لحد ما توصلي لقوام مناسب, وكده يبقى الموس جاهز عندك.