اعملي سويت الميرندا لازالة الشعر الزائد

سويت الميرندا! ممكن يكون في بنات سمعوا عنها وبنات اول مره يسمعوا بيها, السويت دي لازالة الشعر الزائد من الجسم وانتشر استخدامها في الفترة الاخيرة ونتايجها بتكون افضل كتير من السويت العادية, بتشيل الشعر اسهل واسرع وبألم اقل, وبتشيل كل الشعر حتى الصغير, وكمان بتنعم البشرة وبتفتحها.

مكوناتها وطريقتها سهلة جدا هنحتاج 500 ملل مشروب ميرندا عادي اللي هي المياة الغازية اللي احنا بنشربها او ممكن نستخدم فانتا الاتنين دول هنستخدمهم بشكل خاص عشان اللون يبقى لونها فاتح والشعر يبان فيها , ومعاهم 250 جرام سكر, الكمية دي ممكن نعمل نصها عادي او حسب ما احنا عايزين المهم يكون السكر نص كمية الميرندا.

الطريقة بسيطة جدا اننا هنحط الميرندا مع السكر في حلة على النار ونفضل نقلب فيهم لحد ما تتقل وسمكها هيبقى زي سمك العسل الابيض كده, تقريبا هتاخد على النار 45 دقيقة على ما توصل للتقل المظبوط ونخلي بالنا عشان متتحرقش مننا لان ممكن تتحرق بسرعة جدا يعني لونها هيفضل برتقاني بس هتتقل شوية, وبعد ما توصل للتقل المظبوط اللي احنا قولنا عليه هتستخدميها عادي جدا لازالة الشعر لاي مكان في الجسم.