سيروم لتفتيح البشرة والجسم بشكل فعال

النهاردة جايبين لكل بنات حوا طريقة سيروم طبيعي تعمليه بنفسك في البيت بمكونات بسيطة, هيساعدك على تفتيح البشرة بشكل فعال جدا, هيفتح الاماكن الغامقة في الجسم, هيفتح اي بقع غامقة, هيزيل حروق الشمس, وهيساعد على علاج جفاف وتلف البشرة وهيرطبها.

ياللا نبدأ مع بعض نعرف مكونات وطريقة السيروم

المكونات:

كوباية بتلات ورد.

من 3 – 4 معالق كبيرة لبن.

معلقة كبيرة جليسرين.

2 كبسولة فيتامين E.

معلقة كبيرة فازلين.

5 معالق كبيرة جل الالوفيرا.

طريقة تحضير لبن الورد:

اول حاجة هنحضر لبن الورد, هنجيب البتلات نحطها في البلندر او الميكسر هنضيف عليها اللبن ونضربهم مع بعض لحد ما يبقى عندنا خليط سميك شوية, حطيه على مصفي واضغطي عليه بالمعلقة عشان تستخرجي السائل منه.

طريقة تحضير السيروم:

دلوقتي بقى هنحضر السيروم مع بعض هنجيب لبن الورد اللي احنا عملناه نضيف عليه الجليسرين وممكن تزودي كمية الجليسرين لو عايزة الخليط يبقى سميك اكتر ويطلع معاكي كريم مش سيروم.

بعد ما ضيفنا الجليسرين هنفتح كبسولتين زيت فيتامين E ونضيفهم للخليط, وبعدين نضيف الفازلين, ونقلب المكونات كلها مع بعض كويس.

بعد ما يمتزجوا هنضيف للخليط جل الالوفيرا ونقلبهم تاني مع بعض هيبقى عندنا خليط قوامه متوسط مش سميك اوي ولا خفيف, وكده يبقى السيروم جاهز عندنا للاستخدام.

كل اللي هتعملية انك هتدهني السيروم على البشرة او الجسم كله كل يوم قبل النوم وتغسليه الصبح, والنتيجة تظهر بعد شهر.

ممكن تشوفوا الطريقة بالفيديو: