طريقة السويت بالسكر لازالة الشعر

في كتير من البنات مش بيعرفوا يظبطوا طريقة السويت اللي بالسكر لازالة الشعر وساعات بتنشف منهم وبتبوظ النهاردة جايبين لكم طريقة بمقادير مظبوطة.

المقادير:

كوباية سكر ابيض او بني.

2 معلقة كبيرة مية.

1 1/2 معلقة كبيرة عصير ليمون او خل.

معلقة صغيرة ملح “اختياري”.

الطريقة:

هنخلط المكونات كلها مع بعض على نار هادية ونفضل نقلب فيها بمعلقة خشب لحد ما السكر يدوب كويس جدا ولونها يبقى دهبي مايل للبني الفاتح ويبقى سمكها معقول مش سايلة اوي ولا سميكة اوي, هنرفعها من على النار ونسيبها تبرد شوية وبعدين نستخدمها بالطريقة العادية هنفردها على مكان الشعر ونشدها عكس اتجاه الشعر, لو فضل منها حطيه في Ziploc واحفظيها في التلاجة لحد ما تيجي تستخدميها مرة تانية طلعيها من الكيس وسيحيها شوية في الميكروويف او على النار واستخدميها.