شيلي المانيكير من غير اسيتون في ثانية واحدة !
لو مش متوفر عندك اسيتون او المانيكير بيعذبك كل ما تيجي تشيليه, هنقولكم النهاردة على حيلة بسيطة وسهلة جدا تخليكوا تشيلوا المانيكير من غير اسيتون في ثانية واحدة بس, والحيلة بتاعتنا بالغرا الابيض بنفس فكرة المانيكير الاسلامي اللي بيتقشر من على الضوافر اللي بنستخدمة عشان منلطخش ايدينا بالمانيكير لما نيجي نحطه, هنجيب الغرا الابيض العادي اللي بيستخدم للخشب ده هنلاقيه في اي مكتبة ناخد منه شوية صغيرين ونحط عليهم نقطتين مية ونقلبهم كويس وبعدين بفرشة مانيكير قديمة او بفرشة مكياج هنحط طبقة غرا خفيفة على الضوافر ونسيبها لما تنشف خالص وبعدين نحط المانيكير بتاعنا عادي جدا, واي وقت حابة تشيلي المانيكير هتلاقيه بيتقشر معاكي وبيطلع بكل سهولة مره واحدة من غير ما يسيب اي اثر للمانيكير على الضوافر.
ممكن نجيب ازازة غرا صغيرة ونفضيها في ازازة مانيكير فاضية عندنا بعد ما نغسلها كويس طبعا ونحط على الغرا معلقتين مية كبار ونرجهم مع بعض, ويبقى جاهز عندنا في اي وقت نستخدمة قبل المانيكير.
