احمي بشرتك من تأثير المكياج في تلات خطوات
لو بتستخدمي المكياج بشكل يومي, في تلات خطوات مهمين لزام تعمليهم عشان تمنعي الاثار الضارة من المواد الكيمائية في المكياج زي حب الشباب والبثور والرؤوس السودا.
الخطوة الاولى:
اول حاجة هي استخدام مزيل المكياج او مية ميسيلار, لانها بتساعد على تنضيف البشرة بعمق من اثار المكياج اللي ممكن تدخل جوه مسام البشرة, وضروري انك تستخدمي مزيل المكياج المناسب لنوع بشرتك سواء مائي او زيتي, كمان حسب نوع المكياج اللي كنتي حطاه عادي او مضاد للمية او مات او كريمي لان كل نوع بيناسبه نوع مزيل مكياج اكتر.
الخطوة التانية:
بعد ما تمسحي المكياج بالمزيل هنيجي للخطوة التانية وهي غسل البشرة بالغسول المناسب ليها والمية الفاترة عشان تتأكدي ان البشرة نضفت تماما من اي اثار مكياج, دلكي البشرة بالراحة في حركات دائرية, وبعدها اشطفيها بمية باردة ونشفيها.
الخطوة التالتة:
الخطوة الاخيرة بعد ما نضفتي البشرة كويس بالمزيل والغسول, رطبي بشرتك بكريم مرطب مناسب عشان تحميها من الجفاف والتقشر وتحافظي عليها نضرة وصحية.
