التكنيك الصح للعناية بالبشرة وترتيب وضع المنتجات على البشرة

كتير من البنات دايما بيسألوا على الطريقة الصح للعناية بالبشرة وترتيب استخدام المنتجات خصوصا لو بنستخدم اكتر من منتج, والنهاردة هنقولكم الطريقة الصح للعناية بالبشرة بشكل يومي, وترتيب وضع المنتجات على البشرة في 7 خطوات.

1- اول خطوة غسل الوش بالغسول المناسب لنوع بشرتك, وبعدين تنشفيه بالفوطة بطريقة الطبطبة وبلاش فرك البشرة لانه بيأذيها.

2- تاني خطوة نجيب قطعة قطن ونمسح البشرة بالتونر ونسيبه على البشرة لحد ما ينشف, والتونر مفيد جدا للبنات اللي بشرتهم دهنية اوي لانه بيقلل دهون البشرة وبيقلل حجم المسام.

3- بعد ما التونر ينشف على البشرة دلوقتي الخطوة اللي هتحطي فيها اي كريمات علاجية انتي تكوني بتستخدميها زي كريمات حب الشباب او غيرها, طبعا لو مافيش كريمات علاجية بتستخدميها يبقى هنتخطى الخطوة دي ونعمل اللي بعدها على طول.

4- حطي كريم العين او السيروم وسيبيه ينشف على البشرة وتمتصه كويس, السيروم او كريم العين بيساعد على انه يحافظ على كولاجين البشرة.

5- في الخطوة دي هتطبقي الكريم المرطب المناسب لنوع بشرتك.

6- الخطوة دي لو خارجة في الشمس هتحطي الصن بلوك عشان تحمي بشرتك من ضرر اشعة الشمس, وال SPF ميقلش عن 30.

7- الخطوة دي لو هتحطي مكياج وانتي نازله يبقى هتحطي البرايمر الاول وبعدها الفونديشن وباقي المستحضرات اللي انتي هتستخدميها بالطريقة العادية جدا.

وده الترتيب لمستحضرات ومنتجات العناية بالبشرة في الروتين اليومي.