اعملي بنفسك تقشير للبشرة بأحماض الفواكة في البيت

كلنا اكيد سمعنا عن التقشير بأحماض الفواكه اللي بيساعد على تفتيح البشرة وازالة الجلد الميت والبقع الغامقة واثار حب الشباب, وبيخلي البشرة صافية وخالية من اي عيوب وبيوحد لونها, والنهاردة هنقولكم اكتر من طريقة لعمل التقشير بأحماض الفواكه في البيت.

الوصفة الاولى:

المكونات:

عصير ليمون.

عصير برتقان.

1/2 ثمرة موز.

الطريقة:

اخلطي كميات متساوية من عصير الليمون وعصير البرتقان, وبعدين اهرسي الموزة وضيفيها على الخليط وقلبيهم, ادهني وشك بالخليط وسيبيه لحد ما ينشف وبعديم افركيه بالراحة في حركات دائرية واغسلي بشرتك بالمية, كرري الوصفة مرة واحدة في الاسبوع.

الوصفة التانية: 

المكونات:

1/2 كوباية بابايا.

1/2 كوباية اناناس.

2 معلقة كبيرة عسل نحل.

الطريقة:

اضربي الاناناس مع البابايا في الخلاط وبعدين ضيفي لهم العسل اخلطي المكونات كلها مع بعض كويس, حطي الخليط على بشرتك وسيبيه لمدة 5 دقايق, ولو بشرتك حساسة هيكون كفاية 3 دقايق بس, بعدها اغسلي بشرتك بمية باردة وادهنيها كريم مرطب, كرريه مرة واحدة في الاسبوع.

الوصفة التالتة:

المكونات:

معلقة كبيرة شوفان مطحون.

2 معلقة كبيرة مانجا.

معلقة كبيرة لبن.

الطريقة:

اضربي المكونات مع بعض في الخلاط, لحد ما يتكون عندك معجون ناعم, خدي من الخليط دلكي بيه بشرتك في حركات دائرية من 10 دقايق لربع ساعة, وبعدها اغسلي البشرة بمية باردة, كررية مرتين في الاسبوع.

الوصفة الرابعة:

المكونات:

معلقة كبيرة عصير خيار.

معلقة كبيرة عصير برتقان.

الطريقة:

اخلطي عصير الخيار مع عصير البرتقان, لو هتعمليه كماسك ليلي قبل النوم ادهني بشرتك من الخليط بقطنة وسيبيه طول الليل نامي بيه واغسليه الصبح, لو هتعملي كماسك نهاري يعني الصبح ضيفي لعصير الخيار والبرتقان معلقة كبيرة زبادي وحطيه على بشرتك وسيبيه ربع ساعة واغسليه بالمية, كرريه يوميا.